Dikon Tin Asina Tantu Krímen Violento Awe?

TUR krímen ta malu. Pero krímennan sin sentido ta mas difísil pa komprondé. E echo ku hopi bes no tin un motibu kla pakiko hende ta kometé nan, ta konfundí investigadónan. Den último añanan medionan di komunikashon a bira hopi mas efikas, i esei ta pone ku miónes òf asta míles di miónes di hende ta haña sa di e krímennan spantoso ei denter di algun ora. Un rapòrt publiká dor di Organisashon Mundial di Salú ta deklará ku “violensia ta afektá tur kontinente, tur pais i mayoria komunidat.”

Asta lugánan ku tabata ser konsiderá relativamente safe den pasado, a mira mas kaso di aktonan di violensia sin sentido den último tempu. Por ehèmpel, pa hopi tempu Hapon tabatin un porsentahe abou di krímen violento. Sin embargo, na e stat Ikeda, na yüni 2001, un hòmber a kana drenta den un skol ku un kuchú grandi i a kuminsá hinka i kòrta e muchanan pa loko. Den 15 minüt el a mata 8 mucha i a heridá 15. Si agregá esaki na otro informenan for di Hapon, manera esun di hóbennan ku ta mata hende totalmente deskonosí djis pa nan sinti un kick, anto bo ta realisá mesora ku kos a kambia einan.

Asta den paisnan kaminda semper tabatin hopi kriminalidat, sierto aktonan sin sentido a repugná e públiko en general. Esaki tabata e kaso despues di e atentado di 11 di sèptèmber 2001 kontra World Trade Center na New York. Sikólogo Gerard Bailes a komentá lo siguiente: “Esaki ta kombertí mundu den un lugá totalmente deskonosí i peligroso den kua nos no por predisí kiko ta bai pasa.”

Dikon Nan Ta Hasié?

No tin un solo faktor ku ta splika tur e vários kasonan di violensia sin sentido. Loke ta hasi algun krímen mas difísil pa komprondé ta e echo ku nan no ta lógiko. Por ehèmpel, ta difísil pa komprondé pakiko un persona lo kana bai riba hende totalmente deskonosí p’e i hinka nan mata, òf pakiko un hende lo pasa ku outo banda di un kas i kuminsá tira pa loko.

Tin hende ta pretendé ku violensia ta algu natural den hende. Na otro banda, otronan ta argumentá ku bo no por bisa ku krímennan sin sentido ta un parti inevitabel di naturalesa humano.—Wak e kuadro “Destiná na Violensia?”

Hopi eksperto ta kere ku tin un kantidat di faktor i sirkunstansia ku ta funshoná komo  katalisador ku ta pone hende kometé aktonan violento sin sentido. Un rapòrt publiká dor di Akademia di FBI (Federal Bureau of Investigation) na Merka ta bai asina leu di bisa: “Asesinato no ta un akto di un hende na tinu i ku mente sano.” Algun outoridat lo no ta di akuerdo ku e palabranan di e deklarashon ei. No opstante, hopi di nan ta di akuerdo sí ku loke e ta sugerí. Pa un òf otro motibu e manera di pensa di esnan ku ta kometé krímen sin sentido no ta normal. Algu a afektá nan manera di rasoná te na e punto ku nan ta hasi lo inimaginabel. Kua ta e faktornan ku ta motivá hende pa hasi e kosnan ei? Laga nos konsiderá vários posibilidat ku ekspertonan a menshoná.

Bida di Famia Kibrá

Spièrta! a puntra Marianito Panganiban, un bosero di e Departamento Nashonal di Investigashon na Filipina, kiko ta e background di esnan ku ta kometé krímennan ekstremo. El a bisa: “Nan ta bini di famianan kibrá. Nan falta kuido i amor. Hende su karakter moral ta bayendo atras debí ku nan no ta haña guia, anto asina nan ta bai den mal kaminda.” Hopi investigadó ta indiká ku ta komun pa kriminalnan agresivo bini di famianan den kua miembronan no tin un bon relashon ku otro i di famianan ku tin un historial di violensia den famia.

E Sentro Nashonal Merikano pa Análisis di Krímen Violento a saka un rapòrt ku a menshoná e faktornan ku lo por a identifiká hóbennan ku kisas lo kometé violensia mortal na skol. E rapòrt a menshoná entre otro e siguiente faktornan ku tin di haber ku bida di famia: un relashon turbulento entre mayor i yu, mayornan ku no por rekonosé problema den nan yunan, un falta di intimidat, mayornan ku ta pone masha tiki límite òf niun límite mes pa e mucha su komportashon, i muchanan ku ta ekstremadamente será den nan mes, hibando un bida dòbel i ta skonde un parti di nan bida for di nan mayornan.

