E Daño Ku Pornografia Ta Kousa

TA FÁSIL pa yega na tur tipo di informashon seksual via televishon, pelíkula, videoclip i Internet. E invashon konstante aki di imágennan seksual i pornográfiko ta inofensivo, manera hopi hende ke pa nos kere? *

E Efekto di Pornografia Riba Personanan Adulto

Apesar di loke su defensornan ta bisa, pornografia tin un efekto hopi negativo riba hende su punto di bista di sèks i di komportashon seksual. Investigadónan na e Fundashon Nashonal pa Investigá i Eduká Famia a konkluí ku “esnan ku ta wak pornografia ta kore mas riesgo di desaroyá tendensianan ku ta desviá for di komportashon seksual normal.” Segun e rapòrt, “e mito di violashon (esta, e kreensia ku hende muhé ta provoká violashon i ta gust’é, i ku violadónan ta hende normal) ta reina bou di hòmbernan ku tin kustumber di wak pornografia.”

Tin investigadó ta bisa ku e uso frekuente di pornografia por stroba un hende di disfrutá i partisipá den intimidat matrimonial normal. Dr. Victor Cline, un spesialista den tratamentu di adikshon na sèks, a ripará ku hopi biaha hende ku ta usa pornografia ta sigui bai mas leu. Si un persona no frena su mes, loke a kuminsá komo wakmentu kasual di pornografia ku tempu por bai te na wakmentu di material pornográfiko mas pisá i detayá, i apnormal. Segun Dr. Cline, esaki por hiba na komportashon seksual ku ta desviá for di normal. Sientífikonan ku ta studia komportashon humano ta di akuerdo ku esei. Dr. Cline a informá ku “di e manera aki hende por atkerí kualkier tipo di desviashon  seksual . . . ku no por wòrdu eliminá ni sikiera dor di un sintimentu tremendo di kulpa.” Ku tempu, e persona kisas ta purba aktua segun su fantasianan inmoral basá riba pornografia, hopi bes ku resultadonan devastador.

E problema aki por desaroyá pokopoko i sin ku hende ta ripará, segun Cline. El a bisa: “Meskos ku kanser, e ta sigui krese i plama. Masha poko biaha e [desviashon seksual] ta stòp di progresá, i tambe e ta masha difísil pa trata i kura. Un rasgo típiko di e adikto maskulino ta ku e ta nenga di rekonosé i konfrontá e problema—algu ku di mes bo por ferwagt—i esaki kasi semper ta hiba na desakuerdo entre pareha, tin biaha na divorsio, i tin biaha e ta kibra otro relashonnan íntimo.”

E Daño na Hóbennan

Estadístikanan ta mustra ku e konsumidónan prinsipal di pornografia ta mucha hòmber entre 12 pa 17 aña. De echo, pa hopi di nan pornografia ta nan fuente prinsipal di edukashon seksual. Esaki tin konsekuensianan alarmante. Un rapòrt a bisa: “Pornografia nunka ta mustra embaraso hubenil ni malesanan transmití seksualmente manera AIDS. Eróneamente e ta laga hende kere ku e komportashonnan presentá den pornografia no tin konsekuensia negativo.”

Tin investigadó ta bisa ku wakmentu di pornografia por afektá tambe e desaroyo natural di un mucha su selebro. Dr. Judith Reisman, presidente di e Instituto pa Edukashon Tokante Medionan di Komunikashon, a konkluí: “Opservashonnan pa haña sa kon e sistema nervioso ta ser afektá dor di e reakshon outomátiko di e selebro ora hende ta mira i tende kosnan pornográfiko, ta indiká ku wakmentu di pornografia ta kousa un reakshon ku biológikamente ta kambia e selebro. Esaki ta kanselá e proseso normal di aseptá algu despues di komprondé loke e ta enserá. I esei ta perhudisial pa e selebro di mucha ku ta manera ‘plèstik’ [fásil pa influensiá], pasobra e ta peligrá nan komprondementu di realidat i ta perhudiká nan salú mental i físiko, nan bienestar i nan búskeda di felisidat.”

E Efektonan Riba Relashonnan Personal

Pornografia ta forma hende su aktitut i ta influensiá nan komportashon. E mensahenan ku e ta transmití ta atraktivo pasobra nan ta fantasia  i p’esei ta ser presentá komo si fuera nan ta mas eksitante ku realidat. (Wak e kuadro “Kua Mensahe Lo Bo Aseptá?”) Un rapòrt a bisa: “Personanan ku ta hasi uso di pornografia ta desaroyá ekspektativanan irealístiko ku ta kousa daño na relashonnan personal.”

