“No Lubidá Bo Brolly!”

DI UN ESKRITOR DI SPIÈRTA! NA GRAN BRETAÑA

RIBA un dia típiko na Gran Bretaña, mayoria hende ta kana ku nan paraplü. Bo no por sa nunka; áwaseru por kai. Ora nos ta bai sali kas, nos hendenan ta grita nos: “No lubidá bo brolly!” Nos ta sali kuné, pero kabes yen nos ta lubid’é den bùs, den trein òf den un negoshi. * Sí, mayoria bes nos no ta pensa mashá riba e protektor portátil aki, pasobra tòg ta fásil pa nos bira kumpra un otro. Pero no ta semper paraplü a wòrdu konsiderá di poko importansia.

Un Pasado Prominente

Parse ku e promé paraplünan no tabatin nada di haber ku áwaseru. Nan tabata un símbolo di status i onor ku hende importante so por a usa. Eskultura- i pinturanan míles di aña bieu di Asiria, Egipto, Pèrsia i India ta mustra kriánan teniendo parasòl riba kabes di gobernantenan pa protehá nan kontra solo. Na Asiria, ta Rei so por tabatin parasòl.

Atraves di henter historia parasòl a keda komo un símbolo di poder, prinsipalmente na Asia. Mas parasòl un gobernante tabatin, mas haltu su rango tabata. Por ehèmpel, tabatin un rei di Birmania ku nan tabata yama Señor di e Bintikuater Parasòlnan. Tin biaha ta e kantidat di dèk di e parasòl tabata indiká e persona su importansia. Parasòl  di e emperador di China tabatin kuater dèk, i esun di e rei di Siam tabatin shete òf nuebe. Te awe parasòl ta un símbolo di outoridat na sierto paisnan oriental i afrikano.

Parasòl Religioso

For di trempan den su historia, parasòl a haña un konekshon ku religion. E egipsionan di antigwedat tabata kere ku e diosa Nut tabata tapa henter tera ku su kurpa, meskos ku un parasòl. P’esei nan tabata kana rònt ku nan propio “dak” portátil pa nan risibí su protekshon. Na India i China, nan tabata kere ku un parasòl habrí ta representá e kupel di shelu. E promé budistanan tabata usa parasòl komo símbolo di Buda, i hopi bes nan tabata pone un parasòl riba tòp di e kupel di nan monumentonan. Nan ta usa parasòl den hinduismo tambe.

Ya pa aña 500 promé ku nos era, hende a kuminsá usa parasòl na Gresia tambe. Nan tabata tene parasòl riba kabes di imágen di dios- i diosanan durante festivalnan religioso. E hende muhénan di Aténas tabata laga nan kriá tene parasòl riba nan kabes ora nan ta kana, pero mayoria hende hòmber no kier a usa algu asina. Di Gresia e kustumber a pasa pa Roma.

Iglesia Katóliko Romano a usa parasòl komo parti di nan artíkulonan seremonial. Papa a kuminsá presentá bou di un parasòl di seda strepiá hel i kòrá, miéntras ku esnan di kardinal i obispu tabata di koló lila òf bèrdè. Te dia djawe den basílikanan tin un stul pa Papa ku un ombrellone (un parasòl grandi) riba dje, na kolónan papal. E kardinal ku ta fungi komo kabes di iglesia den e periodo entre morto di un Papa i elekshon di esun siguiente, tambe tin un ombrellone komo su emblema personal.

Di Dunadó di Sombra pa Protekshon Kontra Áwaseru

Awendia nos ta hasi distinshon entre paraplü, ku ta kontra awa, i parasòl, kontra solo. Ta chinesnan, òf kisas muhénan romano di antigwedat, a kuminsá hunta nan parasòlnan ku zeta òf waks pa nan por sirbi kontra áwaseru. Pero e idea di usa un protekshon kontra solo òf áwaseru a disparsé na Europa, i ta te den siglo 16 italianonan, i despues fransesnan, a kuminsá usa nan atrobe.

Den siglo 18, hende muhé na Gran Bretaña a kuminsá kana ku paraplü, pero ainda hende hòmber tabata nenga di kana prònk ku un kos femenino asina. E úniko eksepshon riba esaki tabata e doñonan di kafé. Nan a mira e bentaha di tin un paraplü na man pa tapa nan klientenan kontra áwaseru ora esakinan tabata sali for di e negoshi pa drenta nan garoshi. Miembronan di klero tambe a haña nan hopi útil pa usa den santana si nan mester a hasi un sirbishi di entiero den áwaseru.

