Ondol—Un Sistema Úniko pa Keinta Kas

DI UN ESKRITOR DI SPIÈRTA! NA REPÚBLIKA DI KOREA

NOS ta pará pafó, temblando den e wenter friu di Korea. Un doño di kas ta smail i invitá nos pasa paden. Ora nos drenta, e airu ta agradabel; e ta keinta nos kurpa. Sin embargo, niun kaminda nos no ta mira un sistema di kalefakshon òf verwarming. Nos ta kita sapatu na entrada, anto ora nos pone pia riba flur, e ta kayente. Nos ta kai sinta riba e flur, pone nos mannan blou di friu riba dje, i nos ta sinti kon nan ta kuminsá keinta.

Na Korea, kasi tur kas tin e sistema di kalefakshon di flur aki. Nan ta yam’é ondol. Kon e sistema úniko aki di keinta kas ta traha, i ki impakto e tabatin riba estilo di bida di koreanonan? Promé ku nos kontestá e preguntanan ei, ban wak e historia di ondol tradishonal.

Historia di Kalefakshon di Flur

Historia di kalefakshon di flur a kuminsá for di promé ku Hesukristu a bini na tera. Hayasgonan arkeológiko i registronan históriko ta mustra ku kisas ta e romanonan di antigwedat ta e proménan ku a usa un sistema di kalefakshon di flur. * Entre siglo 4 i 5 di nos era, ya un sistema di kalefakshon di flur tabata popular na tur parti di e península koreano, i el a haña e nòmber ondol. E nòmber aki ta bini di dos lèter chines ku ta nifiká “kanal kayente.” Krónikanan di Dinastia Tang, un registro históriko chines, ta menshoná ondol den e siguiente pasashi: “Den wenter [koreanonan] tabata tene nan mes kayente dor di traha kanal largu i pasa kandela den nan.”

Kon Ondol Tradishonal Ta Funshoná

Tradishonalmente, e fuente di kalor den e sistema ondol ta un fogon. E fogon por ta sea den kushina, òf pafó kontra muraya di sala. Si un kushina tabatin dos òf tres fogon, por a keinta dos òf tres kamber banda di dje via e sistema ondol. Den un kushina koreano di ántes bo por a haña un òf dos wea grandi di heru riba fogon. Pues, e  mesun kandela ku nan tabata kushiná aros òf sòpi kuné, tabata sirbi pa keinta e kamber banda di kushina tambe! Efisiente, no?

Hopi bes nan tabata traha e kushina mas o ménos un meter mas abou ku e kamber ku tabata siendo keintá. Dor di e diferensia di haltura aki tabata fásil pa e huma i e airu kayente pasa bou di flur di e kamber mas na haltu. Huma bou di flur? Sí, esei ta e sekreto di ondol.

Kuminsando na e fogon, tabatin kanal horizontal ku ta kore bou di flur di un kamber i bin sali na e schoorsteen. Airu kayente di e kandela tabata pasa dor di e kanalnan i keinta e flur di piedra i tera. Esaki no tabata bai  asina fásil manera e ta zona. Pa hasi esei posibel, bo mester a logra dos kos ku normalmente ta traha kontra otro. Pa e kandela por kima bon, e huma ku e ta saka mester por pasa lihé dor di e kanalnan i sali via e schoorsteen sin strobansa. Kanalnan stret i kòrtiku ta permití esaki tuma lugá mihó. Pero pa e kayente di e kandela keinta e flur, e airu kayente i e huma tin ku keda mas tantu tempu posibel den e kanalnan. Pa nan logra esaki, nan tabata traha e kanalnan di tal manera ku nan tabata kubri henter e área bou di e flur. Asina e airu kayente no tabata sali muchu lihé via e schoorsteen. Si bo por a logra pone e airu move nèt na e velosidat korekto, ni muchu lihé ni muchu pokopoko, bo por a tene un kamber kayente henter anochi ku un kandela ku a kima un par di ora so.

Ta ser bisá ku tabatin un kamber di vários siglo bieu, keintá via e sistema ondol, ku tabata konserbá e kayente ku un efisiensia inkreibel. E diseño di e kanalnan tabata di tal manera ku e flur tabata keda bon kayente pa 45 dia largu despues di ser keintá un biaha so! Nan ta bisa ku 100 dia despues di keint’é, ainda bo por a sinti e flur un tiki kayente. Lamentablemente, e kamber ei a keda destruí durante e guera koreano na kuminsamentu di e dékada di 1950. Na 1982, ingenieronan a restorá e edifisio, i awor turista por bishitá e kamber ondol. E manera ku e kamber aki ta konserbá kayente no ta nada kompará ku e kamber original. Asina mes, despues di un solo keintá, e flur ta keda kayente 10 dia largu den lènte i hèrfst, i tres dia largu den wenter, asta ora temperatura ta mas friu ku 10 grado Celsius bou di sero.

Otro sekreto di e sistema di kalefakshon ondol ta e diseño di e flur mes. Promé ku pone e flur nan tabata traha kanal pa airu kayente. Nan tabata kubri e kanalnan ku piedra delegá plat, di mas o ménos seis centimeter diki. Komo ku di mes e flur ta mas kayente serka di e fogon, nan tabata pone piedra mas diki ei banda pa evitá e kayente di bai pèrdí. Despues nan tabata pone klei hel riba e piedranan, i kaba nan tabata hasi e flur pareu. Finalmente nan tabata kubri e flur dor di plak vários kapa di papel di waks riba dje.

