Un Punto di Bista Balansá di Moda

BEIBEL ta bisa ku “tur kos [Dios] a hasi bunita na su tempu.” (Eklesiastés 3:11, NW) Nos ta mira bunitesa tur kaminda den e mundu rònt di nos. Tambe nos ta mira bunitesa den hende.

Un diseñadó di moda ta purba realsá nos bunitesa mediante e pañanan ku nos ta bisti. Pero, manera e artíkulo anterior a trese dilanti, e industria di moda a kambia tambe e konsepto di kiko ta bunita. Ruth Striegel-Moore, profèser di sikologia, a remarká: “Nos a kustumbrá asina tantu di mira hende muhé sumamente flaku, ku awor nos ta pensa ku ta esaki ta bunita.”

Ta bisto anto ku lo no ta sabí pa laga mundu su konsepto aktual di bunitesa preshoná nos pa pensa meskos kuné. Den su buki Always in Style (Semper den Stail), Doris Pooser ta bisa ku “hende muhé djawendia no tin nodi kambia òf kamuflá nan kurpa ki ora ku surgi un kurpa ‘ideal’ nobo.” I esei ta bèrdat. Pakiko nos  mester laga medionan di komunikashon dikta pa nos loke nan ta haña ta bunita? Pooser a bisa: “Ta hopi mas fásil pa nos ta nos mes, en bes di purba desesperadamente di kambia loke nos tin.”

Bunitesa Duradero

Konfiansa propio i satisfakshon den bida ta dependé di hopi mas kos ku solamente un bunita aparensia. Judy Sargent, un eks-pashènt di anorexia, a skirbi: “Berdadero felisidat ta sali di paden. E no ta dependé di e peso ku bo balansa den baño ta duna.” Beibel ta bai asta un stap mas leu. Apòstel Pedro a skirbi: “Boso bunitesa mester sali for di loke boso tin den boso kurason, e bunitesa duradero di un spiritu suave i trankil. Ta e bunitesa ei ta esun di mas balioso den bista di Dios.”—1 Pedro 3:4, Beibel na papiamentu koriente.

E bunitesa duradero ku Pedro a referí na dje ta surpasá enkanto físiko debí ku e ta permanente i ta di gran balor den bista di Dios. Hopi siglonan pasá un rei sabí a remarká: “Ser atraktivo ta engañoso i bunitesa ta banidat, ma un muhé ku ta teme SEÑOR, esei lo wòrdu elogiá.”—Proverbionan 31:30.

Ounke bunitesa físiko kisas ta atraé mas atenshon awe, hopi hende tòg ta respetá e persona ku ta desplegá kualidatnan kristian. Apòstel  Pablo a animá kristiannan: “Bisti e hende nobo . . . bisti un kurason di kompashon, kariño, humildat, mansedumbre i pasenshi.”—Kolosensenan 3:10, 12.

Moda riba su mes ta algu pasahero. Asta desde e punto di bista di mas faborabel, e último stail por dòrna nos djis pa un tempu kòrtiku. Pero kualkier bon impreshon ku nos hasi lo no dura mashá si nos aparensia no ta wòrdu kompañá pa un personalidat agradabel. Kòrda ku “fruta di e spiritu”—ku ta inkluí amor, goso, pas, pasenshi, bondat i dominio propio—nunka no ta bai for di moda.—Galationan 5:22, 23; 1 Timoteo 2:9, 10.

Sin embargo, nos tin ku bisa sí ku ta na su lugá pa duna e debido atenshon na nos pañanan. Aline, di Fransia, ta atmití ku tabata difísil pa e keda balansá den esaki. El a konta: “Komo teenager, mi tabata hopi interesá den bistimentu. Mi kier a sigui e último moda pasobra esei a duna mi konfiansa den mi mes. I si mi por a kumpra paña di marka, mihó ainda.”

Aline a sigui bisa: “Pero ora mi a bira grandi, mi mester a siña mantené mi mes finansieramente, i tambe mi a kuminsá pasa gran parti di mi tempu den e sirbishi kristian. Mi a bin realisá ku si mi kier a biba segun mi forsa, mi no por ta katibu di moda mas. Mi a kuminsá kumpra paña ora tin baratio òf na pakusnan di deskuento. Mi a deskubrí ku mi por a sigui bisti bon, pero na un kuart di e preis. E sekreto ta sinta den kumpra paña ku ta keda bo bon, ku ta práktiko, ku ta kombiná bon ku loke bo tin kaba, i ku lo no bai umbes for di moda. En bes di laga moda dikta kiko mi mester kumpra, awor ami ta purba disidí ki stail ta bai bon ku mi. Mi no ta bisa ku paña no ta importante mas pa mi. Pero mi balor komo persona ta dependé di mas kos ku solamente mi aparensia.”

Den un sosiedat kaminda hopi bes hende ta konsiderá bo aparensia eksterior di mas balor ku bo berdadero kualidatnan, kristiannan ta hasi bon di tene e rekordatorio serio aki di Beibel na mente: “Nada di loke mundu ta ofresé no ta bini di Tata, esta deseonan pekaminoso, gana di kosnan ku ta atraé bista di hende i kana prònk ku loke bo tin, ma tur ta bini di mundu. Ademas, mundu i su deseonan ta pasahero, ma esun ku hasi boluntat di Dios ta biba pa semper.”—1 Juan 2:16, 17, BPK.

[Plachi na página 9]

Berdadero bunitesa ta sali di bo paden, no di loke bo tin bistí

[Plachi na página 10]

Skohe pañanan ku ta práktiko i ku ta kombiná bon ku loke bo tin kaba