Awe hopi mucha ta víktima di famia ku ta habri for di otro. Otronan tin mayornan ku tin masha tiki tempu pa nan. Míles di hóben a lanta sin haña e debido guia moral òf di nan famia. Tin eksperto ta di opinion ku un ambiente asina ta stroba muchanan desaroyá e kapasidat di por sera un banchi emoshonal ku otro hende, i p’esei ta bira mas fásil pa nan kometé krímen kontra nan próhimo, i hopi bes sin sinti remordimentu.

Gruponan Motivá pa Odio i Kultonan

Evidensia ta indiká ku algun kulto òf grupo ekstremista motivá pa odio tabatin un gran influensia riba sierto krímennan ku a ser kometé. Na Indiana, Merka, un mucha hòmber koló skur di 19 aña tabata kana bai kas despues di a  sali un sentro komersial. Un ratu despues, e tabata morto bentá abou riba asera ku un bala den su kabes. Un mucha hòmber yòn—ku a skoh’é pa kasualidat—a tir’é mata. Dikon? Di e manera ei e asesino supuestamente kier a kualifiká p’e bira miembro di un organisashon rasista ku ta kere den superioridat di hende blanku, i pa e por a haña un tatuahe forma di kas di araña pasobra el a mata un persona koló skur.

E atentado na 1995 ku gas di nèrvio den un metro di Tokio; e suisidio masal na Jonestown, Guyana; i e mortonan na Suisa, Canada i Fransia di 69 miembro di e Órden di e Tèmpel Solar, tur a tuma lugá pasobra hende a ser influensiá dor di un kulto. E ehèmpelnan aki ta ilustrá e influensia poderoso ku sierto gruponan tabatin riba e manera di pensa di algun hende. Lidernan ku tin karisma a logra pone hende hasi kosnan “inimaginabel” dor di atraé nan ku un òf otro supuesto benefisio.

Medionan di Komunikashon i Violensia

Tin hende ta mustra riba pruebanan ku ta indiká ku vários medio di komunikashon moderno por ta stimulá komportashon agresivo. Nan ta bisa ku ora hende regularmente ta wak violensia na televishon, den pelíkula, den video game i riba Internet esei ta pone nan konsenshi pèrdè heful i ta inspirá nan pa kometé krímennan violento. Dr. Daniel Borenstein, presidente di e Asosiashon Sikiátriko Merikano, a deklará: “Na e momentu aki tin mas ku 1.000 estudio basá riba mas ku 30 aña di investigashon ku ta demostrá un relashon basá riba kousa i efekto entre violensia den medionan di komunikashon i komportashon agresivo serka algun mucha.” Dilanti di un komishon di Senado merikano, Dr. Borenstein a testifiká: “Nos ta konvensí ku wakmentu regular di violensia den tur forma di entretenimentu tin implikashonnan serio pa salubridat públiko.”—Wak e kuadro “Un Dòkter Su Opinion di Violensia den Wega di Kòmpiuter.”

Hopi bes ekspertonan ta sita kasonan spesífiko pa mustra ku esaki ta bèrdat. Den kaso di e pistolero enbolbí den e asesinato ku sanger friu di un pareha ku tabata wak solo sali kantu di laman (menshoná den e artíkulo anterior), fiskal a presentá prueba ku e asesinato pa kick a ser inspirá dor di un pelíkula violento ku e pistolero a wak bes tras bes. Relashoná ku un tiroteo na skol kaminda 15 hende a ser matá, nan ta  bisa ku e dos studiantenan ku a kometé e krímen tabata pasa hopi ora tur dia ta hunga video game violento. Ademas, regularmente nan tabata wak pelíkulanan ku tabata glorifiká violensia i matamentu.

Droga

Na Merka, e porsentahe di asesinato kometé dor di teenager a bira tripel durante un periodo di ocho aña. Kiko outoridatnan ta señalá komo un faktor? Gèngnan, foral gèngnan enbolbí ku ‘crack’ di kokaina. Di mas ku 500 asesinato resien na Los Angeles, California, “polis ta bisa ku 75 porshento tabata konektá ku gèng.”

