Hóbennan Sa Puntra . . .

Kon Mi Por Trata ku e Difikultatnan di Ser un Yu Adoptá?

“Eigenlijk mi no sa nada tokante mi mayornan biológiko, i esei ta molestiá mi hopi.” —Barbara, di 16 aña.

“Mi no sa mes unda mi a nase ni ken ta mi mama ni tata. Tin biaha mi sa pensa riba esei anochi.” —Matt, di 9 aña.

“Ora mi diskutí ku mi mayornan, mi ta pensa ku podisé mi ‘berdadero’ mayornan lo ta mas komprensivo. Mi sa ku esei ta masha malagradisí di mi parti, i nunka mi no a bisa nan esei.”—Quintana, di 16 aña.

UN KOS ta sigur: bida di un mucha adoptá por tin su difikultatnan. Tin basta hóben ta lucha ku sintimentunan manera esnan deskribí ariba. Hopi di nan ta puntra nan mes si nan mester buska pa sa ta ken ta nan mayornan biológiko, òf nan tin gana di sa si nan bida lo ta mas felis si nan tabata serka nan. I no ta esakinan so ta e difikultatnan.

Den e artíkulo anterior di e seri aki nos a trata algun di e kosnan negativo ku algun hóben adoptá sa pensa di nan mes pasobra nan ta adoptá. * Pa bo por resistí tal pensamentunan negativo ta importante pa bo haña goso den bida siendo un yu adoptá. Pero kiko ta algun di e otro difikultatnan ku lo por presentá, i ki pasonan práktiko lo bo por dal pa trata ku nan?

Esnan Ku A Adoptá Mi Ta Mi “Berdadero” Mayornan?

Jake di 13 aña ta bisa ku e tabata pensa hopi riba su mama biológiko. Esei a pon’é haña algun problema ku su mayornan ku a adopt’é. Segun e ta kòrda: “Ki ora ku mi rabia mi tabata bisa: ‘Abo no ta mi berdadero mama. Bo no por straf mi asina!’”

 Pues manera bo ta mira, Jake mester a trata ku un pregunta serio: Ken tabata su “berdadero” mama? Si bo ta un yu adoptá, kisas bo tambe ta luchando ku e mesun asuntu, foral si bo sa puntra bo mes si bo mayornan biológiko kisas lo no a trata bo mihó ku bo mayornan ku a adoptá bo. Pero ta e simpel proseso biológiko di kousa bo nasementu so ta hasi dos hende bo “berdadero” mayornan?

Jake su mama ku a adopt’é no a pensa asina. Jake ta konta: “Mi mama tabata bisa: ‘T’ami ta bo berdadero mama. I maske bo tin un mama ku a pari bo, awor ami ta bo mama.’” Ora adultonan tuma un mucha den nan kas i bai di akuerdo pa ta responsabel pa duna e mucha un kas, pa aliment’é i kri’é i perkurá pa su nesesidatnan, nan en bèrdat ta bira su “berdadero” mayornan. (1 Timoteo 5:8) I probablemente ta asina e outoridatnan legal di bo pais tambe ta mir’é. Pero Dios tambe ta mira nan komo bo berdadero mayornan?

Laga nos analisá loke kisas ta e kaso di adopshon di mas famoso den historia: esun di Hesukristu. Hesus no tabata e yu biológiko di Jose e karpinté, pero tòg Jose a adopt’é komo su yu. (Mateo 1:24, 25) Hesus a rebeldiá kontra e outoridat di Jose segun ku el a krese? Al kontrario, Hesus a komprondé ku Dios su boluntat tabata pa e obedesé su tata di kriansa. Hesus tabata bon konosí ku e lei ku Yehova a duna na yunan di Israel. Kua lei esei tabata?

Onra Bo Tata i Bo Mama

E Skritura ta bisa hóbennan: “Onra bo tata i bo mama.” (Deuteronomio 5:16) Hopi bes Beibel ta usa e palabra “onra” pa indiká rèspèt, gran apresio i konsiderashon. Bo por demostrá tal onra na bo mayornan ku a adoptá bo dor di ta kariñoso ku nan, respetá nan posishon, skucha nan punto di bista i ser kla pa kumpli ku kualke kos rasonabel ku nan pidi bo.

Pero kiko bo mester hasi ora ku bo ta haña ku bo mayornan di kriansa ta parse irasonabel? Nos mester atmití ku esei lo sosodé. Tur mayor ta imperfekto, sea ku nan ta di kriansa òf nò. Nan defektonan por pone ku ta difísil pa obedesé nan. I no ta un sorpresa ku na okashonnan asina bo ta inkliná na pensa riba e echo ku bo ta adoptá, i kisas ta puntra bo mes si esei di un manera òf otro no ta hasi bo ménos obligá di obedesé nan. Pero di bèrdat esei ta asina?

Kisas ta bon pa bo pensa riba e situashon di Hesus. Kòrda ku e tabata perfekto. (Hebreonan 4:15; 1 Pedro 2:22) Pero ni su tata di kriansa ni su mama biológiko no tabata perfekto. Probablemente anto, tabatin okashon ku Hesus por a mira ku su mayornan tabata ekiboká. El a rebeldiá kontra Jose su manera imperfekto di sirbi komo kabes di famia òf kontra Maria su guia defektuoso komo mama? Nò. Beibel ta bisa nos ku segun ku Hesus a krese “el a keda sometí” na su mayornan.—Lukas 2:51.

