Loke Bo Skohe Ta Afektá Bo Salú

HOPI bes ta un reto pa kome salú i mantené un bon kondishon. Debí na e preshonnan djawendia, sa parse ku ta mas kumbiniente pa kome kuminda prosesá ku ta laga bo sinti bon, ku prepará platonan ku ingredientenan fresku. Tambe ta parse mas fásil pa pasa bo tempu liber dilanti di televishon òf kòmpiuter ku partisipá den aktividat físiko. Sin embargo, loke hende ta skohiendo den e kasonan aki por pone ku un kantidat kresiente di adulto i mucha lo haña nan mes ku problemanan serio di salú.

Segun e revista Asiaweek, na Asia “komementu di kuminda muchu vèt i zut, i un bida di kada bes mas sintamentu, ta kousando un epidemia di diabétis.” Ta alarmante ku esnan ku ta haña diabétis den komunidat ta mas i mas yòn. I na Canada, segun e korant The Globe and Mail, “investigadónan a deskubrí ku solamente un di kada shete mucha bou di 13 aña ta kome sufisiente fruta i bèrdura [i] ku un tiki mas ku mitar ta hunga sufisiente pa pone nan soda.” E informe a sigui mustra ku e estilo di bida aki ta pone ku pa ora e hóbennan aki yega 30 i piku aña, nan ta haña malesa di kurason masha lihé.

Asina tambe ekspertonan di soño ta bisa ku adultonan mester drumi mas o ménos ocho ora tur anochi i hóbennan mester drumi asta mas tantu. De echo, den un estudio di Universidat di Chicago, yònkumannan salú ku a drumi pa solamente kuater ora, durante seis anochi konsekutivo, a kuminsá manifestá síntomanan di malesa ku por lo general ta ser asosiá ku behes. Ounke hopi hende ta sakrifiká oranan presioso di soño pa nan por dediká mas tempu na trabou, skol òf plaser, e resultadonan por ta kontraprodusente. James Maas, investigadó di soño di Universidat di Cornell, New York, a bisa: “Funshoná ta un kos. Pero ser alerta, kreativo i no pega soño riba outopista, ta kompletamente un otro kos.”

Klaru ku tin mas faktornan ku ta influensiá nos bienestar físiko. Por ehèmpel, un punto di bista positivo por benefisiá nos salú. I ora nos tin un berdadero propósito den bida, esei por motivá nos pa tuma desishonnan ku lo yuda nos keda salú.