Desaster Riba Laman—Tragedia Riba Tera

DI UN ESKRITOR DI SPIÈRTA! NA SPAÑA

DIA 13 di novèmber 2002 a surgi un desaster ekológiko i ekonómiko, ora ku den laman brutu e tankero Prestige a haña un lekage. Esfuersonan pa reskatá e barku ku a sufri daño a frakasá, i despues di seis dia—durante kua kasi 20.000 tòn di fuel oil (un tipo di kombustibel pisá) a lèk—e tankero finalmente a kibra na dos i senk rònt di 200 kilometer pafó di kosta di Spaña.

E tankero a bai abou ku mas ku 50.000 tòn di fuel oil, i a sigui lèk rònt di 125 tòn pa dia. Kada bes tabata forma mancha nobo di zeta i no por a evitá ku esakinan tabata drif yega kosta. Dor ku e kombustibel pisá aki ta sumamente pegahoso i venenoso, su impakto riba medio ambiente tabata hopi desastroso.

E gasnan ku e tabata produsí a stroba hopi boluntario ku a purba limpia e playanan. Ademas, e fuel oil a forma un kapa diki di breu ku a pega riba e barankanan meskos ku bals pretu. Michel Girin, direktor di e Sentro di Dokumentashon, Investigashon i Eksperimentonan Riba Polushon Aksidental di Awa, a lamentá: “E ta un di e pió deramenan di kombustibel den historia.”

Esfuersonan Heroiko

Pa simannan largu, sentenáres di piskadó tabata subi laman pa kombatí mancha di zeta ku a pone nan pan di kada dia na peliger. E piskadónan a lucha heroikamente pa saka e zeta promé ku esaki por a hasi nan playanan pretu i ruiná un di e regionnan mas riku na piská na mundu. Algun hòmber tabata saka klòmpi di lodo di gris ku man for di awa. Segun Antonio, un piskadó lokal, “tabata un trabou hopi duru, pero nos ku tabata den boto chikitu no tabatin otro opshon.”

Miéntras e piskadónan a lucha duru pa eliminá e fuel oil riba laman, míles di boluntario for di rònt Spaña a bin duna un man ku limpiesa dje playanan. Den nan ketelpak blanku desechabel i ku masker bistí, nan a keda manera hende ku tabata hibando un guera biológiko. Nan tabatin e trabou duru di hisa e zeta ku skòp i bash’é den  hèmber pa hiba otro kaminda. Meskos ku e piskadónan, tabatin algun boluntario ku a usa asta nan mannan pa eliminá e zeta ku a susha e playanan.

Efektonan Desastroso

“Mi a kere sigur ku lo mi a muri di tristesa ora mi a mira e olanan pretu benta petroli kontra e waf na Muxía,” segun Rafael Mouzo, e alkalde di Corcubión na nort Galicia. Ei e kosta a keda un desaster kompleto. “E derame a afektá pan di masha hopi hende den nos pueblo.”

Lamentablemente, e bunita parke nashonal nobo di Spaña, Las Islas Atlánticas, a sufri gran parti di e daño di un dje manchanan di zeta. Kolonianan inmenso di para di laman tabata traha nan nèshi riba e sinku islanan aki ku anteriormente tabata ‘bírgen,’ pafó di e kosta di Galicia. E awanan plat rònt di e islanan aki tabata hopi riku na vários tipo di bestia di laman.

Pa kuminsamentu di desèmber, 95 porshento di e kosta dje parke tabata kontaminá ku fuel oil. Ekspertonan di para a kalkulá ku mas o ménos 100.000 para lo keda afektá. Sambuyadónan a mira asta klòmpinan grandi di krudo ku a bira duru den fondo di laman i ku ta kousa daño n’e eko-sistema delikado di bou di awa.

Jay Holcomb, kende a lanta un sentro pa reskatá para, a informá: “Por lo general, e paranan ta muri sea hogá òf dor ku nan temperatura di kurpa ta baha bou di normal. Zeta ta papa tur e plumanan i kaba ku nan sistema di isolashon i resistensia kontra awa. Ademas, e zeta pisá ta hundi nan, meskos ku paña papa muhá por hundi un landadó. . . . Ta un fuente di gran satisfakshon pa reskatá algun para, asta si e kantidat ta relativamente chikitu.”

“Un Aksidente Ku Por Sosodé un Ora pa Otro”

Mundu ta dependé riba kombustibel pa haña energia, pero pa mantené e gastunan abou, hopi bes nan ta transportá esaki den barkunan peligroso i mal mantené. P’esei The New York Times a deskribí e situashon ei komo “un aksidente ku por [a] sosodé un ora pa otro.”

Prestige ta e di tres tankero ku a senk dilanti kosta di Galicia den e último 26 añanan. Rònt di dies aña pasá, e barku Aegean Sea a senk banda di La Coruña den nort Galicia i 40.000 tòn di krudo a bin resultá den laman. Ainda tin partinan grandi di e kosta eibanda ku no a rekuperá. I na 1976 e barku Urquiola a senk den e mesun laman, kousando un derame desastroso di mas ku 100.000 tòn di krudo.

En konekshon ku e último desaster, Union Europeo a disidí di prohibí tur tankero di kombustibel ku no tin un ‘kaska’ dòbel. Pero ta di wak ainda si e medida ei lo ta sufisiente pa protehá e kosta asotá di Europa.

Tur kos ta mustra anto ku gobièrnunan humano no por garantisá un mundu liber di kontaminashon—sea di mancha di zeta, desperdisio venenoso òf kontaminashon atmosfériko. Sin embargo, kristiannan ta anhelá e tempu ora e Reino di Dios lo supervisá e transformashon di nos planeta den un paradeis ku nunka mas lo wòrdu kontaminá.—Isaias 11:1, 9; Revelashon 11:18.

[Plachi na página 20, 21]

Prestige a bai abou ku 50.000 tòn di fuel oil

[Rekonosementu]

AFP PHOTO/DOUANE FRANCAISE