Wèl, ora abo ku bo mayornan di kriansa tin un diferensia di opinion, por sosodé ku bo ta konvensí ku nan ta robes. Pero bo tin ku atmití ku bo tambe ta imperfekto. P’esei semper tin e posibilidat ku ta abo ta robes. Di tur manera, no ta mihó pa sigui Hesus su ehèmpel? (1 Pedro 2:21) Esei lo yuda bo ta obedesidu. Pero tin un motibu asta mas importante ainda pa obedesé bo mayornan.

Beibel ta bisa: “Yunan, sea obedesidu na boso mayornan den tur kos, pasobra esaki ta agradabel na Señor.” (Kolosensenan 3:20) Sí, bo obedensia ta hasi bo Tata selestial kontentu. (Proverbionan 27:11) I e ke pa bo siña ta obediente pasobra e ke pa bo tambe ta kontentu. Su Palabra ta animá hóbennan pa obedesé, i ta agregá: “Pa bai bo bon i pa bo tin bida largu riba tera.”—Efesionan 6:3.

Kon pa Fortalesé e Relashon ku Bo Mayornan di Kriansa

Un bon relashon ku bo mayornan di kriansa ta enserá hopi mas ku solamente onra i obedesé nan. Probablemente bo ke pa na kas tin un ambiente di kariño i amor. Bo mayornan di kriansa ta responsabel pa krea un ambiente asina. Pero bo tambe por hunga un papel importante den esei. Kon asina?

Na promé lugá, buska maneranan pa bira mas será ku bo mayornan. Puntra nan tokante nan background, nan bida, i nan interesnan. Buska konseho serka nan pa problemanan ku ta  molestiá bo, i skohe un momentu ku nan ta trankil i habrí pa papia. (Proverbionan 20:5) Na di dos lugá, buska maneranan pa partisipá den e funshonamentu di kas, por ehèmpel, dor di yuda ku trabou di kas i otro tareanan sin ku nan tin ku roga bo.

Pero kiko di bo mayornan biológiko? Si bo disidí ku bo ta bai buska pa sa ken nan ta, òf si nan disidí di buska pa sera konosí ku bo, esei ta nifiká ku outomátikamente bo relashon ku bo mayornan di kriansa ta na peliger? Den pasado, agensianan di adopshon hopi bes tabata nenga di revelá informashon pa yuda mayornan biológiko haña yu ku nan a duna pa adopshon òf pa yu haña nan mayornan. Awendia, e reglanan den algun pais ta mas liberal, i hopi mucha adoptá a topa personalmente ku nan mayornan biológiko ku nan no tabata ni kòrda mes. Klaru ku e reglanan di adopshon kisas no ta meskos kaminda abo ta biba.

Di tur manera, ta abo tin ku disidí si lo bo buska pa sa ta ken ta bo mayornan biológiko, i esei no ta un desishon fásil. Hóbennan adoptá tin hopi sintimentu miksto riba e asuntu. Tin ta anhelá pa haña nan mayornan biológiko; otronan ta determiná pa no hasi esei. Sin embargo, bo por tin sigur ku hopi hóben adoptá a haña kontakto ku nan mayornan biológiko sin pèrdè e relashon stabil ku nan tabatin ku nan mayornan ku a adoptá nan.

Buska konseho serka bo mayornan di kriansa i kisas serka amigu- òf amiganan maduro ku tin den e kongregashon kristian. (Proverbionan 15:22) Evaluá bo opshonnan kuidadosamente, i tuma bo tempu pa pensa e asuntu bon promé ku bo kuminsá aktua. Manera Proverbionan 14:15 ta bisa: “E hòmber prudente ta wak bon unda e ta bai.”

Si bo disidí ku bo ke purba haña kontakto ku bo mayornan natural, hasi esfuerso pa sigurá bo mayornan di kriansa ku lo bo sigui stima nan i respetá nan. Di e manera ei, segun ku pokopoko bo ta siña konosé bo mayornan biológiko ku a kousa bo nasementu i a entregá bo hopi tempu pasá pa ser adoptá, tòg lo bo sigui mantené e banchi stabil ku e mayornan ku a kriá bo i entrená bo.

Fortalesé Bo Relashon ku Bo Tata Selestial

Hopi hóben adoptá ta lucha ku e miedu di ser bandoná. Nan ta preokupá ku kisas nan lo pèrdè nan famia di kriansa meskos ku nan a pèrdè nan famia biológiko. E miedu ei ta komprendibel. Pero ta bon pa kòrda e palabranan sabí aki: “Amor no konosé miedu; ma amor perfekto ta kore ku miedu.” (1 Juan 4:18) No laga e miedu insaludabel di pèrdè bo sernan kerí dominá bo. Mas bien, desaroyá amor pa otro hende, inkluso pa tur hende di bo famia di kas. Pero mas ku tur kos, desaroyá amor pa bo Tata selestial Yehova Dios. E ta perfektamente konfiabel, i nunka ta bandoná su yunan fiel. E por kalma bo miedu.—Filipensenan 4:6, 7.

Catrina, ku tabata un yu adoptá, ta bisa ku lesamentu di Beibel a yud’é masha hopi pa hala mas serka Dios i hiba un bida felis i produktivo. E ta bisa ku un relashon será ku Yehova “ta masha importante pasobra nos Tata selestial sa kon nos ta sinti.” Catrina su teksto faborito ta Salmo 27:10, ku ta bisa: “Maske mi tata i mi mama bandoná mi, SEÑOR lo rekohé mi.”

[Nota]

[Plachi na página 20]

Buska maneranan pa bira mas será ku bo mayornan ku a adoptá bo