Hóbennan Sa Puntra . . .

Kon Mi Por Stòp di Purba di Ta Perfekto?

“Básikamente ta perfekshonismo ta kontrolá mi bida.”—Carly.

PERFEKSHONISMO—e idea ku bo mester ta perfekto den tur loke bo ta hasi—ta molestiá mente di hopi hóben.

E buki Perfectionism—What’s Bad About Being Too Good? (Perfekshonismo—Ta Malu pa Ta Muchu Bon?) ta bisa: “Tin un gran diferensia entre e esfuerso saludabel pa sobresalí i e afan insaludabel pa logra un ideal inalkansabel. Kisas e hende ku ta hasi esfuerso pa sobresalí ta sinti e nesesidat fuerte pa ta ordená i kisas e ta ferwagt hopi di su mes, pero e ta aseptá su fayonan tambe i ta mira nan for di un punto di bista positivo. . . . Di otro banda, e perfekshonista ta biba den un miedu konstante di hasi fout. Su normanan ta demasiado haltu.”

E deskripshon ei ta pas ku bo? Si bo normanan ta demasiado haltu, ta masha fásil pa bo limitá e kosnan ku bo ta hasi i asta evitá di kuminsá kosnan ku ta nobo. Òf kisas bo tin e tendensia di posponé kosnan importante pasobra bo tin miedu di faya. Bo por tin asta e inklinashon di rechasá personanan ku no ta kumpli ku bo normanan, i kore e riesgo di keda bo so, sin niun amigu.

Si e deskripshon aki riba ta pas ku bo, pensa riba e palabranan di Beibel na Eklesiastés 7:16: “No sea demasiado hustu, i no sea sabí di mas. Pakiko lo bo ruiná bo mes?” Sí, e perfekshonista por “ruiná” su mes! De echo, nan a yega di relashoná perfekshonismo asta ku trastorno den komementu manera anorexia nervosa i bulimia, ku ta un peliger pa bo salú. *

P’esei tal bes bo ta puntra: ‘Kon mi por stòp di purba di ta perfekto?’ En bèrdat no ta fásil pa kambia bo manera di pensa tokante esaki. Pero ku yudansa di Dios, bo por. P’esei laga nos wak kon Dios ta mira perfekshonismo.

Perfekshon Ta Un Meta Alkansabel?

Na promé lugá, ta posibel pa bo ta perfekto den e sentido kompletu di palabra? Beibel ta bisa ku nò, pasobra “no tin ni un hende hustu, ni sikiera ún . . . Tur a desviá; huntu nan a bira inútil.” (Romanonan 3:10-12)  Palabranan ku ta pone bo pensa, no ta bèrdat? Nan ta indiká ku ken ku purba di ta kompletamente perfekto lo faya.

Wak e ehèmpel di apòstel Pablo, kende tabata un hòmber masha spiritual. Tòg, ni Pablo no por a sirbi Dios sin faya. El a konfesá: “Ora mi ta deseá di hasi loke ta bon, maldat ta presente den mi. Pasobra segun e hende interior mi ta deleitá mi mes den e lei di Dios, ma den e miembronan di mi kurpa mi ta mira un otro lei ku ta batayá kontra e lei di mi mente i ta hasi mi prezu di e lei di piká, kual ta den mi miembronan.” (Romanonan 7:21-23) Ta ku yudansa di Dios so Pablo por tabata un kristian fiel.

Afortunadamente, Dios no ta eksigí ni spera di ningun di nos pa nos ta kompletamente perfekto. “E sa di kiko nos ta trahá; E ta kòrda ku ta stòf nos ta.” (Salmo 103:14) Ta te den e mundu nobo di Dios numa hende finalmente lo alkansá e estado di perfekshon.

Ahustá Bo Ekspektativanan

Miéntras tantu, no ta realista pa pensa ku bo por ta perfekto den e sentido kompletu di palabra. De echo, bo mester ferwagt ku de bes en kuando bo ta hasi fout. (Romanonan 3:23) Tin biaha nos no ta konsiente mes di nos foutnan! Salmo 19:12 ta bisa: “Niun hende no por mira su mes fayonan.” (Today’s English Version) Un hóben ku yama Matthew ta ekspres’é asin’aki: “Bo no ta perfekto—niun hende riba tera no ta perfekto. Si bo ta ferwagt perfekshon di bo mes, hamas lo bo ta felis. . . . Esei no ta realista, e no ta posibel.”

Ku e idea ei na mente, pakiko bo no ta purba ahustá algun di bo ekspektativanan? Por ehèmpel, bo ta kaba ku bo mes dor di purba di ta e mihó den un sierto kos? Beibel ta indiká ku un esfuerso intenso asina, básikamente, ta nada mas ku “banidat i korementu tras di bientu.” (Eklesiastés 4:4) Echo ta ku masha poko hende ta logra mes di ta e mihó. I asta ora un hende logra esei, generalmente ta kuestion di tempu promé ku bin un otro mihó kuné.

Apòstel Pablo a duna e konseho: “Mi ta bisa kada un di boso pa no pensa mas haltu di su mes ku e mester pensa; ma pa mas bien pensa di su mes ku sano huisio.” (Romanonan 12:3) Keda realista! Ahustá bo ekspektativanan. Esakinan mester ta un refleho di tantu bo kapasidatnan komo bo limitashonnan. Buska manera di sobresalí, pero no buska perfekshon. Pone meta spesífiko pero ku ta alkansabel.

