Tahiti i e Búskeda di Paradeis

Pa hopi dia olanan di Laman Pasífiko a suta e barku. Den e higra di solo, e nabegantenan tabata ripití inkansablemente e mesun rutina monótono. Sin duda nan tabata hartá di e biña marga, di e awa bombá i di kuminda dañá. Diripiente un di nan a grita: “Tera! Tera nos dilanti na man robes ayá!” Leu ayá nan por a mira e punta vago di un isla. Un par di ora despues, no tabatin duda mas: nan a yega un isla.

 For di dia europeonan a mira Tahiti pa promé bes, el a bira sinónimo di e palabra “paradeis.” E eksploradó franses di siglo 18, Louis Antoine de Bougainville, kende a guia e ekspedishon deskribí na kuminsamentu, a skirbi despues: “Den mi pensamentu ta den e hòfi di Edén mi a yega.” Dos siglo despues ainda Tahiti ta atraé bishitante. Meskos ku esnan ku a bai mas promé, hopi hende ta bini en buska di paradeis.

Pero pakiko hende ta asina fasiná ku e soño di paradeis? I dikon nan a mira Tahiti komo e realisashon di e soño ei? Laga nos bai bèk na kuminsamentu di hende su eksistensia pa haña sa e kontestanan.

Paradeis Pèrdí

No ta pòrnada e palabra “paradeis” ta resoná den nos orea, pasobra simplemente nos a wòrdu kreá pa biba den Paradeis! Segun Beibel, Dios a bendishoná nos promé mayornan ku un hogar ku a wòrdu deskribí komo un “paradeis”—un bunita parke òf hòfi. (Génesis 2:8) Aparentemente e parke aki tabata okupá parti di e region ku yama Edén, ku ta nifiká “Plaser.” Ounke e sabionan di aktualidat tin tendensia di mira Edén komo un mito, Beibel ta present’é komo un realidat históriko i ta duna detayenan konfiabel di unda e tabata situá originalmente.  (Génesis 2:10-14) Dos riu, esta Pison i Gihon, ku lo por a yuda nos haña sa unda e hòfi tabata, no ta eksistí mas, p’esei e sitio eksakto di e hòfi ta deskonosí.

Nos promé mayornan a rebelá kontra Dios i p’esei nos tur a pèrdè Paradeis. (Génesis 3:1-23) No opstante, hende no por a eliminá e deseo pa paradeis for di nan kurason. Den mitologia di hopi pais tin karakterístikanan di e relato di Beibel tokante dje. Por ehèmpel, e griegonan a desaroyá e mito di un Époka di Oro, esta, un tempu ideal ku humanidat a hiba un bida trankil i pasífiko.

Vários hende a purba haña e Edén ku hopi tempu pasá a bai pèrdí. Algun a buska Edén na Etiopia, sin éksito naturalmente. Segun leyenda un pastor di siglo seis ku yama Brendan a haña paradeis riba un isla den sùitwèst di Laman Atlántiko. Otro leyendanan a pretendé ku paradeis tabata skondí riba un seru haltu. Frustrá ku e kontradikshonnan dje leyendanan aki, e famoso eksploradó Cristoffel Columbus a lamentá: “Mi no a haña ni nunka mi no a lesa un teksto latin òf griego ku a bisa ku tur siguransa den ki skina dje planeta aki por haña e paradeis.” Ku tempu, el a haña e konvikshon ku e tabata situá un kaminda na sùit di ekuator.

Despues di su terser biaha p’e Mundu Nobo, Columbus a bisa: “E tera aki ta parse e paradeis, pasobra e ta kuadra ku e deskripshon di e santunan i e teólogonan erudito ku mi a menshoná.” Sin embargo, e Mundu Nobo no tabata e paradeis ku Columbus a imaginá.

