Dikon Pornografia Ta Asina Plamá?

MATERIAL erótiko diseñá pa stimulá sintimentunan seksual ta algu ku ta data for di mas ku dos mil aña pasá. Pero durante gran parti di su historia, pornografia tabata difísil pa produsí i p’esei tabata disponibel prinsipalmente pa hende riku i pa esnan na poder. Pero imprenta masal i e invento di sakamentu di potrèt a kambia tur esei. Pornografia a bira barata i disponibel pa esnan ménos pudiente.

Desaroyo di vidiokasèt rikòrder a pone e tendensia aki eskalá. Distinto for di ròlnan grandi di sinta di sine i potrètnan bieu, vidiokasèt tabata fásil pa warda, pa kopia i pa distribuí. Tambe hende por a wak nan den privá na kas. Último tempu, e oumento di sistemanan di black box i Internet a hasi pornografia mas fásil ainda pa yega na dje. E konsumidó ku tin miedu ku su bisiña lo mir’é na vidioteka ta buska vidio x-rated, awor por “keda kas i bestèl [material pornográfiko] dor di primi un kònòpi di su black box òf di su direct TV,” asina e analista di medionan di komunikashon Dennis McAlpine a bisa. Akseso fásil na e tipo di programashon aki, segun McAlpine, a kontribuí na “hopi mas aseptashon” di pornografia.

Pornografia Ta Bira Komun i Koriente

Hopi hende tin sintimentunan miksto pa ku pornografia pasobra awor el a bira algu komun. E eskritora Germaine Greer a bisa: “Ya kaba e tin hopi mas influensia riba nos kultura ku tur nos ópera, balèt, teatro, músika i obranan di arte kombiná.” Aktitutnan moderno pa ku pornografia  ta ser reflehá den pañanan ‘shik estilo di prostituta’ ku hopi artista famoso ta bisti, i den e videoclipnan ku mas i mas ta aksentuá imágennan seksual. Tambe e aktitut ei ta bisto den e manera ku medionan ku ta hasi propaganda komersial ta usa imágennan pornográfiko den nan propaganda. McAlpine a konkluí: “Sosiedat ta aseptando sin mas tur loke nan ta presentá na dje. . . . Esaki ta yuda krea e idea ku tur esaki ta bon.” Andrea Dworkin a lamentá ku komo resultado, “hende aparentemente no ta bira indigná. Ta parse ku nan no tin kunes.”

E Rasonamentu Tras di Pornografia

Roger Young, un agente penshoná di FBI, a ekspresá kasi mesun pensamentunan ku e eskritor Dworkin. El a señalá ku hopi hende “simplemente no ta mira e konsekuensianan serio di e falta di moralidat aki, ni e problemanan ku e ta kousa.” Tin hende ta ser influensiá dor di esnan ku ta defendé pornografia, i nan ta pretendé ku no tin prueba ku imágennan pornográfiko tin un efekto negativo riba hende. E eskritor F. M. Christensen a skirbi: “Al fin i al kabo, pornografia ta simplemente fantasia, un echo ku su oponentenan aparentemente tin difikultat pa komprondé.” Pero si fantasia no tin ningun influensia, ta riba kiko e industria di propaganda komersial ta basá? Dikon korporashonnan ta gasta miónes di florin pa produsí vidio i propaganda na radio, televishon i den literatura si nan no tin ningun impakto duradero riba hende?

Echo ta ku, meskos ku tur propaganda eksitoso, pornografia su propósito prinsipal ta pa krea deseonan ku no tabata t’ei promé. Investigadónan Steven Hill i Nina Silver a skirbi:  “Pornografia ta motivá pa ganashi, i nada otro. I den e merkado fuera di kontròl aki, nan ta konsiderá kiko-ku-ta komo algu ku bo por bende pa ganashi, foral kurpa di hende muhé i relashonnan seksual humano.” Germaine Greer a kompará pornografia ku kuminda sumamente adiktivo i sirbí rápidamente [fast food], ku no tin ningun balor nutritivo i ku ta mesklá ku supstansia- i kímikonan agregá pa mehorá e sabor. El a bisa: “Fast sex [sèks rápidamente disponibel via medionan di komunikashon] no ta berdadero sèks . . . Propaganda di kuminda ta promové benta di kuminda di fantasia, i propaganda di sèks ta promové benta di sèks di fantasia.”

Tin dòkter ta bisa ku pornografia por inisiá un adikshon ku ta hopi mas difísil pa vense ku adikshon na droga. Tratamentu di drogadikto por lo general ta kuminsá ku e proseso di eliminá e supstansia adiktivo for di nan kurpa, loke ta wòrdu yamá desintoksiká. Pero segun un splikashon di Dr. Mary Anne Layden di Universidat di Pennsylvania, adikshon na pornografia “ta produsí imágennan mental ku ta keda permanentemente grabá den mente di e usadó i ku ta bira parti di e prosesonan kímiko di e selebro.” Ta p’esei hende por kòrda kla-kla imágennan pornográfiko ku nan a mira hopi aña pasá. Dr. Layden a konkluí: “Esaki ta e promé supstansia adiktivo pa kua no tin speransa di desintoksiká.” Pero esei kier men ku ta imposibel pa libra di e influensia di pornografia? I ki daño spesífiko pornografia ta kousa?

[Kuadro na página 5]

Sifranan di Pornografia Riba Internet

▪ Rònt di 75 porshento di pornografia riba Internet ta originá na Merka. Kasi 15 porshento ta originá na Europa.

▪ Ta ser kalkulá ku un 70 mion hende pa siman ta bishitá website pornográfiko. Rònt di 20 mion di nan ta na Canada òf Merka.

▪ Un estudio a revelá ku resientemente durante un solo luna, Alemania tabatin e grupo mas grandi di hende na Europa ku a wak pornografia riba Internet, siguí pa Gran Bretaña, Fransia, Italia i Spaña.

▪ Na Alemania, esnan ku ta wak pornografia riba Internet ta dediká un promedio di 70 minüt tur luna na website pornográfiko.

▪ Entre e europeonan ku ta wak pornografia riba Internet, personanan riba 50 aña di edat ta dediká mas tempu konektá na website ku ta presentá material seksual detayá.

▪ Segun un fuente, 70 porshento di hende ku ta bishitá website pornográfiko ta hasi esei den dia.

▪ Ta ser kalkulá ku un 100.000 website tin tambe material riba pornografia di mucha.

▪ Rònt di 80 porshento di pornografia komersial di mucha riba Internet ta originá na Hapon.

[Plachinan na página 4]

Pornografia a bira mas aksesibel