Un rapòrt publiká dor di Akademia di FBI ta deklará lo siguiente: “Den un kantidat enorme di kasonan di asesinato tin droga enbolbí.” Algun hende kende nan mente ta mal dañá debí na uso di droga, ta mata bou di influensia di droga. Otronan ta defendé nan trafikashon di droga dor di usa violensia. Pues ta bisto ku droga ta un faktor poderoso ku ta influensiá hende pa kometé aktonan horibel.

Akseso Fásil na Armanan Destruktivo

Manera a ser menshoná den e artíkulo anterior, un solo pistolero na Tasmania, Oustralia, a mata 35 persona i heridá 19. E hòmber tabata armá ku skopètnan semioutomátiko estilo militar. Esaki a pone hopi hende konkluí ku akseso fásil na e tipo di armanan ei ta un otro faktor den e oumento di krímen violento.

Un informe ta mustra ku na 1995 tabatin solamente 32 asesinato usando arma di kandela na Hapon, i mayoria tabata trata di gèngster ku a mata otro. Na kontraste, Merka tabatin mas ku 15.000 asesinato ku arma di kandela. Dikon e diferensia? Tin hende ta menshoná e leinan estrikto ku Hapon tin relashoná ku poseshon di arma komo un motibu.

Hende Su Inabilidat di Trata ku Bida i Problema

Ora nan tende di sierto aktonan horendo, tin hende kisas ta reakshoná bisando: ‘E persona ei mester ta loko!’ Sin embargo, no ta tur persona ku ta kometé e tipo di krímennan ei  ta mentalmente perturbá. Pero hopi di nan sí tin difikultat pa trata ku situashonnan di bida. Ekspertonan ta señalá na sierto defektonan di personalidat ku lo por hiba na aktonan ekstremo. Entre nan tin lo siguiente: falta di kapasidat di siña i difikultat pa anda ku otro hende; efektonan negativo di abusu físiko òf seksual; karakterístikanan antisosial; odio pa un sierto grupo, manera pa hende muhé; falta di remordimentu ora di hasi malu; i un deseo pa manipulá otro hende.

Sea kual sea ta nan problema, tin hende ta bira asina apsorbá dor di nan difikultat ku nan manera di pensa ta kambia, i esaki por pone ku nan ta kometé aktonan straño. Un ehèmpel ta un verplegster ku tabata deseá atenshon pero di un manera apnormal. E tabata pasa muchanan chikí un angua pa relahá múskulo i esaki tabata pone nan stòp di hala rosea. Kaba e verplegster tabata gosa di e atenshon ku e ta haña ora e “salba” kada un di e muchanan. Desafortunadamente, no ta tur e por a laga hala rosea atrobe. El a ser sentensiá pa asesinato.

For di lo anterior ta bisto ku ta un kombinashon di faktor ta influensiá hende pa kometé krímen violento. Sin embargo, nos lista lo no ta kompletu si nos no konsiderá un faktor mas ku ta masha importante.

E Kontesta di Beibel

Beibel ta yuda nos komprondé kiko ta pasando awor i dikon hende ta aktua den maneranan ekstremo asina. E ta deskribí aktitutnan ku nos ta mira tur ora. Por ehèmpel, e lista ku nos ta haña na 2 Timoteo 3:3 i 4 ta bisa ku hende lo ta “sin amor” i ku nan lo ta “sin dominio propio, grosero, odiadó di loke ta bon” i “imprudente.” Den un otro buki di Beibel, Hesus a bisa: “Amor di hopi hende lo fria.”—Mateo 24:12.

Beibel ta bisa: “Den e último dianan tempunan trabahoso lo bin.” (2 Timoteo 3:1) Sí, loke nos ta mira ta prueba ku nos ta bibando na fin di e aktual sistema di kosnan. E situashon di mundu huntu ku e aktitutnan di hende ta bayendo atras. Nos por spera un solushon inmediato? Beibel ta kontestá: “Hendenan malbado i gañadónan lo bai di malu pa peor, gañando i siendo gañá.”—2 Timoteo 3:13.

Esaki ta nifiká ku humanidat ta destiná na un siklo kontinuo di violensia kruel i kriminalidat kresiente? Laga nos analisá e pregunta ei den nos siguiente artíkulo.

[Kuadro na página 6]

DESTINÁ NA VIOLENSIA?

Tin eksperto ta argumentá ku semper hende tabatin e inklinashon pa kometé violensia òf mata. Esnan ku ta kere den evolushon ta di opinion ku nos a bini di bestia salbahe i ku nos simplemente a heredá nan karakterístikanan violento. E tipo di teorianan ei ta indiká ku nos ta destiná na un siklo kontinuo di violensia for di kua nos no tin speransa di skapa.