Ta Jonas Hanway, un biahero i filántropo, a kambia historia di paraplü na Inglatera. Nan ta bisa ku e ta e promé hòmber ku tabatin e kurashi di kana ku unu públikamente dor di Lònden. Durante su biahenan den eksterior el a mira hende hòmber ta usa paraplü, i p’esei e tabata determiná pa resistí e koredónan di garoshi di taksi rabiá ku tabata hasi bofon di dje i muh’é pa malu ku awa sushi di riol ora nan kore pasa banda di dje. Pa 30 aña largu bo por a mira Hanway regularmente kompañá pa su paraplü, i na 1786 ora el a muri, hòmber i muhé tabata kana rònt kontentu di nan ku nan paraplü.

 E tempu ei, usa paraplü a eksigí hopi esfuerso. Nan tabata grandi, pisá i difísil pa traha kuné. Nan tabata trahá di seda tratá ku zeta, òf di paña di bela, i nan spaknan i nan stèngel tabata sea di palu òf di wesu di bayena. Dor di esei nan tabata difísil pa habri ora nan ta muhá, i nan tabata lèk tambe. Tòg nan popularidat a sigui oumentá, prinsipalmente dor ku tabata mas barata pa kumpra un paraplü, ku pa hür un garoshi di taksi ora awa ta kai. A bin mas i mas trahadó di paraplü i tienda di paraplü, i inventornan a kuminsá buska manera di mehorá nan diseño. Meimei di siglo 19, Samuel Fox a haña derecho eksklusivo riba e modèl Paragon, ku tabatin un frame di stal fuerte pero no pisá. Telanan ménos pisá, manera seda, katuna i lino kubrí ku waks a bini na lugá di e telanan pisá di ántes. E paraplü moderno a nase.

Un Aksesorio di Moda

E tempu ei parasòl a bira masha popular komo un aksesorio di moda elegante pa damanan shik na Inglatera. E parasòl elegante di hende muhé a kambia ku moda, i a bira mas i mas grandi. Nan a kuminsá fur’é ku tur tipo di seda i satin di koló bibu. Hopi bes e parasòl tabata pas ku paña di e dama, i e tabata dekorá ku adorno di kanchi, fraña, sinta, streki i asta pluma. Pa basta tempu despues ku siglo 20 a kuminsá, niun dama respetabel ku kier a protehá su kútis blanku i delikado no tabata sali kas sin su parasòl.

Den añanan 20 di siglo 20, kútis kimá di solo a bin na moda, i parasòl a kasi disparsé. E ora ei a yega e era di e kabayeronan di stat. Parti di nan “unifòrm” tabata un sombré bòl, i un paraplü pretu será ku na mes momentu a wòrdu usá komo garoti yen di stail.

Despues di e di dos guera mundial, teknologianan nobo a hasi posibel pa mihó diseñonan di paraplü subi merkado, por ehèmpel e modèl ku ta dobla sera, i tambe esnan waterpruf di nailen, polièster i plèstik. Ta un par di negoshi so a sobra kaminda nan ta traha paraplü fini i karu na man. Pero awendia fábrikanan ta produsí paraplü na masa, barata, i na tur koló i tamaño, for di e stail grandi ku por tapa dos persona, i e modèl pa patio, te na e modèl di 15 centimeter ku ta dobla sera i pas den un tas di hende muhé.

Maske un tempu hende a yega di mira paraplü komo un luho i un símbolo di bo status, awendia kasi tur hende por afòrt unu, te ku e ta un di e artíkulonan ku hende ta pèrdè mas tantu. E ta un manera sumamente útil pa bo skapa di solo i áwaseru unda ku bo ta biba na mundu. I awor ku tin kada bes mas tantu atvertensia kontra kanamentu den solo, su uso original, esta, pa tapa solo, ta biniendo bèk na moda. Pues, kisas mas aweró ora bo ta sali kas, nan lo kòrda bo: “No lubidá bo brolly!”

[Nota]

[Kuadro/Plachi na página 20]

Teps pa Kumpra i Kuida Bo Paraplü

Bo mester disidí sea pa un paraplü kumbiniente òf unu resistente. E modèl mas barata ku ta dobla sera i ku ta pas fásilmente den un saku reimu di bo paña por tin ménos spak, pero e ta ménos resistente ora bientu ta supla duru. Di otro banda, e tipo konvenshonal ku no ta dobla bira chikitu por kosta mas tantu, pero por lo general e ta wanta bientu mihó, i e ta mas duradero. Un bon paraplü por dura bo hopi aña. Kua modèl ku bo skohe, kòrda proteh’é di beskein i frus dor di lag’é habrí pa seka kompletamente promé ku bo ser’é bèk. Dor di ward’é den su etuí e ta keda limpi i liber di stòf.

[Plachinan na página 19]

Un kriá ta tapa solo pa un rei asirio

Un hende muhé di antiguo Gresia ku paraplü

[Rekonosementu]

Pinturanan: The Complete Encyclopedia of Illustration/J. G. Heck

[Plachi na página 20]

Un parasòl, rònt di aña 1900

[Rekonosementu]

Culver Plachinan