Norma i Balor Ta Bayendo Atras?

ENTRE e regalonan di mas grandi ku mayornan por duna nan yunan ta amor inkondishonal, i un sèt di norma i balor ku e mayornan no solamente ta prediká na nan yunan sino ku nan mes ta kumpli kuné tambe.

Sin e debido norma- i balornan, bida ta simplemente un lucha pisá pa sobrebibensia. Norma i balor ta duna bida propósito. Nan ta establesé kiko ta prioridat. Nan ta fiha límitenan moral i ta definí e reglanan di komportashon.

Sin embargo, hopi norma i balor tradishonal ta kambiando rápidamente. Por ehèmpel, Profèser Ronald Inglehart ta bisa ku “sosiedat ta bayendo den direkshon di normanan seksual ku ta duna kada hende mas libertat pa satisfasé nan mes seksualmente i ekspresá nan mes.” Un enkuesta ku Gallup a hasi den 16 pais na 1997 tabata puntra e habitantenan kiko nan ta pensa di e moralidat ku ta permití hende haña yu sin kasa. Segun Gallup: “E kantidat di hende ku ta aseptá e estilo di bida moderno aki ta varia di 90% òf mas den partinan di Wèst Europa te na bou di 15% na Singapur i India.”

Tin hende ku a elogiá e libertat seksual nobo aki. Sin embargo, e foyeto The Rise of Government and the Decline of Morality (E Subida di Gobièrnu i e Kaida di Moralidat), di James A. Dorn, ta menshoná “e gran kantidat di yu ku ta nase pafó di matrimonio” i “e kibramentu di famia” komo “señalnan bisto di dekadensia moral.”

Algun Norma i Balor Mas Ku Ta Deteriorá

Tin mas norma i balor tradishonal ku tambe a bai hopi atras. E Enkuesta Mundial di Norma i Balor, enkabesá pa Profèser Inglehart, ta informá ku tin “ménos rèspèt pa outoridat” den paisnan industrialisá.

Un otro norma tradishonal tabata un kompromiso fuerte ku trabou. Sin embargo, tin evidensia ku esei tambe ta bayendo atras. Na Merka, e Federashon Nashonal di Negoshinan Independiente a hasi un enkuesta bou di mas ku mei mion doño di trabou. “Trintiun porshento di esnan ku nan a entrevistá a bisa ku tabata difísil pa haña hende pa kuponan di trabou ku tin habrí, i 21 porshento a bisa ku en general e kalidat di trabou tabata inferior.” Un doño di trabou a bisa: “Ta birando mas i mas duru pa haña trahadó ku ta bin trabou pa mas ku un dia, ku ta yega na tempu i ku no ta burachi.”

 Kondishonnan ekonómiko kisas ta fomentá e mal direkshon ku esaki ta bai. Segun ku ganashinan ta baha, doñonan di trabou ta manda hende kas òf ta kita sierto benefisionan. Segun e revista Ethics & Behavior: “Trahadónan ku eksperensiá e falta di lealtat i kompromiso aki ta kuminsá desplegá e mesun tipo di komportashon negativo pa ku nan doño di trabou. E kompromiso pa traha duru no t’ei, pasobra un dia pa otro e trahadó por pèrdè su trabou.”

Un tereno mas kaminda norma i balor a bai atras remarkablemente ta komportashon sosial i kortesia. Un enkuesta na Oustralia a konkluí: “Mas ku 87,7% di trahadó a informá [ku] mal manera den ofisina ta kibrando e moral di e personal.” Den un enkuesta merikano di profeshonalnan di negoshi, “ochenta porshento di esnan ku nan a entrevistá a raportá un oumento di mal manera den negoshi.” Segun e agensia di notisia CNN, “mal servisio na kliente a bira asina ekstenso ku kasi mitar di esnan ku nan a entrevistá a bisa ku nan a sali bai for di un pakus durante e último aña pa motibu di esei. Mitar di nan a bisa ku hopi bes nan ta mira hende papia masha duru i na un manera iritante na telefòn selular. I seis shofùr di kada 10 a bisa ku regularmente nan ta mira otro hende ta kore outo na un manera agresivo òf deskabeyá.”