Sin embargo, tin hopi prueba ku ta mustra lo kontrario. E teorianan menshoná ariba no ta splika dikon den diferente kultura e frekuensia i tipo di violensia ku hende ta kometé ta varia masha hopi mes. Nan no ta indiká dikon den algun kultura ta parse ku ta normal pa hende reakshoná ku violensia, miéntras ku den otro sosiedatnan tin masha tiki violensia, i kasi niun asesinato. Sikoanalista Erich Fromm a señalá algun fayo den e teoria di ku nos a heredá agresividat for di makaku dor di mustra ku ounke algun makaku ta violento debí na sierto nesesidatnan físiko òf pa protehá nan mes, hende ta e úniko kriatura ku e konosé ku ta mata djis pa puru plaser òf pa kick.

Den nan buki The Will to Kill​—⁠Making Sense of Senseless Murder (E Deseo di Mata​—⁠Buskando Sentido den Asesinato sin Sentido), profèser James Alan Fox i Jack Levin ta deklará: “Tin persona ku ta mas inkliná na violensia ku otronan, sin embargo ainda nan tin un boluntat liber. Ounke e deseo di mata ta ser kontrolá dor di vários forsa interno i eksterno, e ta sigui duna hende e posibilidat di skohe i disidí, i p’esei hende mester por duna kuenta di loke nan ta hasi i karga e kulpa di esei.”

[Kuadro/Plachi na página 7]

UN DÒKTER SU OPINION DI VIOLENSIA DEN WEGA DI KÒMPIUTER

Dr. Richard F. Corlin, eks-presidente di e Asosiashon Médiko Merikano, a duna un spich na un grupo di dòkter ku a kaba di slag na Filadelfia, Pennsylvania, Merka. Den e spich el a papia tokante wega di kòmpiuter ku ta stimulá violensia. Algun di e weganan aki ta duna bo punto pa herida ku bo okashoná, mas punto pa un tiru den kurpa, i asta mas punto ainda pa un tiru den kabes. Bo ta mira sanger ta spùit sali, i sesu ta plama for di otro i ta spat tur riba pantaya.

Dr. Corlin a komentá ku muchanan no tin mag di kore outo, ni bebe bebida alkohóliko ni huma ora nan ta muchu yòn. Kaba el a bisa: “Pero sí nos ta laga nan train pa bira pistolero na un edat ora ku ainda nan no a siña kontrolá nan impulsonan ni nan no tin e madures i disiplina nesesario pa usa e armanan ku nan ta hunga kuné na un manera safe. . . . Nos tin ku siña nos yunan for di prinsipio ku semper violensia tin konsekuensia, anto konsekuensia serio.”

Lamentablemente, en bes di siña ku krímen tin konsekuensia, hopi bes mucha ta bira e víktima inosente di krímen violento. Estadístika ta mustra ku arma di kandela ta mata dies mucha pa dia na Merka. Dr. Corlin a bisa: “Merka tin e porsentahe mas haltu na mundu di mucha ku ta muri dor di arma di kandela.” Su konklushon? “Violensia ku arma di kandela ta un menasa pa e salubridat públiko di nos pais. Esaki ta un echo.”

[Kuadro na página 9]

FAKTORNAN KU TA KONTRIBUÍ NA KRÍMEN VIOLENTO

Hopi eksperto ta di opinion ku e siguiente kosnan por kontribuí na krímen sin sentido:

Famia kibrá

Gruponan motivá pa odio, ekstremistanan

Kultonan peligroso

Violensia den entretenimentu

Kontakto ku violensia di bèrdat

Uso di droga

Inabilidat pa trata ku problema

Akseso fásil na arma destruktivo

Sierto tipo di malesa mental

[Plachi na página 8]

Un di e sinku atentadonan ku bòm ku a mata por lo ménos 12 persona i herida 80, Quezon City, Filipina

[Rekonosementu]

AP Photo/Aaron Favila 30 di Desèmber 2000

[Plachi na página 8]

Dos studiante ta mata un dosente, 12 studiante i nan mes na Columbine High School, Colorado, Merka

[Rekonosementu]

AP Photo/Jefferson County Sheriff’s Department 20 di Aprel 1999

[Plachi na página 8, 9]

Un outobòm ta mata por lo ménos 182 persona i heridá 132 na un klup nokturno na Bali, Indonesia

[Rekonosementu]

Maldonado Roberto/GAMMA 12 di Òktober 2002