E Punto di Bista Bíbliko

Hipnotismo Ta pa Kristiannan?

“No mester ta hañá den bo ningun hende ku . . . ta mara otronan ku un maldishon.”—DEUTERONOMIO 18:10, 11, NW.

HIPNOTISMO ta tópiko di hopi debate i kontroversia. * Asta ekspertonan riba e tereno ei ta haña ku ta difísil pa splik’é. Por lo general hende ta komprondé ku hipnósis ta manera un trans, un estado konsiente pero diferente for di normal. Sin embargo, mayoria hende ta mas interesá den kiko hipnotismo por hasi ku den kiko e ta.

Den último añanan a bira normal ku dòkternan den algun pais ta rekomendá hipnotismo komo tratamentu. Por ehèmpel, e revista Psychology Today ta deklará: “Hipnoterapia por trata doló di kabes, suavisá doló di parto, yuda bo stòp di huma, remplasá anestesia i mehorá kustumbernan di siña; i tur esei sin efektonan sekundario.” Di otro banda, hopi hende ta asosiá hipnotismo ku spiritismo i asuntunan sobrenatural.

Kiko ta e punto di bista bíbliko? Bon, Beibel mes no ta un manual di salú, i e no ta hasi ningun menshon direkto di hipnotismo. Pero e prinsipionan ku tin den e Palabra di Dios por yuda nos determiná Dios su punto di bista.

Tin un Konekshon Entre Hipnotismo i Asuntunan Sobrenatural?

E idea ku hipnotismo ta konektá ku asuntunan sobrenatural ta simplemente e invento di un hende su imaginashon? Kuentanan di fantasia den pelíkula i buki kisas a fomentá e idea, pero  en bèrdat ta eksistí un konekshon entre hipnotismo i spiritismo. Relashoná ku hipnotismo, e Encyclopedia of Occultism and Parapsychology ta splika: “[Hipnotismo] su historia ta masha ligá ku asuntunan sobrenatural.” Kai den trans religioso, un kos ku durante henter historia tabata un parti di bruheria i magia, por lo general ta ser konsiderá komo un forma di hipnósis. Tambe, e saserdotenan di Egipto i Gresia di antigwedat a kousa un tipo di hipnósis ora nan tabata purba kura malesanan den nòmber di nan diosnan falsu.

E ensiklopedia sitá ariba ta bisa: “Asta awe gran parti di e fenómenonan di hipnósis ta ser klasifiká komo ‘spiritualismo.’” Ounke ta difísil pa determiná te na ki grado vários forma di hipnotismo tin di haber ku asuntunan sobrenatural, echo ta ku Dios klaramente ta kondená tur forma di spiritismo. (Deuteronomio 18:9-12; Revelashon 21:8) Pues, kristiannan no por ignorá e aspektonan di hipnotismo ku klaramente ta bai kontra e Skritura.

Efekto Riba Komportashon

Kiko di e efekto di hipnósis riba un persona su mente i komportashon? E tin su riesgonan? Un preokupashon válido ta ku na momentu ku un persona ta hipnotisá, e tin masha tiki kontròl riba su komportashon. Hipnotisadónan ku ta duna show, ta hasi uso di e karakterístika aki pa obligá e boluntarionan hasi kosnan ku normalmente nan lo no a hasi, asta pa parse manera nan ta burachi.

The Encyclopedia Americana ta bisa tokante e shownan públiko aki di hipnotismo: “E persona hipnotisá kisas ta masha reseptivo pa asta sugerensianan indirekto. Kisas e tin akseso mas fásil na su impulsonan inkonsiente ku por lo general ta hopi mas skondí, i tal bes ora ku e ta hipnotisá e ta sinti su mes liber di tur restrikshon sosial i personal riba su komportashon.” Collier’s Encyclopedia ta deklará: “E persona hipnotisá ta eksperensiá un konsentrashon kompletu di su fakultatnan, lokual ta hasié sumamente atento na e sugerensianan di e hipnotisadó i kla pa koperá ku e sugerensianan ei.”

Esei ta zona manera algu inofensivo? Lo ta konsehabel pa un kristian berdadero laga otro hende influensiá su mente mediante sugerensianan durante un hipnósis? Esaki lo ta kontrali na apòstel Pablo su spièrtamentu: “Presentá boso kurpa komo un sakrifisio bibu, santu, aseptabel na Dios, un sirbishi sagrado ku boso fakultat di rasoná. I stòp di ser formá segun e sistema di kosnan aki, mas bien sea transformá dor di rehasí boso mente, pa boso por proba pa boso mes loke ta e bon i aseptabel i perfekto boluntat di Dios.”—Romanonan 12:1, 2, NW.

Un kristian lo por “mantené un bon konsenshi” si e permití un otro hende hink’é den un estado ku e no tin pleno kontròl riba su pensamentunan ni deseonan ni akshonnan? (1 Pedro 3:16) Beibel ta spièrta: “Kada un di boso [mester] sa kon pa tene su mes kurpa den santifikashon i onor.” (1 Tesalonisensenan 4:4) Klaramente, e práktika di hipnósis lo stroba un hende di por sigui tal konseho.

Un Speransa pa Salú Perfekto

En bista di e prinsipionan bíbliko menshoná ariba, Testigunan di Yehova ta evitá terapianan ku ta enserá hipnósis (inkluso outohipnósis). Nan ta obedesé e mandamentu na Deuteronomio 18:10 i 11 (NW): “No mester ta hañá den bo ningun hende ku . . . ta mara otronan ku un maldishon.” Pa esnan ku ta konfrontando problema di salú, tin hopi otro tratamentu ku no ta eksponé nan na e peligernan ku tin di haber ku asuntunan sobrenatural ni ta permití otro hende manipulá nan mente.

Dor di keda leu for di práktikanan ku ta kontrali na prinsipionan bíbliko, kristiannan por tin e speransa di biba pa semper den Dios su hustu mundu nobo. Na e tempu ei humanidat lo disfrutá di salú perfekto di kurpa i di mente sin tin nodi rekurí na hipnotismo.—Revelashon 21:3, 4.

[Nota]