Hóbennan Sa Puntra . . .

Dikon Mi Ta Sinti Ku Mi Mester Ta Perfekto?

“Dor ku mi tata tabata mener di skol, tur hende tabata ferwagt pa mi haña bon punto so. Tin biaha mi tabata yora te ora mi pega soño.”—Leah. *

“Ami ta un perfekshonista. Mi mester ta bon mes den un kos òf hasié den un manera kompletamente diferente for di otro hende, sino mi no ta mira pakiko hasié.”—Caleb.

ABO TA sinti ku semper bo mester ta perfekto? Bo ta preokupá konstantemente ku maske kuantu esfuerso bo hasi, nunka bo no ta muchu satisfecho ku bo mes? Bo ta un hende ku no por aseptá ningun krítika? Ora kosnan sali malu, bo ta kulpa bo mes, akusando bo mes di ta bobo, inferior òf indigno? Si bo kier pa algu wòrdu hasí na drechi, bo ta sinti ku ta abo mes tin ku hasié? Sa sosodé ku bo tin asina tantu miedu di frakasá ku bo ta posponé kosnan òf para bo aktividatnan?

Kiko di bo relashon ku otro hende? E echo ku bo no tin amigu ta pasobra niun hende ku bo konosé no ta sufisiente perfekto? Bo ta demasiado preokupá tokante otro hende su fayonan? Si bo kontestá sí riba kualkier un di e preguntanan aki, e ora ei lo bo ta luchando ku algu ku yama perfekshonismo. I si esei ta e kaso, no ta abo so tin e problema aki. E ta un karakterístika komun di hóbennan, spesialmente hóbennan talentoso i eksitoso. *

Kiko ta hasi hende perfekshonista? Te ainda ta teoria so tin. E buki Perfectionism—What’s Bad About Being Too Good? (Perfekshonismo—Ta Malu pa Ta Muchu Bon?) ta bisa: “Perfekshonismo no ta un enfermedat; bo no ta pega kuné. Perfekshonismo no ta algu hereditario; bo no ta nase kuné. Ta kiko ta hasi hende perfekshonista anto? Algun eksperto ta kere ku perfekshonismo ta desaroyá durante infansia. Un kombinashon di preshon di famia, preshon di e hende mes, preshon sosial, preshon di medionan di komunikashon i e gana di imitá personahenan popular irealístiko ta pone algun hende preokupá, sinti nan kulpabel i traha muchu duru henter nan bida.”

Sea kual sea e kousa, e gana di ta semper perfekto por perhudiká bo. Laga nos analisá kiko ta perfekshonismo i pakiko e por ta dañino pa bo.

Kiko Ta Perfekshonismo?

Perfekshonismo ta enserá mas ku djis trata na bria òf haña satisfakshon den un trabou bon hasí. Na Proverbionan 22:29, Beibel mes ta elogiá un hòmber ku ta ‘ábil den su trabou.’ Tambe  Beibel ta papia faborablemente di un kantidat di persona ku a bira hopi ábil riba vários tereno. (1 Samuel 16:18; 1 Reinan 7:13, 14) P’esei no tin nada malu den purba bria den un kos i pone metanan haltu pero realístiko. Pues bo tin mag di ‘bisa bo mes ku bo trabou ta bon.’—Eklesiastés 2:24.

Sin embargo, e hende perfekshonista ta pèrdè chèns di haña e satisfakshon ei. Su manera di mira logro ta fundamentalmente insaludabel. Algun eksperto ta bisa ku perfekshonismo tin di haber ku “metanan inalkansabel (esta, perfekshon), i un falta konstante di satisfakshon, maske kon bon e prestashon por ta.” Dor di esei, perfekshonismo ta “un fuente króniko di strès ku hopi bes ta laga e persona sinti ku el a frakasá.” P’esei un fuente ta definí perfekshonismo komo “e kreensia irashonal ku bo ambiente mester ta perfekto.” E ta “un aktitut persistente ku kiko ku bo purba hasi den bida mester ta al pie de la letra i sin desviashon, fayo òf inkonsistensia.”

Pero Hesus no a bisa: “Boso mester ta perfekto, meskos ku boso Tata selestial ta perfekto”? (Mateo 5:48) Sí, pero Hesus no tabata kier men ku bo por ta perfekto den e sentido apsoluto di palabra. Por sierto, Beibel ta siña nos ku “tur [hende] a peka i ta falta e gloria di Dios.” (Romanonan 3:23) Kiko Hesus tabata kier men anto? Den Beibel e palabra “perfekto” ta transmití e idea di ser kompletu. (Mateo 19:21) Ora Hesus a bisa ku nos mester ta perfekto, e tabata papiando tokante amor i animando su siguidónan pa nan ta mas kompletu den mustra amor. Kon? Dor di amplia nan amor pa inkluí asta nan enemigunan. Segun e eskritor di Beibel Lukas, Hesus a bisa: “Sea miserikòrdioso, meskos ku boso Tata ta miserikòrdioso.”—Lukas 6:36.

