Un Gobièrnu Ku Ta Sostené Dios Su Norma- i Balornan

IMAGINÁ un mundu ku un solo gobièrnu pa hende di tur rasa i idioma. Imaginá un gobièrnu konosí pa e echo ku e ta protehá e norma- i balornan di mas elevá i ku a eliminá guera, odio, krímen, pobresa, polushon, malesa i asta morto!

 ‘Fantástiko, pero imposibel,’ ta bo reakshon kisas. Nò, e no ta imposibel. De echo, e ta bini sigur. Hesukristu a primintí un gobièrnu asina. El a siña su siguidónan pidi p’e den orashon: “Pues, hasi orashon anto asin’aki: ‘Nos Tata ku ta den shelu, bo nòmber sea santifiká. Ku bo reino bin. Ku bo boluntat sosodé na tera meskos ku den shelu.’”—Mateo 6:9, 10.

Kisas bo tambe sa e palabranan di e orashon ei pasobra miónes di hende rònt mundu konos’é òf a tende di dje. Pero bo a yega di analisá kiko e palabranan ei en realidat ta enserá? Tuma nota ku e Reino ta ligá ku e echo ku Dios su boluntat ta sosodé na tera. Kiko e Reino di Dios ta anto? I kiko ta Dios su boluntat pa nos tera?

Loke e Reino di Dios Ta

Un di e definishonnan di un reino ta un gobièrnu enkabesá pa un rei. E Reino di Dios ta e medio ku Yehova Dios ta usa pa ehersé su outoridat supremo den universo. E ta un reinado enkabesá pa su Yu, Hesukristu. Pa loke ta Dios su boluntat pa e tera, e ta ser ekspresá na un manera kla i simpel na Salmo 37:10 i 11: “Aki poko tempu e malbado lo no t’ei mas; maske kuantu bo buska su lugá, e lo no t’ei. Ma e humildenan lo heredá e tera, i lo deleitá nan mes den pas abundante.”

P’esei, no desesperá pa motibu di e dekadensia den norma i balor di e mundu aki, ma kobra ánimo. Beibel ta primintí ku pronto e kondishonnan di mundu i su norma- i balornan lo pasa den un kambio drástiko. E promesa ku e Reino di Dios denter di poko lo reina riba tera pa pone na vigor e norma- i balornan di Dios, ta un garantia ku ta duna nos speransa.

Nos por oumentá nos sentido di siguridat dor di siña konfia den Dios su promesanan di Reino. Pensa riba e normanan konektá ku e gobernashon di e Reino ei: “Bin, mira e obranan di SEÑOR, kende a hasi desolashonnan riba tera. E ta hasi gueranan stòp te na e fin di tera.” (Salmo 46:8, 9) Ki un maravioso promesa di pas i siguridat!

Den un profesia relashoná ku e Rei di e Reino di Dios, Hesukristu, Salmo 72:12-14 ta bisa: “E lo libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é. E lo tin kompashon di e pober i di esun den nesesidat, i e lo salba bida di esnan den nesesidat. E lo reskatá nan bida for di opreshon i violensia; i nan sanger lo ta presioso den su bista.”

Norma- i Balornan Bíbliko

Konsiderá algun di e norma- i balornan ku Beibel ta promové: “Felis ta esnan ku ta konsiente di nan nesesidat spiritual.” (Mateo 5:3, NW) Un otro: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.”—Proverbionan 3:5, 6.

Tambe Beibel ta indiká ku nos tur tin ku rindi kuenta pa e normanan ku nos ta skohe pa sigui den bida. Wak Eklesiastés 11:9: “Regosihá, hóben, durante di bo hubentut, i laga bo kurason tin plaser durante di e dianan di bo adolesensia. I sigui e kamindanan di bo kurason i e deseonan di bo wowo. Ma sabi sí ku Dios lo husga bo pa tur e kosnan aki.” Proverbionan 2:21 i 22 ta deklará bon kla ku nos tin ku duna kuenta di nos akshonnan: “E rektonan lo biba den e tera, i e perfektonan lo keda den dje; ma e malbadonan lo wòrdu kòrtá kitá for di tera, i e traidónan lo wòrdu ranká for di dje ku rais ku tur.”

Siendo ku nos tin e speransa alentador aki ku lo bin un gobièrnu hustu, ta masha probechoso pa nos desaroyá un amistat íntimo ku Dios! Asosiashon ku otro hende ku tambe ta deseá di ta siudadano di e Reino di Dios lo yuda nos biba di tal manera ku nos por eksperensiá e gobernashon di su Reino glorioso i e efektonan di e norma- i balornan maravioso ku e Reino ei lo promové.

[Plachi na página 10]

E humildenan lo “heredá e tera” i “deleitá nan mes den pas abundante.”—SALMO 37:11.