E “Kaya di Mas Steil”?

▪ Kiko ta hasi Baldwin Street, ku ta keda na Dunedin, Nueva Zelandia, asina spesial? Pa hopi tempu, e stat di Dunedin a pretendé ku e kaya aki ta e kaya di mas steil na mundu. Ounke tin otro lugá ku tambe ta pretendé esei, un kos ta sigur: Baldwin Street ta ekstraordinariamente steil.

E kaya bon konosí aki a bira un destinashon turístiko popular pa bishitantenan di rònt mundu. Nò, bo no tin nodi ta un subidó di seru pa bo yega te ariba. Bo por subi e kaya aki di 359 meter na pia, pero nan ta deskonsehá hende di purba subié ku vehíkulo di motor.

Ban Subi Huntu ku Nos

Tabata un dia ku solo kla ora ami ku mi dos kompañeranan a para wak e kaya nos dilanti ku ta subi bai te ariba. Asina ku nos a kuminsá nos kaminata nos tabata hala rosea pisá miéntras nos tabata lèn dilanti pa mantené nos balansa. “Ta manera ta un muraya di betòn bo ta subi,” un di nan ta bisa lenga afó. Nèt na ora nos ta topa un banki ku ta invitá nos pa sosegá un ratu.

Nos ta sigui subi, i no ta dura hopi ku nos ta n’e tòp ta gosa di e panorama i ta sosegá pa por hala rosea normal atrobe. Abou nos ta mira kareda nèchi di kas i hardin bon tené. Leu na horizonte nos ta mira mondi di mata bèrdè skur banda di sabananan di yerba bèrdè; anto ku shelu blou den background.

Nos kaminata te ariba no a kibra ningun rèkòrt di velosidat. Despues ku nos a yega abou bèk, nos a para pa saka un potrèt di nos logro i a pasa tuma nos kopia di e Sertifikado di Logro ku e stat ta duna i ku ta bisa ku nos a subi e “Kaya di Mas Steil na Mundu.”—Kontribuí.