Un Biahe Espektakular Riba Ruta 1

DI E KORESPONSAL DI SPIÈRTA! NA NORWEGA

TUR anochi, durante henter aña, un barku ta sali for di e stat Bergen, na kosta sùitwèst di Norwega, i ta kohe kabes pa nort riba un biahe di 11 dia i di mas o ménos 4.500 kilometer. E barku ta pasa banda di míles di isla i dor di masha hopi bahia i fjord (pasashi meimei di barankanan steil) segun ku e ta bishitá e statnan i pueblitonan a lo largu di e bunita kosta salbahe di Norwega.

Ounke hopi hende ta konsiderá e ruta di laman di e kompania Coastal Express di Norwega komo e biahe di mas bunita na mundu, Coastal Express tin un papel práktiko: transportá merkansia, pòst i pasahero te na e último parada na e haf di Kirkenes, kasi pa yega Polo Norte.

Kon barku ta logra nabegá e lamannan polar ei, spesialmente den wenter ora ku eis ta stroba barkunan di yega na gran parti di e region polar? Kaminda Norwega ta situá ta pone ku e ta kai bou di influensia di e awanan kayente di e Koriente Nort Atlántiko i di bientunan suave for di wèst. E dos kosnan aki ta hasi Norwega su klima mas moderá di loke lo bo spera asina serka di Polo Norte. Sí, kasi bo no ta haña eis na Norwega su hafnan, ni sikiera den wenter.

 Un Ruta di Laman Ta Nase

Na final di siglo 19, ora hende tabata evaluá pa konektá e pais su habitantenan kantu di kosta ku otro via karetera, trein òf laman, nan a disidí na fabor di un ruta via laman. Sin embargo e tempu ei, asta e ruta via laman a presentá problema, pasobra maske e laman no tabata fris, tabata peligroso pa nabegá anochi i den mal tempu.

Pero debí prinsipalmente na e imaginashon i determinashon di kapitan Richard With, nan a inougurá un servisio marítimo regular dia 2 di yüli 1893. Riba e dia ei, e promé barku di Coastal Express a sali for di Trondheim ku komo último parada Hammerfest, e stat mas nort di Europa. Apesar di pronóstikonan negativo, e servisio a resultá un éksito. De echo, despues nan a ekspand’é i tabata bishitá 34 haf for di Bergen te na Kirkenes, ku te awe ta e último parada. Podisé e indikashon di mas grandi di e éksito—i importansia—di e ruta marítimo aki ta ser reflehá den e nòmber inofisial ku hende ku ta biba a lo largu di kosta a dun’é: Ruta 1.

Awendia, tin un flota di 11 barku moderno ta nabegá Ruta 1, i kada 24 ora un di nan ta sali. Pero komo ku awor tin un ret muchu mas mihó di karetera i trein ta konektá hopi di e pueblonan kantu di kosta, e funshon di Coastal Express a bira mas un funshon turístiko, lokual bo ta ripará tambe na e diseño di e barkunan.

Un Panorama Ku Ta Kambia Gradualmente

E barkunan ta nabegá un ruta ku ta hiba nan prinsipalmente dor di lamannan trankil. Pues, e pasaheronan ta haña chèns di disfrutá 11 dia largu di algun di e paisahenan di mas bunita ku Norwega tin: pueblitonan agradabel situá meimei di sabananan bèrdè, poblashonnan di piskadó kantu di laman, glètshernan, fjòrtnan, tòpnan di seru kubrí ku sneu, barankanan haltu kaminda bo ta mira masha hopi para di laman mes, watervalnan mahestuoso i asta bayena.

Un bentaha adishonal ta ku ora e barkunan mara na un haf, e pasaheronan tin mag di baha pa bai keiru. Por ehèmpel, e pueblo Molde ta duna bo un bista magnífiko di e 87 tòpnan di seru kubrí ku sneu den e Montañanan di Romsdal. Na Ålesund i Trondheim, bishitantenan tin asta tempu pa hasi un ekskurshon kòrtiku, ku lo por inkluí un kaminata den kayanan ku kasnan ku tin un arkitektura lokal úniko. Na algun pueblo, pasaheronan ta hür outo anto bolbe subi nan barku na e siguiente haf kaminda e ta mara.

Despues di sali for di e pueblo Bodø, Coastal Express ta pasa Vest Fjord i ta kohe rumbo pa Islanan Lofoten, un archipiélago di 175 kilometer largu ku tin masha hopi tòp di seru i pueblito di piskadó agradabel. Algun di e islanan mas eksterior di Lofoten ta simplemente ref, islanan chikí di baranka i klep ku ta sali diripiente for di laman; den algun kaso tin faro òf bui ta indiká unda nan ta. Tambe e archipiélago aki tin algun di e kolonianan di mas grandi na mundu di para di laman. Entre e paranan tin vários tipo di meuchi i bubi, patu di eider, papegaaiduiker, zeekoet, deklá, meuchi Atlántiko di tres tenchi, alk boka skèrpi i de bes en kuando bo ta haña stormvogels. Tin vários mion para.

Tur wenter e laman alrededor di Lofoten ta yena ku aktividat ora ku botonan di piskadó ta sali pa bai kohe skrei, un tipo di bakiou. E área aki ta konosí tambe pa bayena. Pasaheronan ta keda enkantá ora nan mira e mamíferonan gigante aki dal salto i spùit awa no muchu leu for di e barku!

Den zomer, Coastal Express ta desviá pasa dor di Troll Fjord. E entrada di e fjord aki ta asina smal i steil ku bo ta sinti komo si fuera bo por rèk over di rant di e barku i mishi ku e barankanan na banda. Akinan e hòmber na timon no ta tribi pita, pa e no okashoná un skùifmentu di baranka! E sekshon aki di kosta ku den background su tòpnan di seru kubrí ku sneu, ta e soño di un sakadó di potrèt!

