Tin un Solushon Realístiko?

KRIMINALIDAT ta parse di ta un elemento fiho di sosiedat moderno. Apesar di e esfuerso i bon intenshon di trahadónan sosial, di polis i di profeshonalnan ku ta rehabilitá kriminalnan, mundu ta birando un lugá mas i mas peligroso. Tin un solushon?

Beibel ta mustra ku tin un kambio grandi na kaminda. Esaki lo no bini mediante e esfuerso di gobièrnunan humano. Tur gobernante humano ta limitá, sin importá kon noble nan metanan ta. Simplemente nan no tin e poder i e rekursonan nesesario pa eradiká e kousa di kriminalidat ni pa establesé un sistema permanentemente sigur.

Ta nos Kreadó lo implementá e kambio ku Beibel ta papia di dje. Komo Esun ku a traha universo, e tin e poder i e derecho legal pa hasi loke hende no por hasi. Beibel ta deskribié komo Esun ku “ta hasi gobernantenan bira nada, i ta hasi e huesnan di tera bira insignifikante.”  Ademas e ta bisa ku Dios tin ‘grandesa di poder.’ (Isaias 40:23-26) Ki kambionan Dios ta primintí, i kon esakinan ta duna nos berdadero speransa ku lo bin un mundu mihó?

Salmo 37:10 ta informá nos di e siguiente promesa di Dios: “Aki poko tempu e malbado lo no t’ei mas; maske kuantu bo buska su lugá, e [malbado] lo no t’ei.” Dios ta bai deshasí di e malbadonan kabesura ku no tin intenshon di kambia. Sin embargo, lo e no destruí tur hende. E salmista ta primintí hende ku ta dispuesto pa bira mansu, humilde i pasífiko: “Spera riba SEÑOR i sigui su kaminda, i e lo halsa bo pa heredá e tera; ora ku e malbadonan wòrdu kòrta kitá afó, abo lo mira esaki.” Despues ku e malbadonan ser eliminá, e hendenan ku keda lo disfrutá di “pas abundante,” un mundu sin niun tipo di krímen.—Salmo 37:11, 34.

Kambio di Mente i Kurason Ta Nesesario

Djis destruí e malbadonan i salba bon hende no ta basta pa solushoná e problema di kriminalidat unabes pa semper. Hopi bes krímen ta debí na e mal entrenamentu ku hende su mente i kurason a haña. Sin embargo, ta ei ta kaminda e gobièrnu di Dios ta surpasá otro gobièrnunan. Lo e perkurá instrukshon i edukashon práktiko pa train hende di manera ku nan lo stima hustisia. Isaias 54:13 ta bisa: “SEÑOR lo siña tur bo yu hòmbernan, i e prosperidat di bo yu hòmbernan lo ta grandi.”

E resultadonan lo duna nos berdadero satisfakshon! Beibel ta papia simbólikamente di e kambionan den hende ku un tempu kisas tabatin karakterístika violento manera di bestia. E ta bisa: “Lobo lo ta huntu ku lamchi di karné, leopardo lo kai drumi banda di lamchi di kabritu, i bisé, leon chikitu i bestia gòrdá lo ta huntu.” Kon bini? “Pasobra tera lo ta yen di e konosementu di SEÑOR, manera awa ta tapa laman.” (Isaias 11:6, 9) Pero abo ku bo famia no tin nodi warda te den futuro pa mira tal kambio. Kon asina?

Bo Por Benefisiá Awor

Tin hende ku for di awor ta hasiendo e kambionan nesesario pa prepará pa un mundu sin krímen. Ya kaba nan ta bistiendo un personalidat nobo, e tipo di personalidat ku Dios kier mira den hende ku lo biba den su mundu nobo. (2 Pedro 3:13) Nan ta hasi esaki dor di apliká prinsipionan bíbliko den nan bida. Tuma nota di e deskripshon interesante ku Beibel ta duna: “Boso mester ser hasí nobo den e forsa ku ta impulsá boso mente, i boso mester bisti e personalidat nobo ku a ser kreá segun e boluntat di Dios den berdadero hustisia i lealtat.”—Efesionan 4:23, 24, NW.

Kolosensenan 3:12-14 ta deskribí mas aleu e kualidatnan positivo ku hopi persona di kurason onrado ta kultivando awor. E ta bisa: “Manera esnan ku a wòrdu skohí di Dios, santu i stimá, bisti un kurason di kompashon, kariño, humildat, mansedumbre i pasenshi. I boso soportá otro i pordoná otro, si un di boso tin un keho kontra un otro; meskos ku Señor a pordoná boso, asina boso tambe mester hasi. I ademas di tur e kosnan aki bisti amor, kual ta e laso perfekto di unidat.”

Abo lo kier haña yudansa pa bisti e personalidat kristian nobo? Miónes di hende rònt mundu ya kaba ta hasiendo esei ku yudansa di Testigunan di Yehova. Asta hende ku tabata kriminal violento a siña bisti un personalidat pasífiko dor di asistí na reunionnan ku ta ser tené regularmente na Salòn di Reino i na kongresonan grandi. * Si bo tin gana di benefisiá di e ekselente programa aki di edukashon bíbliko, no vasilá pa tuma kontakto ku e publikadónan di e revista aki. Gustosamente nan lo yuda bo pa bo ta entre e pueblo ku ta preparando awor pa biba den Dios su mundu nobo sin krímen.

[Nota]

[Plachinan na página 10]

Miónes di hende ta haña edukashon pa biba den un mundu sin krímen