Hóbennan Sa Puntra . . .

Kon Mi Por Trata ku Tragedia Repentino?

“Dikon e teroristanan mester a mata nèt mi mama?”—Kevin. *

“[Promé ku 11 di sèptèmber], mi tabata gusta tùnel. Awor mi ta imaginá mi ta muri den un tùnel ku nan ta laga eksplotá.”—Peter.

KEVIN su mama a ser matá den e atake di 11 di sèptèmber 2001 kontra World Trade Center na New York City. Peter no a sufri e mesun pèrdida teribel, pero tòg e susesonan ei a afekt’é masha hopi.

Un informe di notisia a bisa: “Míles di mucha ku ta biba na New York ta luchando ku problemanan mental relashoná ku [e atakenan di] 11 di sèptèmber; problemanan ku den hopi kaso lo keda te ora ku nan ta adulto.” Un kos alarmante ta ku e señalnan di trouma emoshonal tabata ‘mes tantu presente den muchanan ku no tabata ni banda di World Trade Center komo den esnan ku a mira e atakenan personalmente.’ *

E mesun problemanan mental ei por surgi relashoná ku otro tragedianan, manera eksploshonnan suisida na Israel i tiramentu pa loko na otro parti. Relashoná ku tal tiramentu, un eksperto riba e efekto di trouma a bisa: “Asta si [e muchanan] ta biba 2.000 mia leu, e susesonan aki tòg por oumentá [nan] ansiedat.”

Dikon? Pasobra ora susesonan desastroso tuma lugá, hóbennan ta haña nan ku un avalancha di notisia i reportahenan bibu i direkto. Televishon ta keda pasa bes tras bes imágennan spantoso di eksploshonnan terorista, tiramentu na skol i desasternan natural, i pa hopi hóben ta bira masha difísil pa kita e imágennan ei for di nan mente. Nada straño anto ku segun un enkuesta tené dor di e Hunta di Edukashon di New York City: “Seis luna despues ku World Trade Center a basha abou, 76 porshento di e 8.266 studiantenan di skolnan públiko ku nan a entrevistá ainda ta pensa ku frekuensia riba e atakenan terorista.”

 Nos ta biba den loke Beibel ta yama “tempunan teribel.” (2 Timoteo 3:1-5, New International Version) Kiko bo por hasi pa trata ku e situashon ora tragedianan spantoso ta tuma lugá? *

Dikon Kos Malu Ta Tuma Lugá

Un manera pa trata ku e emoshonnan ku ta kasi aplastá bo, ta dor di ‘stimulá bo fakultat di pensa kla.’ (2 Pedro 3:1, NW) Purba wak e situashon for di un punto di bista rasonabel i lógiko di akuerdo ku Dios su punto di bista. Por ehèmpel, kisas bo tin ku rekordá bo mes ku hopi tragedia ta simplemente e resultado di “tempu i suseso imprevisto.” (Eklesiastés 9:11, NW) Hesukristu a duna un ehèmpel di esaki ora el a papia di un toren na Siloam ku a basha abou. Diesocho hende a muri den e desaster lokal ei. Sin embargo, Hesus a mustra bon kla ku no ta Dios a kastigá e víktimanan, nan a muri simplemente pasobra pa nan di malu nan tabata nèt n’e lugá ei, nèt n’e momentu ei. (Lukas 13:1-5) Meditando riba e echo aki por yuda bo mira desasternan na un manera mas ophetivo.

Pensa kla tambe por evitá ku bo ta bira “razu kontra SEÑOR” i kulp’é pa e susesonan lamentabel. (Proverbionan 19:3) En bes di kousa nos pena, Yehova ta e “Dios di tur konsuelo.” (2 Korintionan 1:3) Ora tragedianan tuma lugá, nos tin ku hala bai serka dje, i no hala kita for di dje den rabia. Meditá riba e palabranan di Beibel na Santiago 1:13: “No laga ningun hende bisa ora ku e wòrdu tentá: ‘Mi ta wòrdu tentá dor di Dios’; pasobra Dios no por wòrdu tentá dor di maldat, i e mes no ta tenta ningun hende.” *

Un suseso trágiko ku a tuma lugá siglonan pasá den Medio Oriente podisé por ilustrá e punto aki. Beibel ta konta nos ku e úniko sobrebibiente di e katástrofe ei a informá: “E kandela di Dios a kai for di shelu i a kima e karnénan i e sirbidónan i a kaba ku nan.” (Jòb 1:16) Ki un kalamidat horibel! I e hòmber morto spantá aki a pensa ku ta Dios tabata responsabel pa esei. Sin embargo, no tabata Dios pasobra for di Jòb 1:7-12 nos por saka afó ku no ta Dios a manda e kandela, sino Dios su Atversario: Satanas e Diabel!

Esei tabata un situashon úniko: Yehova a duna Satanas pèrmit spesial pa e tèst Jòb su integridat. Pues anto, no konkluí ku ta Satanas ta direktamente responsabel pa desasternan natural manera tormenta i inundashon. * No opstante, Beibel ta bisa ku “henter mundu ta bou di kontròl di e malbado.” (1 Juan 5:19) P’esei e por usa agentenan humano pa kousa daño i destrukshon.

