Manera Rayonan di Luna Kristalisá

Na aprel 2000, mineronan serka di Chihuahua, Mexico, a usa eksplosivo pa habri un tùnel mas o ménos 300 meter bou di superfisie di tera en buska di metal presioso. Segun ku Eloy Delgado di 40 aña tabata purba pasa dor di un buraku chikí, el a bin deskubrí un kueba yen di kristal transparente i gigantesko. El a bisa: “E tabata bunita, meskos ku ora lus ta reflehá for di un spil kibrá.” Un otro persona a bisa ku tabata komo si fuera “rayonan di luna diripiente a haña supstansia i bira sólido.”

Ekspertonan ta kere ku e kristalnan aki ta esnan mas grandi na mundu. Tin di nan ta tamaño di palu di pino madurá, i por ta midi te ku 15 meter haltu i pisa mas ku dies tòn! Jeffrey Post, direktor di e departamentu di mineralnan na e Instituto Smithsonian na Washington, D.C., a bisa: “Ta algu sumamente asombroso pa mira kristalnan ku ta asina inmenso i perfekto.” El a remarká ku mayoria kristal na mundu ta asina chikí ku bo por tene nan den bo man.

E revista Smithsonian di aprel 2002 a deskribí kon e kristalnan aki ta forma: “E awa ku tabatin den e kuebanan aki tabata yen di suafel di e depósitonan di metal ku tin pegá eibanda, i nan a kuminsá disolvé e barankanan di kalki, sakando gran kantidat di kalsio. E kalsio aki na su turno a meskla ku e suafel pa forma kristal na un eskala nunka bisto pa hende.”

Ounke e temperatura i humedat den e kuebanan kisas ta ideal pa kristal, pa hende sí nan ta muchu fuerte. E temperatura ta banda di 65 grado Celsius, i humedat ta 100 porshento. Eksploradó Richard Fisher, e promé norteamerikano ku a bishitá e kuebanan, a bisa: “Ora bo drenta den e kueba grandi ta komo si fuera bo ta drenta den un fòrnu superkayente.” El a agregá ku un persona por soportá e kondishonnan aki pa solamente seis te dies minüt. Despues di esei, e kalor i humedat ta bira insoportabel.

Deskubrimentu di e kristalnan inmenso aki ta un rekordatorio adishonal di e maravianan asombroso i abundante ku tin riba nos planeta, di kua gran parti kisas nos no a deskubrí ainda. Bo no ta di akuerdo ku e salmista ku a deklará: “O SEÑOR, ki numeroso bo obranan ta! Ku sabiduria bo a traha tur; tera ta yen di loke bo a krea”?—Salmo 104:24.

[Rekonosementu pa Potrèt na página 31]

Tur potrèt: © Richard D. Fisher