E Banda Skur di Enkanto Físiko

NO TIN duda ku sigui moda, por yuda bo mehorá bo aparensia i duna bo mas konfiansa den bo mes. Paña ku ta para bo bon por minimisá algun defekto físiko i asta realsá bo puntonan mas atraktivo. Tambe esei por influensiá e manera ku hende ta mira bo.

Pero e mundu di moda tin un banda skur ku bo no por ignorá. Kumpradónan por bira katibu di kumpramentu di paña nobo konstantemente. Pasobra no lubidá, e industria di moda ta sigui produsí stailnan nobo na granèl. Esaki no ta pa kasualidat. Kasnan di moda ta hasi mas ganashi ora ku pañanan ta bai for di moda lihé. Manera e diseñadó di moda Gabrielle Chanel a ekspres’é: “Moda ta trahá pa bai for di moda.” Pues, e konsumidó ku no ta alerta kisas ta sintié obligá na kumpra paña nobo djis pa e keda den stail.

Tambe tin e peliger di kai pa e preshon sutil di propaganda. Kompanianan di moda ta gasta miónes di florin na promoshon di nan produktonan, i hopi bes nan propaganda ta presentá un bida sin preokupashon ku e hendenan ku ta bisti nan marka supuestamente ta gosa di dje. E mensahenan aki por tin un impakto poderoso. Segun un yùfrou di skol na Spaña: “No tin nada mas troumátiko pa un teenager ku ora e no tin e ‘marka korekto’ di sapatu.”

E Tentashon pa Sigui e Último Gritu di Moda

Algun grupo ta usa un sierto stail di paña pa identifiká nan mes. Loke nan ta bisti podisé ta transmití un rechaso di sosiedat, un estilo di bida liberal òf asta idealnan violento òf rasista. Ounke algun di e stailnan aki kisas ta skandaloso òf asta sumamente ofensivo, por lo general mayoria hende di e grupo ta bisti e mesun tipo di paña. Asta algun persona ku no ta apoyá e grupo su idealnan kisas ta gusta e stail. Esnan ku ta sigui e stailnan aki por duna otro hende e impreshon ku nan ta kompartí i promové e kreensianan básiko di e grupo.

Stailnan ku ta último gritu di moda generalmente ta kambia, i tin biaha den un par di luna. Kisas ta un músiko popular òf un otro persona ku ta dikta moda a bini kuné. Pero tin algun stail ku ta bin na moda i ta keda. Por ehèmpel, blue jeans tabata popular serka hóbennan ku tabata partisipá den manifestashonnan di protesta den e dékadanan di 1950 i 1960. Sin embargo, awor hende di vários edat ta bisti karson di jeans na tur tipo di okashon.

E Búskeda di un Figura Perfekto

Hende ku ta tuma moda muchu na serio por bira demasiado preokupá ku nan aparensia. Modelonan por lo general ta haltu i delegá, i konstantemente nos ta wòrdu bombardiá ku nan imágen. * Kompanianan ta usa e figura “perfekto” pa bende tur kos; for di outo te mangel. E Sentro di Investigashon Sosiológiko di Gran Bretaña ta kalkulá ku “awendia mucha muhénan ta mira den un solo dia mas imágen di muhénan eksepshonalmente bunita, ku nos mamanan a mira durante henter nan adolesensia.”

E avalancha aki di imágennan di modelo ku un figura perfekto por tin un efekto perhudisial. Por ehèmpel na Merka, un enkuesta sitá den Newsweek a saka afó ku 90 porshento di teenager koló kla tabata malkontentu ku nan kurpa. Tin di nan lo hasi kasi kualkier kos pa nan logra e ‘figura  ideal.’ Sin embargo, segun e Sentro di Investigashon Sosiológiko, ménos ku 5 porshento di e poblashon femenino por alkansá e peso i sais ideal ku medionan di komunikashon ta propagá. Apesar di esei, e atmirashon ekstremo di un figura superflaku a pone miónes di mucha muhé bira katibu di dieta i ehersisio. Esei a pone algun di nan desaroyá e trastorno anorexia nervosa, un trastorno di kome sumamente difísil pa libra di dje. * E modelo spañó Nieves Álvarez, kende tabata sufri di anorexia, a atmití: “Mi tabatin mas miedu di subi di peso ku di muri.”

Ta bèrdat ku por tin vários otro faktor ku ta kousa trastornonan di kome manera anorexia i bulimia. Sin embargo, Dr. Anne Guillemot i Dr. Michel Laxenaire a deklará: “E venerashon di un figura delegá tambe pa un parti ta responsabel pa esei.”

 Ta bisto anto ku moda tin un banda positivo i un banda negativo. E ta satisfasé hende su deseo básiko di ta representabel i di tin algu nobo di bisti. Pero ekstremonan di moda por pone nos bisti paña ku ta duna otro hende e impreshon robes. I si nos ta duna demasiado importansia na aparensia, nos lo por kere ekibokadamente ku nos balor ta dependé di nos ‘empake,’ nos aparensia eksterior, na lugá di nos norma- i balornan interno. Nieves Álvarez, sitá anteriormente, a bisa: “Nos tin ku kuminsá duna mas balor na un hende su kapasidat i personalidat, ku na djis e emboltura.” Pero ta masha improbabel ku lo bini un kambio den esei pronto. Pues anto, kon nos por haña un punto di bista balansá di moda?

[Nota]

 [Kuadro/Plachinan na página 8, 9]

Tin Hende Ku Ègt Lo Bisti e Kos Ei?

Tur lènte i hèrfst, e kasnan di moda di New York, Paris i Milan ta modelá bistínan eksklusivo di diseñadónan famoso. Fuera di nan preis eksorbitante, hopi di e kreashonnan aki ta parse sumamente impráktiko i asta imposibel pa bisti. E diseñadó spañó, Juan Duyos, a bisa: “E diseñonan ekstrabagante i skandaloso ku bo ta mira, eigenlijk no ta wòrdu kreá pa e públiko en general bisti. E propósito di e show di moda kisas ta mas pa hala atenshon na e diseñadó òf na e marka, ku pa bende e pañanan ku nan ta modelá. Por ehèmpel, un kolekshon impreshonante ku medionan di komunikashon a komentá ampliamente riba dje, lo por yuda bende un perfume di marka.”

[Plachi na página 7]

Por ta kostoso pa sigui e último gritunan di moda

[Plachi na página 7]

Bistimentu di algun paña ku ta na moda por identifiká bo ku un sierto grupo

[Plachi na página 7]

Algun persona a desaroyá anorexia, un trastorno difísil pa libra di dje