Despues di hasi parada na vários otro stat i pueblo di piskadó, e barkunan ta kohe rumbo pa ost, bayendo den direkshon di un sekshon di kosta ku pa hopi hende ta e kulminashon di e biahe. Por ehèmpel, for di e haf di Honningsvåg pasaheronan por tuma un ekskurshon pa bai  Kaap Nort, kaminda tin klepnan di alrededor di 300 meter haltu ku ta sali kasi vertikal for di Oséano Polar, lokual ta forma un paisahe espektakular.

Coastal Express ta mara na Kirkenes, su parada di mas nort, pa solamente un par di ora promé ku nan kuminsá ku e biahe di regreso pa Bergen. E biahe di regreso pa sùit ta duna e pasaheronan un chèns di disfrutá di e paisahenan ku kisas nan a pèrdè ora nan tabata na soño riba e biahe bayendo nort. Por ehèmpel, na e Sírkulo Polar bo por mira e imponente kapa di eis Svartisen, ku ta abarká mas o ménos 370 kilometer kuadrá. Despues e barkunan ta pasa banda di e bunita kareda di seru ku yama e Shete Ruman Muhénan i banda di Torghatten, un seru kòrtiku pero rondó ku un tùnel natural ku ta pasa duars dor di dje, di manera ku e ta parse un sombré ku un buraku den e parti ariba. Entre e stat Måløy i Florø, e barkunan ta pasa Hornelen, un seru di 860 meter haltu ku ta sali asina steil for di laman ku akinan tambe esun na timon no ta pita pa e no kousa un skùifmentu di baranka.

Solo di Meianochi i Anochi Polar

Turistanan ku biaha den zomer por keda ku lus di dia sin interupshon durante kasi henter e biahe. De echo, gran parti di Ruta 1 ta den “e pais di solo di meianochi,” nort di e Sírkulo Polar. Einan solo ta bria henter anochi den zomer. Por ehèmpel na Kaap Nort, pa kasi 12 siman solo no ta baha!

 Hende ku ta biaha den wenter ta eksperensiá nèt lo kontrario: un anochi polar largu. Pero wenter tin su propio beyesa ora ku shelu, oséano, serunan i sneu ta keda kubrí ku e kolónan suave di ora ta sukurito, ya ku solo ta yega serka di horizonte pero no ta sali. Ademas, e shelu di wenter ta forma e fondo perfekto pa un di e shownan di mas grandioso ku tur: e famoso aurora borealis, òf lusnan di nort. Bientu ku ta bini di solo i ku ta kontené partíkulanan kargá ku koriente ta drenta den e atmósfera di e region di polo, i esei ta pone ku bo ta haña lus ta kuminsá baila den shelu. Lusnan bèrdè i hel ku bèrdè, tin biaha tambe ku tononan di kòrá, ta move dor di shelu yen di strea den formanan impreshonante di strepi i kortina ku ta bola, sende-paga i subi-baha riba nan propio ritmo kósmiko.

Klaru ku bo no mester ta riba un barku di Coastal Express pa bo disfrutá di hopi di e esenanan magnífiko aki. Debí ku awor nan tin un ret di karetera i di trein hopi mas ekstenso, bo por disfrutá di gran parti di Norwega mirando dor di bentana di outo òf di trein. Pa personanan ku tin un presupuesto limitá, e medionan aki di transporte kisas ta hopi mas ekonómiko. No opstante, sea kual sea e ruta ku bo skohe, un kos ta sigur: nunka lo bo no fada di e paisahenan bo dilanti ku ta kambia kada kilometer ku pasa i kada temporada di aña a lo largu di e kosta espektakular di Norwega.

[Mapa na página 13]

(Pa e teksto den su formato kompleto, wak e publikashon)

FINLANDIA

SUESIA

NORWEGA

OSLO

Ruta via laman

▿ ▵ Bergen

▿ ▵ Florø

▿ ▵ Måløy

▿ ▵ Ålesund

▿ ▵ Molde

▿ ▵ Trondheim

SÍRKULO POLAR

Monumento na Sírkulo Polar

▿ ▵ Bodø

▿ ▵ Islanan Lofoten

Troll Fjord

▿ ▵ Tromsø

▿ ▵ Hammerfest

▿ ▵ Honningsvåg

▿ ▵ Kirkenes

[Rekonosementu]

Basá riba mapa: Hurtigruten

 [Plachi na página 15]

Den Troll Fjord, rondoná pa tòp di seru

[Rekonosementu]

TO-FOTO AS, Harstad

[Plachinan na página 15]

Tin hopi para di laman ta biba riba Islanan Lofoten, entre nan, meuchi, zeekoet i papegaaiduiker

[Plachi na página 16]

Ruta 1 ta kuminsá na Bergen

[Plachi na página 16]

Monumento na Sírkulo Polar

[Plachi na página 16]

Solo di meianochi

[Rekonosementu]

TO-FOTO AS, Harstad

[Plachi na página 16, 17]

E Shete Ruman Muhénan

[Rekonosementu]

Per Eide

[Plachi na página 17]

Pueblito kantu di kosta den skuridat di wenter

[Plachi na página 17]

Aurora borealis, lusnan di nort

[Rekonosementu]

© TO-FOTO AS, Harstad

[Plachi na página 17]

Biahe ta terminá na Kirkenes

[Rekonosementu]

Hallgeir Henriksen

[Rekonosementu pa Potrèt na página 13]

Nancy Bundt