 Por ehèmpel, Pablo a animá Timoteo p’e bira “un trahadó ku no tin motibu pa tin bèrgwensa, ku ta parti e palabra di bèrdat na un manera korekto.” (2 Timoteo 2:15) Sí, Pablo a animá hende pa nan sobresalí, no pa buska perfekshon. Meskos tambe, fiha metanan rasonabel pa bo mes. I si bo no ta sigur kiko ta “rasonabel,” papia riba e asuntu aki ku bo mayornan òf ku un otro hende grandi di konfiansa.

Algun hende ta asta rekomendá pa konsientemente bo purba hasi sierto kosnan ku bo no ta asina bon aden, manera kuminsá hasi un deporte nobo òf toka un instrumènt. Bèrdat, segun ku bo ta siña algu nobo, lo bo hasi hopi fout sigur. Riba su mes, no tin nada malu den esei. Tal bes esei lo yuda bo mira ku hasimentu di fout ta parti di e proseso di siñamentu.

Pa kiko ku bo kier logra—sea ta skirbi un scriptie pa skol òf dominá un sonata di piano—pensa riba un konseho mas di apòstel Pablo: ‘No sea floho den bo trabou.’ (Romanonan 12:11, NW) Sí, no posponé kosnan djis pasobra bo tin miedu di faya.

Un hóben a kria e kustumber di posponé proyektonan di skol ku e èksküs ku e tabata “organisando su mes.” Organisashon personal por ta un bon kos, pero tene kuidou p’e no bira un èksküs pa posponé kosnan. E mucha muhé aki a bin realisá ku “si bo tin ku skohe entre entregá un scriptie ku bo no ta kompletamente satisfecho kuné i no entregá unu mes, semper ta mihó bo entregá unu.”

Saka Ideanan Perhudisial for di Bo Mente!

Ta di komprondé ku kisas no ta fásil pa hasi un trabou ku no ta perfekto. Kisas ainda bo mente ta kargá ku ideanan krítiko òf negativo. Kiko bo por hasi? Un kos ta sigur, pensamentu negativo ta masha perhudisial. P’esei hasi un esfuerso konsiente pa saka for di bo mente ideanan irasonabel tokante bo mes. Mantené un sentido di humor asta ora bo faya. Al fin i al kabo, tin “un tempu pa hari.” (Eklesiastés 3:4) Kòrda tambe ku Yehova ta kondená abla ofensivo—asta ora nos dirigí esei kontra nos mes.—Efesionan 4:31.

En bes di kondená bo mes konstantemente, apliká e palabranan di Proverbionan 11:17: “E hende miserikòrdioso ta hasi bon na su mes alma, ma e hende kruel ta tormentá su mes karni.” P’esei pensa riba e pregunta aki: Tabata fásil pa bo haña amigu ku e normanan demasiado haltu ku bo a pone? Probablemente nò. Kisas asta bo a rechasá hende pasobra nan no ta perfekto. Pues, kiko bo por hasi?

Apliká e mandamentu di Beibel: “Boso soportá otro i pordoná otro, si un di boso tin un keho kontra un otro; meskos ku Señor a pordoná boso, asina boso tambe mester hasi.” (Kolosensenan 3:13) Sí, dor di ta mas rasonabel den loke bo ta ferwagt di otro hende, lo bo tin mas chèns di haña amigu!

Kisas bo ta puntra: ‘Pakiko hende tin tendensia di evitá mi pa motibu ku mi ta un perfekshonista?’ Wèl, ora otro hende tende bo papia di bo ekspektativanan haltu, pensa ki efekto esei lo por tin riba nan. E buki When Perfect Isn’t Good Enough (Ora Perfecto no Ta Sufisiente) ta splika: “Si bo ta keha demasiado ki ora ku bo haña ménos ku un 10 pa un prufwèrk, esei lo por ta un insulto pa bo amigunan ku tin ku lucha pa haña un 7 òf 6.” Pues purba di ta ménos negativo i no pensa riba bo so. Hende lo haña ku bo ta muchu mas agradabel pa anda kuné.

E hóben Carly ta bini bèk riba e asuntu bisando: “Básikamente mi tin ku stòp di buska perfekshon den tur loke mi ta hasi.” Kon bo por hasi esei? Meditá riba e manera ku Dios ta mira kosnan. Si ainda bo tin problema ku bo punto di bista tokante esaki, papia ku bo mayornan òf ku un kristian maduro den bo kongregashon. Pidi Dios den orashon p’e yuda bo kambia bo manera di pensa. Orashon por ta un yudansa poderoso pa kombatí perfekshonismo.—Salmo 55:22; Filipensenan 4:6, 7.

Kòrda semper ku Yehova no ta eksigí perfekshon; e ta simplemente ferwagt di nos ku nos ta fiel na dje. (1 Korintionan 4:2) Si bo ta hasi esfuerso pa ta fiel, bo por ègt sinti bo kontentu ku bo mes—maske bo no ta perfekto.

[Nota]

[Plachi na página 17]

Miedu di faya por pone ku bo no ta hasi kasi nada

[Plachi na página 18]

Ora bo ta purba siña un kos nobo, esei ta yuda bo mira bo fayonan for di un punto di bista positivo