Kon Balioso Bida Humano Ta?

Den algun kaso, hende ta bisa ku nan ta sigui sierto “normanan,” pero no ta semper nan ta praktiká loke nan ta bisa. Por ehèmpel, e Instituto pa Étika Mundial a entrevistá representantenan di 40 pais. Kuarenta porshento a skohe “rèspèt pa bida” entre e sinku normanan di “mas importante.” *

Sin embargo, kiko ta pasa den práktika? Nashonnan industrialisá sigur tin e rekursonan pa eliminá hopi sufrimentu humano. Pero un buki skirbí dor di Carol Bellamy, direktor ehekutivo di UNICEF (Fondo di Nashonnan Uní pa  Mucha), a remarká na 1998 ku mal nutrishon a “hunga un ròl den mas ku mitar di e kasi 12 mion mortonan pa aña di muchanan bou di sinku aña den paisnan den desaroyo; un proporshon sin igual for di tempu ku e epidemia di Morto Pretu a destrosá Europa den siglo 14.” Informenan asina ta alarmante pa ken ku ta stima bida humano. “Sin embargo,” Bellamy ta remarká, “e krísis mundial di mal nutrishon no a provoká kasi niun tiki preokupashon públiko, apesar ku tin mas i mas evidensia sientífiko supstansial di e peliger. Públiko ta duna mas atenshon na e movementunan riba merkado di bolsa i balor ku na e inmenso potensial destruktivo di mal nutrishon, òf na e tremendo benefisionan di bon nutrishon.”

Ta bisto ku den e komunidat médiko tin un punto di bista remarkablemente trosí di bida. Te ku prinsipio di dékada di 1970, un beibi ku nase despues di solamente 23 siman den matris no tabatin kasi niun chèns di sobrebibí. Awe, podisé te ku 40 porshento di beibinan prematuro asina por sobrebibí. En bista di esaki, ta un gran ironia ku segun kalkulo, mundialmente entre 40 pa 60 mion aborto ta tuma lugá tur aña! Mayoria di e abortonan aki ta di beibi ku ta djis un par di siman mas yòn ku esnan prematuro ku dòkternan ta bringa pa skapa! Esaki no ta indiká ku ta eksistí un gran konfushon moral?

Loke Hende Tin Mester: Un Kompas Moral

Ora a puntra nan: “Kiko ta ménos importante den bida?,” mayoria di esnan ku e organisashon di Gallup a entrevistá a skohe “ser fiel na mi religion” komo un di e dos kosnan ménos importante. P’esei no ta un sorpresa ku baimentu di misa ta sigui mengua. Profèser Inglehart ta indiká ku posiblemente e prosperidat di paisnan oksidental a “produsí un sintimentu di siguridat sin presedente” i ku “esaki a redusí e nesesidat tradishonal ku hende tabatin di religion pa fortalesé nan konfiansa.”

Ménos konfiansa den religion organisá ta ser kompañá pa un pèrdida di konfiansa den Beibel. Den un enkuesta internashonal, nan a puntra e hendenan riba ken òf kiko nan ta dependé pa haña sa loke ta moralmente korekto. E gran mayoria a menshoná eksperensia personal. E rapòrt di e informe ta bisa: “E palabra di Dios a keda na di dos lugá, pero hopi mas abou.”

Nada straño anto ku norma i balor ta kambia, pero pa bira pió! E falta di un kompas moral, huntu ku e kresiente énfasis riba metanan materialista i individualismo egoista, a fomentá un kultura di golosidat i indiferensia pa ku sintimentu di otro hende. Kiko ta e kosnan importante ku hende a pèrdè debí na e kambionan aki?

[Nota]

[Plachinan na página 5]

Famia kibrá, mal étika di trabou i komportashon rebelde ta evidensia di e norma- i balornan ku a bai atras

[Plachi na página 6]

Miónes di beibi, djis un par di siman mas yòn ku esun prematuro aki, ta ser abortá tur aña