Kambio di Moda Atraves di Historia

SEA ku nos ta realisá esei òf nò, nos desishonnan diario relashoná ku kiko nos lo bisti ta ser determiná te na sierto grado pa loke ta na moda. Na final di kuenta, ta moda ta determiná pa gran parti kiko tin pa kumpra.

Asta pañanan ku awor nos ta konsiderá komun i koriente, un tempu tabata e último moda. Por ehèmpel, kamisa i dashi a bira e último gritu di moda mas ku un siglo pasá. I den dékada di 1920 suèter di hende muhé a bira un stail ku a keda te awe.

Tin dos kos básiko ku ta stimulá e industria di moda: e deseo pa algu nobo, i e deseo pa kuadra ku e normanan ku ta reina. Kasi tur hende gusta bisti un kos nobo. Ta p’esei tin biaha nos ta kumpra paña, no pasobra esun ku nos tin a gasta, sino djis pasobra nos ke un kambio. Ademas, nos no ke ta inapropiadamente bistí, p’esei nos ta kumpra paña ku te na sierto grado ta kuadra ku e stail ku nos amigu- òf kompañeronan ta bisti. Atraves di siglonan e industria di paña a satisfasé i tin biaha probechá di hende su deseo pa kos nobo i nan deseo pa ta na konformidat ku sierto grupo.

Un Historia Kòrtiku di Moda

Pa krea un stail, diseñadónan ta usa sinku elemento básiko: koló, silueta, forma ku e paña ta kai, tekstura di e tela, i korte (òf diseño di e tela). Den transkurso di añanan e opshonnan ku diseñadó- i kosedónan tin na nan disposishon den tur e sinku áreanan aki a oumentá drástikamente. Por ehèmpel, den antiguo Egipto lenen (lino) transparente lokalmente produsí tabata e tela preferí, i e tabata ideal pa un klima kayente. Pero komo ku no tabata fásil pa dai lenen, e tabata normalmente un solo koló: blanku di blich. Sin embargo, diseñadónan di moda egipsio a plisa e tela di manera ku nan pañanan a haña un nèchi forma i tabata kai na un manera bunita. Asina nan a krea un di e stailnan ku a dura mas largu na mundu.

Ya pa den promé siglo di nos era, tabatin tela- i kolónan nobo disponibel. Romanonan riku a importá seda for di China òf India, ounke e gastu pa transportá tela di seda puru tabata mes kostoso ku oro. Un otro tela masha na moda tabata lana (wòl) di dai importá for di Tiro. Un liber di lana por a kosta 1.000 denario, ku ta tres aña di salario pa un trahadó típiko. E dai- i telanan nobo a permití muhénan riku romano bisti stola—un bistí largu i hanchu—di katuna blou importá for di India òf kisas di seda hel importá for di China.

Ounke den épokanan di pasado stailnan nobo tabata sali periódikamente, un bistí karu probablemente a keda na moda durante henter un hende su bida. Kambionan a tuma lugá lentamente i por lo general tabatin efekto riba solamente e hendenan di klase haltu. Pero ku binida di e revolushon industrial, moda a bira muchu mas importante pa e pueblo komun.

 Durante siglo 19, hopi industria a lanta pa produsí paña tantu pa hende riku komo pa esnan pober. Tabatin un oumento den fábrikanan ku ta usa mashin pa produsí tela di katuna i di lana, i preis di tela a baha. Mashin di kose a yuda produsí paña mas barata, i dainan artifisial a ofresé un selekshon hopi mas grandi di koló.

Kambionan sosial i teknológiko a hunga un papel asta mas grandi den produkshon di paña pa e pueblo komun. Den Wèst Europa i Norteamérika, hende tabatin mas plaka pa gasta. Den dékada di 1850, nan a kuminsá publiká revistanan di hende muhé, i poko tempu despues pakusnan grandi a kuminsá ofresé paña kosé kaba na diferente sais. Den siglo 19 tambe Charles Frederick Worth a introdusí show di moda, den kua a usa hende pa modelá paña i asina stimulá interes di posibel klientenan.

Den siglo 20, materialnan sintétiko nobo manera rayòn, nailen i polièster, a ofresé fabrikantenan un selekshon mas amplio di tela. Debí na diseñonan komputerisá tabata fásil pa produsí stailnan nobo, i globalisashon a pone ku lo último den stailnan di moda por a aparesé kasi simultáneamente na Tokio, New York, Paris i São Paulo. Miéntras tantu, diseñadónan i fabrikantenan a haña maneranan nobo pa promové nan produkto.

Awendia ta hóbennan a tuma lugá di hende riku komo e fanátikonan di moda. Tur luna, miónes di hóben ta kumpra paña nobo, i e industria di paña ta produsí míles di miónes di florin na paña tur aña. * Pero tin trampanan skondí den ser fanátiko di moda?

[Nota]

[Kuadro/Plachinan na página 4, 5]

 Esnan Ku Ta Dikta Moda

Pa siglonan, ta reinan i hende di klase haltu a dikta e norma di bisti. Den siglo 17, Rei Louis XIII di Fransia a disidí di bisti un peluka pa tapa su kabes limpi. No a tarda hopi ku aristokratnan europeo a kuminsá feita nan kabes i bisti peluka, un stail ku a keda na moda pa mas ku un siglo.

Den siglo 19, revistanan di hende muhé a kuminsá publiká loke ta na moda i asta a ofresé patronchinan barata pa asina hende muhé mes por a kose nan pañanan. Den siglo 20, segun ku pelíkula i televishon a bira mas popular, artistanan a bira ídolonan internashonal i a kuminsá dikta stailnan di moda. Músikonan popular tambe a kuminsá bisti stailnan ekstremo, lokual hóbennan a kore imitá. Awendia, kasi nada no a kambia, ya ku hasidónan di propaganda ta hasi bon uso di shownan di moda, revistanan yamativo, bòrchinan grandi di propaganda, showcase di pakusnan i televishon, pa generá un demanda pa paña nobo.

[Plachi]

Rei Louis XIII

[Rekonosementu]

For di e buki The Historian’s History of the World

[Plachi na página 4]

E bistí di lenen aki di antiguo Egipto tabata un di e stailnan ku a dura mas largu

[Rekonosementu]

Potrèt saká pa kortesia di British Museum

[Plachi na página 4]

Na antiguo Roma hende muhé a bisti un stola

[Rekonosementu]

For di e buki Historia del Traje, 1917

[Plachi na página 4, 5]

Kimono ta na moda for di alrededor di aña 650 di nos era

[Rekonosementu]

For di e korant La Ilustración Artística, Volúmen X, 1891

[Plachi na página 5]

Den épokanan di pasado, un bistí karu probablemente a keda na moda durante henter un hende su bida

[Rekonosementu]

EclectiCollections

[Plachi na página 5]

E revolushon industrial a hasi posibel pa hende komun i koriente ta mas konsiente di moda

[Rekonosementu]

EclectiCollections