Pero un perfekshonista ta karga e ilushon ku ta posibel pa ta perfekto den e sentido apsoluto di palabra. P’esei kisas e ta spera demasiado di otro hende. Segun e buki Never Good Enough—Freeing Yourself From the Chains of Perfectionism (Nunka Satisfecho—Libra Bo Mes for di e Kadenanan di Perfekshonismo), un perfekshonista ta “un persona ku ta laga e manera ku otro hende ta hasi nan trabou frustr’é . . . Na su opinion, e hendenan rònt di dje no ta wòri hasi un bon trabou, ni sinti nan orguyoso di loke nan ta hasi.”

Carly, por ehèmpel, ta bai bon na skol. Nan a hink’é den un programa pa studiantenan talentoso. Sin embargo, e no ta bai muchu bon ku otro hende. Dor ku e kier pa tur kos ta perfekto, el a pèrdè mayoria di su amigunan. E di: “Mi ta kere ku nan tabata demasiado imperfekto.”

Kisas otronan ta buska perfekshon, no den otro hende, sino den nan mes. E buki Nunka Satisfecho ta splika ku hende asina ta sinti ku “ni nan mes ni nan akshonnan no ta sufisiente bon . . . , i [nan] ta preokupá spesialmente ku loke otro hende ta pensa di nan.”

E Problema di Purba Ser Perfekto

P’esei, en bes di ta algu saludabel i benefisioso, e afan pa ta perfekto sa ta insaludabel i perhudisial. I na lugá di bria, un punto di bista asina ta promové frakaso. Un hòmber kristian ku yama Daniel ta kòrda kon duru el a traha pa oranan largu riba un  presentashon oral ku e tabatin ku duna dilanti un klas na un Salòn di Reino lokal di Testigunan di Yehova. Hopi di e hendenan ku tabat’ei a elogi’é pa su bon presentashon. Despues, ku takto e instruktor a duna Daniel algun sugerensia útil. Beibel ta animá nos pa “skucha konseho i aseptá disiplina.” (Proverbionan 19:20) Pero en bes di aseptá e krítika konstruktivo, Daniel a sinti manera el a frakasá. E ta kòrda: “Mi tabata kier pa tera habri guli mi.” Pa hopi siman e no por a drumi anochi.

Nos ta mira anto ku perfekshonismo por stroba e proseso di siña. Den un artíkulo ku a aparesé riba un Website spesialmente pa hóbennan, un hobensita ku yama Rachel a skirbi: “Ora mi a kuminsá bai skol sekundario mi tabata determiná pa siña bon. Semper mi tabata haña bon punto so i mi no a mira pakiko esei mester a kambia.” Pero poko tempu despues Rachel a bin ripará ku e tabatin problema ku álgebra i a haña “apénas” un ‘voldoende.’ Rachel a bisa: “Pa tur otro mucha esaki tabata un bon punto, pero pa ami si . . . e tabata un bèrgwensa. Mi a drenta pániko i kuminsá preokupá . . . Mi tabatin miedu di pidi mi maestro yuda mi pasobra mi a pensa ku si mi a atmití ku mi tabatin mester di yudansa ku hùiswèrk, esei lo a nifiká ku lo mi a rekonosé ku mi no a komprondé e lès. . . . Na dado momentu mi a kasi konvensé mi mes ku pa mi frakasá mihó mi muri.”

Miedu di faya a pone algun hóben asta pensa di kometé suisidio. Afortunadamente, mayoria hóben no ta hinka den nan kabes pa hasi algu drástiko asina. Pero manera e eksperto di salú mental Sylvia Rimm ta remarká, kisas nan ta trata na evitá di frakasá dor di no riska mes. Segun Rimm, algun perfekshonista “no ta entregá nan asignashonnan, nan no ta orguyoso di nan trabou, nan ta lubidá nan hùiswèrk i nan ta bini ku èksküs.”

Di otro banda, otro hóbennan por bai den ekstremonan pa garantisá éksito. Daniel ta konfesá: “Mi tabata traha te anochi lat riba proyektonan di skol pa nan sali perfekto.” E problema ta ku por lo general e ekstremonan ei ta kontra-produktivo. Un studiante ku tin yen di soño no por presta muchu bon.

Nada straño anto ku nan a konektá perfekshonismo ku rabiamentu króniko, falta di balor propio, sintimentu di kulpa, pesimismo, mal hábito di komementu i depreshon. Pero pió ainda, perfekshonismo por perhudiká bo spiritualmente. Por ehèmpel, Beibel ta manda kristiannan papia ku otro hende tokante nan fe. (Romanonan 10:10; Hebreonan 10:24, 25) Sin embargo, un hóben ku yama Vivian no tabata duna komentario na reunionnan kristian pasobra e tabatin miedu ku lo e no a haña e palabranan korekto. Un señora yòn ku yama Leah tabatin e mesun miedu ei. E ta bisa: “Si mi bisa algu robes, otro hende lo saka mal konklushon tokante mi. P’esei mi ta preferá di keda ketu.”

Ta bisto anto ku e gana di ta perfekto ta dañino i insaludabel. I si bo ta mira den bo mes kualkier un dje karakterístikanan ku e artíkulo aki ta trese dilanti, kisas lo bo tin ku hasi algun kambio den bo manera di pensa. Un futuro artíkulo lo splika kon bo por hasi esei.

[Nota]

[Plachi na página 12]

Miedu di faya ta stroba algun hóben di kaba nan tareanan

[Plachi na página 13]

Perfekshonismo por kousa depreshon i falta di balor propio