Sin embargo, nos no tin nodi sinti ku tur kos ta pèrdí. Konsiderá un otro insidente, ku ta pará skirbi den Beibel na 1 Samuel 22:12-23. Einan nos ta lesa di un grupo di saserdote fiel i nan famia ku a wòrdu masakrá kruelmente. Sin duda Satanas tambe a instigá e rei malbado Saul pa kometé e akto brutal aki. Sin embargo, fiel David, ku despues tambe a bira rei, a skirbi Salmo 52, den kua e ta ekspresá su konfiansa ku Dios lo kaba ku e hòmbernan malbado responsabel pa e kalamidat ei.—Salmo 52:5.

Asina bo tambe por tin sigur awe ku Dios lo no tolerá pa semper e aktonan di asesinato i violensia inspirá pa Diabel. Al kontrario, Beibel ta primintí ku Dios pronto lo usa su Yu Hesus pa “destruí e obranan di Diabel”! (1 Juan 3:8) Ku tempu, lo no keda niun rastro di e daño ku Satanas a kousa. Mediante un resurekshon, Dios por asta restorá bida di e personanan ku a muri den aktonan trágiko di violensia òf terorismo.—Echonan 24:15.

Maneranan Práktiko pa Trata ku Tragedia

E speransa aki basá riba Beibel por yuda bo evitá ku miedu ta dominá bo. Pero tambe tin algun paso práktiko ku bo por tuma. Por ehèmpel, tuma nota di e prinsipio bíbliko ku tin na Proverbionan 12:25. Solamente dor di kompartí bo sintimentunan ku otro hende bo por haña e “bon palabra” di animashon. Ora bo papia ku otro hende lo bo ripará ku no ta bo so ta  pasando dor di e situashon difísil ei. P’esei si bo ta sinti hopi angustia, purba ekspresá bo sintimentunan na bo mayornan òf na un ruman maduro den e kongregashon kristian. *

Un otro sugerensia: No wak demasiado reportahe bibu i detayá di susesonan trágiko den medionan di komunikashon. Si bo wak e kosnan ei, ta bira mas difísil pa bo kita imágennan spantoso for di bo mente.—Salmo 119:37.

Bo ta un kristian? Si ta asina, pega na bo rutina di aktividatnan kristian. (Filipensenan 3:16, NW) E aktividatnan ei ta entre otro, asistí na reunion huntu ku otro rumannan kristian i kompartí bo kreensianan ku otro hende. (Hebreonan 10:23-25) Esei lo yuda bo pa no keda pensa riba kosnan negativo so. Si bo isolá bo mes, esei lo perhudiká bo emoshonalmente i spiritualmente.—Proverbionan 18:1.

Un kos hopi útil den kualkier situashon di tenshon ta di sigui lesa Beibel tur dia. E mama di un hobensita ku yama Loraine tabata muriendo di kanser. Tuma nota kon Loraine a trata ku e situashon trágiko aki. El a bisa: “Mi ta kòrda ku mi a lesa e buki di Jòb vários biaha durante e periodo difísil ei. E buki di Salmonan tambe a duna mi hopi konsuelo. Segun ku mi tabata lesa e palabranan konsolador den e Skritura, mi a sinti komo si fuera Yehova tabata brasa mi.” Su ruman muhé Mishael tambe ta kòrda: “Si mi a keda sin lesa Beibel un dia, mi a sinti e efekto. Outomátikamente mi mente tabata bai bèk riba kosnan negativo. Lesa Beibel a duna mi e nutrishon spiritual ku mi tabatin mester pa pasa dor di kada dia.”

Si bo a sufri un pèrdida—foral e morto di un ser kerí—lo bo por haña gran konsuelo dor di lesa e foyeto Ora un Persona Stimá Muri. * Tuma tempu pa lesa i meditá riba tur e tekstonan ku ta ser menshoná. Meditá tambe riba e speransa di resurekshon. Loraine a konta: “Mi tabata ègt mira den mi mente kon mi mama lo bini bèk den e resurekshon. Mi tabata imaginá ku mi ta tend’é bisa: ‘Mi ta bèk. I, kiko bo a kushiná pa nos kome?’ Esei tabata pone mi smail.”

Dependé riba Yehova den orashon tambe por duna bo e fortalesa nesesario pa soportá e tragedianan di mas pió. Loraine ta kòrda: “Mi tabata banda di mi mama ora el a hala su último rosea. Mesora mi a pidi Yehova duna mi e fortalesa pa perseverá i pasa dor di esaki. Mesora mi a sinti e pas di Dios.” Sea spesífiko den bo orashonnan na Yehova. Lag’é sa kiko presis bo ta sinti. E salmista a urgi: “Drama boso kurason su dilanti.”—Salmo 62:8.

Segun ku tempu ta pasa, angustia riba tera probablemente lo oumentá. (2 Timoteo 3:13) Pero Beibel ta primintí: “Hasidónan di maldat lo wòrdu kòrtá kitá afó . . . Ma e humildenan lo heredá e tera, i lo deleitá nan mes den pas abundante.” (Salmo 37:9-11, 29) Si bo tene duru na e speransa aki, lo e por yuda bo trata ku e situashon ora ku tragedianan ta tuma lugá.

[Nota]

[Plachi na página 14]

Kisas ta sabí pa bo no wak muchu imágennan angustioso na televishon