Den un kamber keintá ku e sistema ondol tradishonal, e flur tabata ménos kayente n’e banda ku ta mas leu for di e fogon. P’esei, nan tabata laga hende grandi, por ehèmpel mayornan i welanan i bishita, sinta n’e parti mas kayente. Tabata un manera di mustra rèspèt.

Kambernan keintá via e sistema ondol tradishonal n’e parti nort di e península koreano no tabata presis meskos ku esnan den zùit. Den nort no tabatin un muraya entre e kushina i e kamber keintá dor di e sistema ondol. Tantu e flur ondol komo e kayente di e fogon tabata tene e kamber kayente. Kasnan den zùit tabatin un muraya pa separá kushina i sala, pa huma no molestiá hende den sala.

Tradishonalmente koreanonan tabata usa palu komo kombustibel p’e tipo di fogon aki. P’esei, promé ku nan start e ondol nan tabata montoná palu banda di e fogon. E ora ei nan tabata usa sea papel òf yerba seku pa start e kandela. Tin bes nan tabata usa karbon tambe. Pero den siglo 20, koreanonan a kuminsá kumpra klòmpi di karbon komprimí.  Klaru ku mantenshon ta esensial pa un kamber ondol. Si bin krak den e flur, e gas koolmonoxide por filtra drenta e kamber, i esaki por asta resultá den morto.

Ondol Moderno

Awendia, masha poko bo ta topa e sistema ondol tradishonal den kasnan koreano. Na su lugá, kasnan moderno i edifisionan haltu di flèt ku ta usa ondol tin un sistema di kalefakshon di flur ku ta usa awa kayente den pipa na lugá di airu kayente pa keinta e flur. Ta interesante ku no ta koreanonan a desaroyá e sistema aki.

Nèt na komienso di siglo 20, e famoso arkitekto merikano Frank Lloyd Wright tabata trahando un hotèl na Hapon, i nan a invit’é na kas di un noble hapones. Ei Wright a topa un kamber ku tabata diferente for di e kambernan hapones típiko. E flur tabata kubrí ku papel hel, i e tabata kayente. Tabata un kamber ondol koreano! E kabayero hapones a konosé ondol na Korea, i e no por a lubid’é mas. P’esei, ora el a bai bèk Hapon el a laga traha un kamber ondol den su kas. Wright a keda impreshoná. Den su palabranan: “Bo no por splika kon agradabel ta pa haña kayente di abou.” Mesora el a disidí ku ondol ta e sistema di kalefakshon ideal, i el a kuminsá us’é den su edifisionan. Ta Wright a inventá e sistema di kalefakshon di flur ku ta usa awa kayente via pipa en bes di airu kayente via kanal.

E sistema nobo aki a pas hopi bon ku e estilo di bida di e koreanonan di e tempu ei. Unabes ku e sistema mas simpel aki a yega Korea, el a gana popularidat masha lihé. Aktualmente, kasi tur kas koreano tin e.

Ondol i Estilo di Bida

Ondol tabatin un gran impakto riba estilo di bida di koreanonan. Por ehèmpel, debí ku e flur ta muchu mas kayente ku e airu den kas, di mes tur hende ta preferá sinta riba e flur kayente ku riba stul mas friu. P’esei, koreanonan ta sinta, kome, kòmbersá i drumi riba flur. Pa tene e flur asta mas kayente, tin bes nan ta tap’é ku un deken diki ku nan ta yama ibul. Ora e miembronan di famia yega for di riba kaya, nan tur ta hinka nan pianan friu bou di e deken pa nan disfrutá di e kayente; un bon manera pa sera mas ku otro komo famia!

Dor ku estilo di bida koreano tin kada bes mas influensia oksidental, e generashon mas yòn ta preferá di sinta riba stul na mesa, i drumi riba kama. Tòg, mayoria koreano ta preferá e kalor agradabel di un flur ondol, ku su sistema di kalefakshon ku awa kayente. Si bo bishitá Korea, sin duda lo bo disfrutá di e sistema úniko aki pa keinta kas: ondol.

[Nota]

[Diagram/Plachi na página 15]

(Pa e teksto den su formato kompleto, wak e publikashon)

Sistema di kanal, mirá di ariba

1 Fogon

2 Kanalnan horizontal

3 Schoorsteen

→ → 2 → →

→ → 2 → →

→ → 2 → →

● 1 → → 2 → → ● 3

→ → 2 → →

→ → 2 → →

→ → 2 → →

[Plachinan]

Nan tabata usa un fogon pa kushiná i pa keinta e kamber na banda

Un bon sistema di schoorsteen i kanal den flur tabata esensial pa un “ondol” efisiente

[Rekonosementu]

Lugá: Pueblito Koreano Tradishonal

[Plachi na página 16, 17]

Den un kamber “ondol” nan ta laga hende mas grandi sinta na e parti mas kayente

[Rekonosementu]

Lugá: Pueblito Koreano Tradishonal