Pornografia por destruí konfiansa i onestidat, kualidatnan esensial den un matrimonio. Komo ku hende ta wak pornografia prinsipalmente den sekreto, hopi bes e ta hiba na engaño i mentira. Partnernan ta sinti nan mes traishoná. Nan no ta komprondé dikon nan kasá no ta deseá nan mas.

Daño Spiritual

Pornografia ta kousa daño spiritual serio. E por bira un berdadero strobansa pa un persona ku ta purba tin un relashon ku Dios. * Beibel ta konektá pashon ku golosidat i idolatria. (Kolosensenan 3:5) E persona goloso ta deseá algu asina tantu ku esei ta e kos dominante den su bida, surpasando tur otro kos. De echo, hende adikto na pornografia ta pone nan deseo seksual promé ku Dios. Di e manera ei nan ta hasié un opheto di adorashon. Yehova Dios su mandamentu ta deklará: “Bo no mag tin otro dios mi dilanti.”—Eksodo 20:3.

Pornografia ta destruí relashonnan personal amoroso. Apòstel Pedro, kende tambe tabata un hòmber kasá, a urgi esposonan kristian pa asigná onor na nan esposa. Un esposo ku no hasi esei lo ripará ku su orashonnan na Dios ta wòrdu strobá. (1 Pedro 3:7) Lo bo ta trata bo esposa ku onor si den sekreto bo ta wak plachinan indesente di hende muhé? Kon bo esposa lo sinti si e haña sa esei? I kiko Dios—ku lo trese “tur echo na huisio” i ku ta “pisa e motibunan”—lo ta pensa di esei? (Eklesiastés 12:14; Proverbionan 16:2) Un persona ku ta hasi uso di pornografia tin motibu pa spera ku Dios lo skucha su orashonnan?

Un karakterístika básiko di hende ku ta usa pornografia ta ku nan ta insistí riba satisfakshon propio a todo kosto. P’esei, wakmentu di pornografia ta indiká ku e persona no tin amor. E ta debilitá un kristian su lucha pa keda desente  i mantené un posishon moral limpi dilanti di Dios. Apòstel Pablo a skirbi: “Esaki ta e boluntat di Dios . . . pa boso apstené boso di inmoralidat seksual, pa kada un di boso sa kon pa tene su mes kurpa den santifikashon i onor, no ku pashon di deseonan karnal . . . i ku ningun hende no transgresá ni defroudá [òf, “perhudiká i trapa e derechonan di,” NW] su ruman.”—1 Tesalonisensenan 4:3-7.

Pornografia ta probechá spesialmente di hende muhé i mucha. E ta rebahá nan i ta hòrta nan di nan dignidat i derechonan. Un persona ku ta hasi uso di pornografia ta partisipá den e probechamentu ei i ta apoy’é. Investigadó Steven Hill i Nina Silver a señalá: ‘Sin importá kon bon un hòmber ta kere ku e ta, e echo ku e ta hasi uso di pornografia—i pues ta aprob’é—ta hasié a lo mehor sin heful, a lo peor un persona ku ta odia i deskonfiá hende muhé, nèt e persona ku e ta pretendé di stima.’

Kon pa Libra for di Pornografia

Kiko si aktualmente bo ta luchando ku un adikshon na pornografia? Bo por hasi algu pa vense e adikshon ei? Beibel ta duna speransa! Promé ku algun di e kristiannan di promé siglo a siña konosé Kristu, nan tabata fornikadó, adúltero i golos. “Ma boso a wòrdu labá,” Pablo a remarká. Kon esei tabata posibel? El a kontestá: “Boso a wòrdu santifiká . . . [ku] e spiritu di nos Dios.”—1 Korintionan 6:9-11.

Nunka balotá e poder di Dios su spiritu santu. Beibel ta bisa: “Dios ta fiel, kende lo no permití pa boso wòrdu tentá mas ku boso por soportá.”  De echo, Dios lo perkurá e salida. (1 Korintionan 10:13) Orashon ferviente—papiando persistentemente ku Dios tokante bo problema—lo produsí resultado. Su Palabra ta animá nos: “Tira bo karga riba SEÑOR, i e lo sostené bo.”—Salmo 55:22.

