Un Baño di Souna—Ántes i Awor

PA SIGLONAN vários kultura a disfrutá di un baño di souna, esta, un baño pa pone hende soda. Tin hopi tipo di souna, por ehèmpel e indjannan di Norteamérika tin inipi, rusonan tin bania, turkonan tin hamman i haponesnan tin mushiburo.

Tambe tabatin e bañonan di antiguo Roma, ku a inkluí un kamber kayente i un kamber di stom. Entre e bañonan romano di mas bunita i luhoso ku nan a koba saka ta e bañonan di Caracalla. Nan a abarká un área di 11 hèktar i por a akomodá 1.600 persona.

Nos ta invitá bo pa ban analisá dos tipo di baño pa pone bo soda ku awe ainda ta wòrdu usá. Unu ta e temescal di Mexico. E otro ta e souna di Finlandia, i kisas despues di lesa tokante dje lo bo ke asta purb’é!

Temescal

Na Mexico, promé ku e kolonisashon spañó, e pueblonan asteka, zapoteka, miksteka i maya a usa e baño di souna temescal. Nan a us’é pa propósitonan terapéutiko i pa purifikashon, manera den kaso di ritonan ora alkansá madures, tambe parto, entiero di un famia i otro seremonianan di tribu. Temescal ta bini di temazcalli, un palabra di e idioma indjan nahuatl, ku ta nifiká “kas di baña.” E temescal tabata un struktura trahá di klenku den forma rektángulo òf rondó ku un dak bòl. Den dje nan tabata keinta piedranan volkániko i produsí stom dor di basha te di yerba, manera romero [rozemarijn] i eukalipto, riba e piedranan. Suavemente nan tabata bati kurpa di e persona tumando e souna ku matanan ritual òf medisinal, i na final di e seremonia nan a sprengu awa friu riba dje.

 E fraternan spañó a lucha kontra e kustumber aki debí ku nan a konsiderá bañamentu di hende hòmber ku hende muhé huntu komo inapropiá. No opstante, temescal a keda eksistí i ainda ta ser usá den sierto partinan di Mexico, prinsipalmente pa baña, pa haña alivio di malesa òf pa rekuperá despues di parto. Sin embargo, tin un kresiente interes pa rebibá e aspektonan tradishonal religioso di temescal komo parti di e herensia kultural di e pais.

E Souna di Finlandia

Kisas e baño pa pone bo soda ku ta mas konosí ta e souna di Finlandia. De echo, “souna” ta un palabra finlandes. Na Finlandia e baño di souna ta eksistí pa mas o ménos 2.000 aña, i e proménan tabata konsistí di djis un buraku tapá den suela ku un kandela meimei òf den huki. E tiponan di souna pafó di kas den un kasita a kuminsá aparesé na prinsipio di siglo 12 di nos era.

Awendia na Finlandia kasi tur kas tin un souna, furá ku palu i ku ta wòrdu keintá ku koriente òf ku palu. Den kabañanan i áreanan di kunuku ainda ta masha normal pa hende tin souna ku ta usa un kagel ku ta kima palu. Sea ku nan ta usa koriente òf palu, semper nan ta pone un kapa di piedra riba e kagel. Bo ta oumentá e humedat den e souna dor di usa un kuchara di sòpi pa basha awa riba e piedranan kayente. Un diferensia importante entre e souna finlandes i e bañonan romano òf turko ta ku mayoria souna finlandes ta furá i mueblá ku palu. Komo ku palu kasi no ta transmití kayente, bo por haña temperaturanan haltu sin ku hende den e souna ta kima nan kurpa na e banki, na muraya òf kaminda mester tene pa subi òf baha.

Souna ta un parti asina integral di kultura finlandes, ku segun kálkulonan tin 1 souna pa kada 3 finlandes. Mayoria finlandes ta tuma un souna un biaha pa siman. Den zomer, ora ku mayoria hende ta pasa nan fakansi kantu di un lago, hopi di nan ta tuma un souna kasi tur dia! Por lo general e tumadó di souna ta interkambiá entre dal un souna kayente i tira un kabes den e awa friu di e lago. Pa esnan ku henter aña ta gusta e sistema aki di kayente bai friu i visevèrsa, tin kantidat di souna situá serka di awa di fris kaminda nan ta tene un buraku habrí den e eis pa bo por djis tira un kabes.

Benefisionan di Souna

E finlandesnan tin hopi tempu ta promové souna pa e benefisionan ku e tin riba hende su salú. Un proverbio finlandes ta bisa: “Souna ta e botika di hende pober.” Sí, fuera di ta un lugá pa baña, souna a sirbi komo un tipo di hospital i kraamkliniek te ku siglo 19.

Un baño di souna normalmente ta dura 10 pa 15 minüt pa kada seshon i na un temperatura di 80 pa 100 grado Celsius. Hopi tumadó di souna ta gusta hasi vários seshon, i ta sosegá òf dal un ducha entre kada seshon. Stimulá dor di e kayente, nan sirkulashon di sanger ta oumentá, porionan ta habri i e kurpa ta kuminsá soda saka sushi manera zür di lechi, produsiendo un efekto purifikante. Hopi bes hende ta tuma un souna pa aliviá doló di kurpa despues di ehersisio i tambe pa aliviá alergia, fèrkout i doló di artrítis. Ounke opinionnan ta varia tokante e benefisionan aki pa hende su salú, amantenan di souna ta bisa ku e baño ei ta laga bo sinti bon, fit i limpi. Tin hende ta gusta tuma un souna na fin di dia pa su efekto trankilisante i relahante. Otro hende ta haña ku e interkambio entre kayente ku friu ta renobá nan vigor, i p’esei nan ta preferá di tuma e souna den dia. *

Souna ta birando mas i mas popular rònt mundu, foral den hotèl i fasilidatnan deportivo. Pero at’akí un palabra di koutela: Desafortunadamente, nan ta usa e palabra “souna” den algun pais pa referí na sierto lugánan di prostitushon. P’esei, hasi sigur ku e souna ku bo ta bai bishitá ta ègt un souna, usá pa propósitonan desente.

Na algun lugá e souna no ta funshoná manera mester ta. Por ehèmpel, si e kagel no tin e kantidat adekuá di piedra i bo ta basha awa riba dje, esei por krea diripiente hopi stom ku por resultá hopi inkómodo. Tambe, awa por lèk riba e kandela òf riba e wayanan di koriente i ku tempu daña e kagel. P’esei, semper hasi sigur ku nan ta sigui e instrukshonnan di fábrika i ku e souna ta ser tené limpi i bon ventilá. Si bo tin akseso na un souna ku ta kumpli ku e rekisitonan aki, podisé lo bo ke purba e baño moderno i tòg antiguo aki.

[Nota]

 [Kuadro/Plachinan na página 23]

Algun Tep pa ora di Tuma Souna

● Evitá alkohòl i kuminda pisá promé ku e souna.

● Kuminsá ku un ducha.

● Sinta riba un sèrbètè.

● Kòrda ku mas abou e banki ta, mas fresku e temperatura ta.

● Ahustá e humedat dor di basha kada biaha un tiki awa riba e piedranan di e kagel.

● No partisipá ora hende ta pusta ken por wanta e temperatura di mas kayente òf ken por keda mas largu.

● Tuma un ducha fresku na final.

[Plachi na página 21]

Bañonan di Caracalla na Roma

[Rekonosementu]

Kortesia di James Grout/ Soprintendenza Archeologica di Roma

[Plachi na página 21]

Un baño di souna “temescal”