Utopianan di Futuro

No opstante, algun erudito no a laga nada stroba nan. En bes di promové e idea di bai Edén bèk, nan a bini ku e konsepto di un futuro Paradeis ku hende a traha. Eskritornan a kuminsá plama kuentanan di komunidatnan “perfekto”—un kontraste ideal p’e komunidatnan korumpí den kua nan tabata biba. Sin embargo, ningun di e konseptonan imaginario aki tabata berdaderamente manera Edén. En bes di imaginá nan un bida di libertat den un parke sin frontera, e personanan ku a bini ku e konseptonan aki a soña di un paradeis den forma di un stat bon organisá. Den siglo 16 por ehèmpel, e estadista britániko Sir Thomas More a konta di un biahe imaginario pa un tera ku el a yama Utopia. E palabra aki ta nifiká “niun kaminda.”

Eskritornan ku a bini despues a bòrda riba e ideanan di More dor di agregá algun di nan mes ideanan. Durante e siguiente siglonan hopi eskritor europeo a inventá nan mes “utopianan.” Atrobe, e komunidatnan “ideal” imaginario aki sigur no tabata hardinnan di plaser. E promotornan di Utopia a purba mustra kon felis e hendenan por ta dor di imponé reglanan estrikto. Pero ku esei nan a frena hende su kreatividat i libertat. No opstante, manera e profesor di historia Henri Baudet a remarká, e soñonan di un komunidat ideal a revelá un “deseo kontinuo pa un mihó bida . . . i un komunidat mas hustu.”

Tahiti—Orígen di un Leyenda

Den siglo 18, e lamannan bírgen di zùit a ofresé eksploradónan un último chèns di deskubrí un paradeis. Pero ora Bougainville a nabegá bai den direkshon di Laman Pasífiko na desèmber 1766, su motibunan tabata prinsipalmente pa eksplorá, konkistá kolonianan nobo, i habri merkadonan nobo.

Despues di a pasa lunanan largu riba laman, Bougainville a deskubrí Tahiti. E no por a tira anker n’e otro islanan ku el a mira pasobra ref di koral a strob’é di yega serka. Na Tahiti sí e por a baha sin problema. Ei e nabegantenan morto kansá a topa un pueblo amigabel i un isla ku hopi rikesa natural. Loke nan a mira aparentemente a surpasá nan imaginashon. Tahiti tabata un paradeis tropikal i hopi di su karakterístikanan a parse esnan di e utopianan di imaginashon.

Por ehèmpel, Tahiti tabata un komunidat di isla meskos ku e teranan di utopia ku hende tabatin den nan imaginashon. Ademas, en bèrdat e tabata parse un paradeis. Su paisahe natural pintoresko, riku na vegetashon, a konta ku sentenáres di waterval i riu di awa ku ta kore rápido. Mata i palu bèrdè a krese i bona den naturalesa. E klima saludabel di Tahiti i ousensia di e peligernan ku ta típiko pa paisnan tropikal a  duna mas realse n’e bunitesa di e isla aki. No tabatin kolebra, ni insekto peligroso ni volkan aktivo riba e isla aki.

Anto tabatin e tahitianonan mes tambe—hende haltu, bon tipo i saludabel. Nan djentenan blanku a impreshoná e nabegantenan ku a pèrdè djente riba laman i ku tabatin nan karni di djente tur hinchá debí na e malesa di ‘scheurbuik.’ Tambe e habitantenan tabata hende alegre; masha lihé nan a atraé e nabegantenan ku nan hospitalidat. Ademas, por lo ménos na promé bista, a parse ku tur e tahitianonan tabata igual—un dje karakterístikanan básiko di literatura tokante utopia. Nan no tabata konosé pobresa. E tahitianonan a biba sin restrikshon seksual. En bèrdat, e nabegantenan a tene relashon inmoral ku algun di e bunita mucha muhénan tahitiano.