Klaru ku bo tin ku aktua na armonia ku bo orashon. Bo tin ku tuma un desishon deliberá i sinsero pa rechasá pornografia. Un amigu di konfiansa òf un miembro di famia por ta di gran yudansa, dunando bo e apoyo i animashon nesesario pa pega na bo determinashon. (Wak e kuadro “Buska Yudansa.”) Dor di keda kòrda ku tal proseder siguramente lo agradá Dios, por yuda bo sigui kumpli ku bo desishon. (Proverbionan 27:11) Ademas, e echo ku bo sa ku ora bo ta wak pornografia esei ta ofendé Dios, tambe por sirbi komo un motivashon adishonal pa stòp kuné. (Génesis 6:5, 6) Esaki lo no ta un lucha fásil, pero e ta un lucha ku bo por gana. Bo por stòp ku pornografia!

E peligernan di pornografia ta real. E ta perhudisial i destruktivo. E ta korumpí esnan ku ta produsié i esnan ku ta hasi uso di dje. E ta un insulto pa hende hòmber i hende muhé, un peliger pa mucha, i un práktika ku lo mester wòrdu rechasá.

[Nota]

[Kuadro/Plachi na página 10]

Buska Yudansa

Nos no mester mira e lucha pa libra for di pornografia komo algu fásil; e por ta un bataya difísil. Dr. Victor Cline, kende a trata un kantidat di adikto na sèks, a bisa: ‘Primintí so no ta basta. Bon intenshon no ta nifiká nada. Un adikto na sèks literalmente no por libra di esaki su so.’ Segun Cline, un rekisito nesesario pa un tratamentu eksitoso, ta di enbolbé e partner den kaso ku e persona ta kasá. El a trese dilanti: “E tratamentu ta bai mas lihé si tur dos ta enbolbí. Nan tur dos ta di hùrt. Nan tur dos mester di yudansa.”

Si e persona ta soltero, un amigu di konfiansa òf un miembro di famia hopi bes por ta un bon sosten. Pero, sin importá ken ta enbolbí den e tratamentu, Cline tin un regla fiho: Papia abiertamente di e problema i di kualkier rekaida. El a bisa: “Sekreto ta ‘mata bo.’ E ta krea bèrgwensa i sintimentu di kulpa.”

[Tabèl na página 9]

Kua Mensahe Lo Bo Aseptá?

E Mensahe di Pornografia

▪ Sèks ku ken-ku-ta, ki ora ku ta, unda ku ta i kon ku ta, ta bon i no tin ningun konsekuensia negativo.

E Punto di Bista Bíbliko

▪ “Laga matrimonio wòrdu onrá pa tur hende, i laga e kama matrimonial ta sin mancha; pasobra Dios lo husga fornikadónan i adúlteronan.”—Hebreonan 13:4.

“E hende inmoral ta peka kontra su mes kurpa.”—1 Korintionan 6:18; wak tambe Romanonan 1:26, 27.

E Mensahe di Pornografia

▪ Matrimonio ta stroba satisfakshon seksual.

E Punto di Bista Bíbliko

▪ “Alegrá bo den e esposa di bo hubentut . . . Sea semper enkantá ku su amor.”—Proverbionan 5:18, 19; wak tambe Génesis 1:28; 2:24; 1 Korintionan 7:3.

E Mensahe di Pornografia

▪ Hende muhé ta sirbi pa un kos so: pa satisfasé e nesesidatnan seksual di hende hòmber.

E Punto di Bista Bíbliko

▪ Yehova Dios a bisa: “Lo mi traha un yudadó p’e ku ta pas kuné.”—Génesis 2:18; wak tambe Efesionan 5:28.

E Mensahe di Pornografia

▪ Hende hòmber i hende muhé ta katibu di nan deseonan seksual.

E Punto di Bista Bíbliko

▪ “P’esei, konsiderá e miembronan di boso kurpa terenal komo morto [òf, ‘mata nan,’ NW] pa inmoralidat, impuresa, pashon, deseo malu, i golosidat, ku ta igual na idolatria.”—Kolosensenan 3:5.

“Pa kada un di boso sa kon pa tene su mes kurpa den santifikashon i onor.”—1 Tesalonisensenan 4:4.

Konsiderá “muhénan mas bieu manera mama, e muhénan mas hóben manera ruman muhé, den tur puresa.”—1 Timoteo 5:1, 2; wak tambe 1 Korintionan 9:27.

[Plachi na página 7]

Tin investigadó ta bisa ku wakmentu di pornografia por afektá e desaroyo natural di un mucha su selebro

[Plachi na página 8]

Pornografia por destruí konfiansa i onestidat den un matrimonio

[Plachi na página 10]

Orashon ferviente lo produsí resultado