Krímen Violento—Ta Kiko Ta Pasando?

FRANK ku Gabriella tabata kana keiru kantu di laman mainta trempan na Oregon, Merka, pa wak solo sali. Nan no tabatin e mínimo idea di loke tabata bai pasa. Un par di minüt despues, tur dos tabata morto, tirá den kabes for di un distansia kòrtiku. E motibu tabata vengansa? Òf yalusí? Niun di dos. E pistolero tabata un hòmber deskonosí ku a kumpli ku un fantasia: e kier a sa kon bo ta sinti ora bo mata un hende.

“Riba djadumingu 28 di aprel 1996 Martin Bryant a akapará atenshon di mundu oksidental miéntras ku e tabata gosa un bòl. Tirando riba tur hende ku el a topa segun ku e tabata kana dor di Port Arthur, Tasmania, el a sinti un maravioso eksitashon di alegria i poder.” (A Study of Our Decline [Un Estudio di Nos Deterioro], di Philip Atkinson) Tambe el a kousa morto di 35 hende!

Na Canada, un penshonado di 65 aña tabata koriendo su kareda di baiskel di tur mainta trempan. Segun ku e tabata kore, un shofùr di outo a dal e di patras i kore bai lag’é pensando ku e ta morto. Su baiskel a lastra bai kasi 700 meter leu. Na promé instante outoridatnan a pensa ku tabata un kaso di dal-kore-bai, pero mas investigashon a indiká ku ta un persona ku a joyride un outo a dal e. Aparentemente, e shofùr a konsiderá ku dal e siklista tabata parti di e “eksitashon” di joyride.

Un Otro Tipo di Krímen?

Hende tin siglonan ta kometé krímen, pero e tipo di krímennan sitá ariba ta pone hende sklama: “Dikon? Kon un hende por hinka den su kabes pa hasi un kos asina?” Ounke krímen komun, manera ladronisia i froude, kisas no ta hala hopi hende su atenshon, tin un kategoria kresiente di aktonan ku ta gara atenshon di medionan di komunikashon i ku ta pone hende bisa den nan mes: ‘Esaki no tin sentido! Ta kiko ta pasando ku e mundu aki?’

E krímennan aki ta diferente. Hopi bes nan ta masha teribel i kruel. Manera den e ehèmpelnan ya menshoná, nan ta ser kometé por lo general kontra hende inosente ku ni sikiera konosé e malechor. Ademas, hopi bes ta parse ku no tin un motibu kla pa e krímennan violento aki. Ta masha hopi akto sin sentido asina ta tumando lugá.

Na aprel 1999 na Colorado, Merka, 2 mucha di skol a mata 12 alumno i un dosente, promé ku nan a mata nan mes den un tiroteo ku a  tuma lugá na skol. Na 1982, un hòmber a muri na California despues ku el a bebe un remedi ku el a kumpra na botika; un hende a meskla e venenu strychnine den dje. Na 1993, dos mucha hòmber di dies aña a konvensé James Bulger di dos aña pa sali for di e sentro komersial na Bootle, Merseyside, Inglatera, miéntras ku su mama tabata den un karniseria. Nan a bai kuné kaminda tabatin rail di trein i a batié mata ku un pida palu.

Algun krímen por ser klasifiká komo terorismo, manera e venenamentu den metro di Tokio na 1995. Hende na Hapon a keda di shòk ora ku miembronan di un kulto a deskargá gas venenoso den un metro di Tokio, matando 12 persona i heridando míles. Poko hende por lubidá e destrukshon di World Trade Center na New York i e atake kontra Pentagon na Washington, D.C.—ku a kosta bida di un 3.000 hende—i e atentado ku bòm aña pasá na Bali, Indonesia, ku a kosta bida di kasi 200 persona.

Ta bisto ku e tipo di krímennan violento ei ta sosodé tur kaminda. E problema ta mundial, i e ta afektando hopi nashon i hopi tipo di hende.

Den algun kaso ta kasi komo si fuera e malechornan ta kompetiendo ku otro, purbando di wak ken por kometé e krímen di mas kruel. Ademas, krímennan motivá pa odio ta birando mas komun. Esakinan ta ser kometé na maneranan masha kruel mes kontra hende kende nan úniko “fout” ta ku nan ta di un otro rasa, religion òf grupo étniko, manera tabata e kaso na 1994 ora ku mas o ménos 800.000 tutsi a ser asesiná na Ruanda.

Tur esaki ta pone hopi hende pensa: ‘Ta kiko ta pasando? Ántes tabata asina? Kiko por tin tras di e krímennan horibel ei? Ki speransa nos tin ku lo redusí òf eliminá tal krímennan kruel?’ E siguiente artíkulonan lo trata ku e preguntanan aki i otronan mas.

[Komentario na página 4]

Krímen violento hopi bes ta ser kometé kontra víktimanan skohé pa kasualidat i sin ku tin un motibu kla pa esei