Sí, pa Bougainville i su nabegantenan, Tahiti a parse un Edén rekobrá. P’esei el a bandoná e isla, ansioso pa konta mundu tokante e paradeis ku el a deskubrí. Ora el a kompletá su biahe di tres aña rònt mundu, el a publiká un buki di su aventuranan. E best-seller aki a plama e mito ku e isla eksótiko tabata perfekto den tur sentido. Paradeis a bai pèrdí, pero tur kos a mustra ku ta Tahiti tabata e berdadero Paradeis ku hende por a disfrutá di dje awor!

E Peligernan di un Mito

Pero hopi bes mitonan ta choka ku realidat. Por ehèmpel, e tahitianonan a sufri di enfermedat i muri meskos ku tur otro hende. I no ta tur tabata igual pasobra tabatin diferente nivel sosial i na dado momentu nan a biba bou di un gobernashon estrikto ku tabata asta opresivo. Tabatin guera entre e tribunan i nan tabata ofresé sakrifisio humano. Meskos ku hende en general, no ta tur tahitiano tabata un beyesa òf tabatin nèchi tipo. I e historiadó K. R. Howe ta kere ku e muhénan ku Bougainville su hòmbernan a topa probablemente a wòrdu “mandá pa sirbi komo prostituta” pa hasi e invasornan kontentu.

Tòg, e mito di “paradeis hañá” a plama mas i mas. Eskritornan i artistanan, manera e pintor franses Paul Gauguin, a basha bai ayanan. E manera kolorido ku Gauguin a deskribí bida na Tahiti a yuda oumentá e popularidat di e isla. Ku ki konsekuensia pa Tahiti? E mito a pinta un konsepto demasiado simplifiká di e isla i su habitantenan. Ora ku hende bai Tahiti i despues regresá kas, un dje preguntanan ku nan ta haña semper ta: “Konta nos di bo aventuranan ku e muhénan di Tahiti.”

Paradeis—Un Speransa Pèrdí?

Den añanan resien Tahiti a pasa den mas problema. Siklon a suta e isla na kuminsamentu di dékada 80 di siglo pasá, dañando su refnan di koral. Pero e menasa mayor a bini di hende mes. Proyektonan di konstrukshon a kousa eroshon di tera i kontaminashon. Donna Leong, un eksperto riba maneho di sushi, ta bisa: “E industria di turismo ta generá gran kantidat di sushi. . . . Si Tahiti i e otro islanan no kuida nan medio ambiente, nan lo no ta e tera di un flora i founa abundante ni lagonan blou manera kristal mas.”

No opstante, e speransa di un paradeis restorá ta leu for di morto, pasobra Hesukristu mes a primintí un malechor repentí: “Lo bo ta serka mi den Paraiso”! (Lukas 23:43) Hesus no tabata refiriendo na un utopia rígido, manera hende ta imaginá nan, sino na un paradeis mundial, supervisá pa un gobièrnu selestial. * E mas ku 1.700 Testigunan di Yehova na Tahiti ta pone nan speransa den e futuro Paradeis aki. Nan ta ofresé nan tempu pa kompartí e speransa ei ku nan próhimo. Ounke e bunita isla di Tahiti tin hopi karakterístika di un paradeis, e no ta nada na komparashon ku e Paradeis mundial ku Dios lo trese pronto. E búskeda p’e Paradeis aki no ta en bano.

[Nota]

[Plachi na página 24]

Tahiti tabata parse un paradeis di enkanto

[Rekonosementu]

Pintura di William Hodges, 1766

Yale Center for British Art, Paul Mellon Collection, USA/Photo: Bridgeman Art Library

[Plachi na página 25]

Tahitianonan amigabel a mustra hospitalidat na Bougainville

[Rekonosementu]

Ku pèrmit di National Library of Australia NK 5066

 [Plachi na página 26]

Pa Testigunan di Yehova ta un plaser pa papia ku nan próhimo tokante e Paradeis ku lo bini pronto

[Rekonosementu pa Potrèt na página 25]

Potrèt pa kortesia di Tahiti Tourisme

[Rekonosementu pa Potrèt na página 27]

Página 26: Hende sintá den kanoa, waterval, i background: Potrètnan pa kortesia di Tahiti Tourisme