E Punto di Bista Bíbliko

Dios Ta Bendishoná Nos ku Rikesa?

“Ta e bendishon di SEÑOR ta hasi riku, i e no ta agregá tristesa na dje.”—PROVERBIONAN 10:22.

ETEKSTO bíbliko menshoná aki riba ta nifiká ku Dios ta bendishoná su sirbidónan ku rikesa material? Tin hende ta pensa ku sí. Wak kiko un outor oustraliano ku ta predikadó pentekostal a bisa: “Den [mi] buki mi ta bai konta boso dikon boso tin mester di mas plaka i tambe kon boso por logra haña mas plaka . . . Si boso por kambia boso manera di pensa i haña un aktitut korekto relashoná ku plaka, mi ta kere ku boso lo kana den e bendishon i prosperidat di Dios i boso lo no tin problema ku plaka nunka mas.”

Esei lo nifiká ku hende pober no tin e fabor di Dios. Pero prosperidat material realmente ta un indikashon ku un hende tin e bendishon di Dios?

Bendishoná pa un Sierto Propósito

Beibel ta menshoná kasonan den kua Dios a bendishoná sirbidónan fiel ku rikesa. Por ehèmpel, ora Jakòb a bai for di su kas, el a bai ku su garoti so pero 20 aña despues el a regresá ku sufisiente karné, baka i buriku pa forma dos kampamentu. Segun Beibel, Jakòb su prosperidat tabata un regalo for di Dios. (Génesis 32:10) Wak un otro ehèmpel: Maske Jòb a pèrdè tur su poseshonnan, Yehova a bendishon’é despues ku “dieskuater mil karné, seis mil kamel, mil yugo di bue i mil buriku yewa.” (Jòb 42:12) I den e kaso di Rei Salomon, Yehova a dun’é asina tantu rikesa ku te awe ainda hende ta papia tokante esaki.—1 Reinan 3:13.

Di otro banda, Beibel ta papia di vários adoradó di Dios ku tabata fiel i obediente, pero tòg pober. Definitivamente, Dios no tabata kastigá algun hende ku pobresa miéntras e tabata bendishoná otronan ku prosperidat. Pero, dikon  Dios tabata duna hende rikesa den algun kaso?

Kada kaso tin un kontesta diferente. Jakòb su poseshonnan material a forma un base pa edifiká un nashon, komo preparashon pa e binida di e Simia primintí. (Génesis 22:17, 18) Jòb su prosperidat a indiká klaramente ta ken a trese kalamidat riba Jòb i di e manera ei Yehova su nòmber a wòrdu santifiká. (Santiago 5:11) I Salomon a usa un gran kantidat di e rikesa ku Dios a yud’é haña, pa traha un tèmpel magnífiko. (1 Reinan 7:47-51) Ta interesante pa mira ku Yehova a usa Salomon tambe pa skirbi di eksperensia tokante e balor limitá di rikesa.—Eklesiastés 2:3-11; 5:10; 7:12.

E Manera Ku Dios Ta Bendishoná Nos

Hesus a siña su siguidónan pa nan tin un aktitut sano relashoná ku plaka ora el a bisa nan pa “no preokupá” tokante kos material. El a rasoná ku nan ku ni Salomon den tur su gloria no tabata bistí manera e lelinan di sabana. Ademas, Hesus a bisa: ‘Si Dios ta bisti e yerba di sabana, lo e no hasi muchu mas pa boso, o hendenan di poko fe?’ Hesus a sigurá su siguidónan ku si nan buska e Reino i Dios su hustisia promé, e ora ei kuminda, paña i lugá di biba lo wòrdu añadí na nan. (Mateo 6:25, 28-33) Kon e promesa ei ta ser kumplí?

Ora kristiannan ta sigui e konseho di Beibel, esei lo resultá prinsipalmente den bendishonnan spiritual. (Proverbionan 10:22) Pero tambe e ta trese otro benefisionan. Por ehèmpel, e Palabra di Dios ta instruí kristiannan: “Laga esun ku ta hòrta, no hòrta mas; ma mas bien, lag’é traha.” (Efesionan 4:28) Tambe Beibel ta bisa ku “esun ku traha ku man negligente ta bira pober, ma man di e balente ta hasi riku.” (Proverbionan 10:4) Hopi bes doñonan di trabou ta preferá kristiannan onesto i trahadó ku ta sigui e konseho bíbliko aki. Esaki por ta un bendishon.

Ademas Beibel ta siña kristiannan pa no hunga wega di plaka ya ku esaki ta pone hende bira haragan, no huma pasobra esaki ta kontaminá hende, no bebe di mas pasobra esaki ta hasi un hende débil. (1 Korintionan 6:9, 10; 2 Korintionan 7:1; Efesionan 5:5, BPK) Esnan ku sigui e konseho aki lo ripará ku nan gastunan ta baha i nan salú ta mehorá.

Mas Balioso ku Plata i Oro

Tòg hende no por dependé riba prosperidat material komo e úniko indikashon di Dios su aprobashon òf bendishon. Por ehèmpel, Hesus a mustra ku e kondishon spiritual di algun kristian na Laodisea no tabata bon ora el a bisa nan: “Bo ta bisa: ‘Mi ta riku, mi ta bon pará i no tin mester di nada,’ i bo no sa ku bo ta deplorabel i miserabel, pober, siegu i sunú.” (Revelashon 3:17) Di otro banda, na e kristiannan di Smirna ku tabata materialmente pober pero spiritualmente bon, Hesus a bisa: “Mi konosé bo tribulashon i bo pobresa—sin embargo, bo ta riku.” (Revelashon 2:9) E kristiannan aki probablemente a sufri pèrdida finansiero na man di nan persiguidónan pa motibu di nan fieldat, pero nan tabatin rikesa muchu mas balioso ku plata i oro.—Proverbionan 22:1; Hebreonan 10:34.

Yehova Dios ta bendishoná e esfuerso di esnan ku ta hasi nan bèst pa kumpli ku su boluntat. (Salmo 1:2, 3) E ta duna nan e forsa i sosten nesesario pa trata ku problema, pa perkurá pa nan famia i pa buska su Reino promé. (Salmo 37:25; Mateo 6:31-33; Filipensenan 4:12, 13) Kier men, en bes di mira kosnan material komo Dios su bendishon prinsipal, kristiannan berdadero ta hasi esfuerso pa ta “riku den bon obra.” Dor di kultivá un relashon íntimo ku e Kreadó, kristiannan ta “montoná pa nan mes e tesoro di un bon fundeshi pa futuro.”—1 Timoteo 6:17-19; Marko 12:42-44.