Baila ku Kraanvogel

DI UN ESKRITOR DI SPIÈRTA! NA SPAÑA

DEN e stat di Pusan na Surkorea, bo por mira un baile tradishonal ekstraordinario. Hende hòmber bistí ku paña blanku ku sombré pretu haltu, ta zuai man, drei rònt, bùig i asta para riba un pia.

Nan moveshonnan pekuliar i improvisá tin un splikashon simpel. Nan ta imitando e chinese kraanvogel, ku pa siglonan a pasa wenter na Surkorea. E baile úniko aki di kraanvogel a impreshoná e pueblo lokal asina tantu ku nan a forma nan propio baile imitando e paranan aki.

Na Hokkaido, Hapon, ku ta un 1.500 kilometer mas leu, hende ku ta gusta naturalesa ta bai Parke Nashonal Kushiro Shitsugen na gran kantidat pa mira e kraanvogel mes. Danki na e programa pa alimentá bestia durante lunanan pisá di wenter, e kolonia hapones di chinese kraanvogel ta konsistí awor di sentenáres di nan. Ta masha bunita pa mira un grupo di e paranan elegante blanku ku pretu aki duna nan show kompletu di baile den sneu. Eskritor Jennifer Ackerman di National Geographic ta usa e palabra hapones aware pa deskribí kon enkantá el a keda. E ta splika ku e palabra ta ekspresá “e sintimentu ku bo ta haña di e bunitesa impaktante di un kos ku no ta dura hopi.”

Pa hopi tempu kraanvogel—ku bo por haña na tur kontinente ku eksepshon di Suramérika i Antártika—a fasiná hende. E paranan aki ta aparesé den pinturanan di kueba na Afrika, Europa i Oustralia. Na Lehano Oriente, kaminda kraanvogel ta un símbolo di felisidat i bida largu, pintornan hopi bes ta usa nan komo nan tema faborito. Kisas dor ku kraanvogel ta keda ku e mesun partner henter nan bida, nan ta representá felisidat matrimonial tambe i hopi bes tin pintura di nan riba kimono pa kasamentu. Koreanonan a klasifiká chinese kraanvogel komo un “monumento natural” pa motibu ku e ta masha skars i bunita. Haponesnan a pone kraanvogel ku ta baila riba nan biyetenan di 1.000 yen. Un 2.500 aña pasá, chinesnan a desaroyá un “baile di kraanvogel blanku.” Kisas e echo ku e para aki ta gusta bailamentu mashá ta splika pakiko hende ta sinti un kariño spesial pa kraanvogel.

E Baile di Kraanvogel

Tur 15 espesie di kraanvogel ta baila, i asta e puitunan di ménos ku dos dia bieu tambe ta purba. E buki Handbook of the Birds of the World [Buki di Referensia Tokante Paranan Ku Tin na Mundu] ta splika ku “tin algun otro sorto di para tambe ku ta baila, pero niun no ta baila mes hopi, ni . . . mes bunita pa wowo humano.” E baile di kraanvogel ta basta variá i semper espektakular—tumando na konsiderashon e tamaño grandi di e paranan, nan postura elegante, i nan saltonan haltu i impreshonante ku nan alanan habri. E baile típikamente ta inkluí “un seri di moveshon largu, kompliká i bon kordiná den kua nan ta bùig, salta, kore i bula brevemente,” Handbook of the Birds of the World ta agregá. I meskos ku den e kaso di hende, unabes un par di kraanvogel kuminsá baila, generalmente henter e grupo tambe ta disidí di baila. Opservadónan na Afrika a yega di mira un  60 par di kraanvogel shinishi baila armoniosamente.

Pakiko kraanvogel ta baila? Ta pa hasi ehersisio, pa komuniká, pa buska pareha, pa indiká peliger òf djis pa mustra ku e tin bon beis? E motivashon por inkluí un di e motibunan ei òf asta tur. Sí, kraanvogel gusta baila na par, i bailamentu ta forma parti di nan ritual di enamorashon. Pero asta kraanvogel yòn ta baila, i e puitunan generalmente ta e bailarinnan mas entusiasmá. “Loke sea nan motivashon, e ta un goso pa mira,” Handbook of the Birds of the World ta konkluí.

E Biahe di Kraanvogel

Hopi bes bo ta tende kraanvogel basta ratu promé ku bo mira nan. Un gritu hopi penetrante manera tròmpèt ta anunsiá nan presensia, maske nan por ta hopi leu. Aparentemente e gritu aki ta yuda mantené e grupo huntu durante nan biahenan largu di migrashon. Mayoria espesie di kraanvogel ta migra for di nort kaminda nan ta brui. Den hèrfst nan ta biaha distansianan largu for di Canada, Skandinavia òf Siberia pa bai na e klimanan mas kayente di China, India i Merka (Texas), òf e region Mediteráneo. E biahenan aki ta peligroso i agotante. Hende a mira algun kraanvogel eurasiátiko bula na un haltura di kasi 10.000 meter pasando riba Himalaya rumbo pa India. Nan ta bula den e forma di V i ta probechá di e kolumnanan di aire kayente ku ta subi i ku ta yuda nan zueif bai mas leu posibel. Sin embargo, ora di krusa riba awa nan mester dependé solamente di nan alanan. *

Juan Carlos Alonso, un eksperto spañó di para, a pasa kasi 20 aña ta sigui e ruta di migrashon di e 70.000 kraanvogelnan eurasiátiko ku ta pasa wenter na Spaña. E ta splika: “Algun para ta haña un renchi na nan pia, i otronan ta haña un transmisor chikitu di radio pa asina nos por monitor nan biahe. Ora mi topa un para ta pasa wenter na Spaña i ku tin un renchi ku mi mes a pone na dje tempu e tabata sakando pluma na Nort Alemania, mi ta sinti un gran satisfakshon. Pa siglonan kraanvogel a usa e ruta di migrashon aki. Nan a topa un kraanvogel ku a haña renchi na Finlandia ta pasa wenter te den zùit ayá na Etiopia, miéntras ku algun kraanvogel di Siberia ta pasa wenter na Mexico.”

Lucha pa Sobrebibí ku Yudansa di Hende

Aktualmente, 9 di e 15 espesienan di kraanvogel ta den peliger di ekstinshon. E trompetkraanvogel di Norteamérika ku tabata den  e mayor peliger di ekstinshon, a baha te na 14 para na 1938. Sin embargo, danki na e programa di brui den koutiverio i protekshon di nan habitat, pokopoko pero sigur e kantidat a oumentá te na mas ku 300. Naturalistanan awor ta kria puitunan den koutiverio pa despues hiba nan bèk den un área protehá den mondi. Resientemente nan tabatin éksito den usa avion super liviano pa siña un par di trompetkraanvogel kon pa migra. Sientífikonan ruso ta hasiendo e mesun esfuerso pa protehá e kraanvogel blanku di Siberia ku ta den peliger di ekstinshon.

Un di e relatonan eksitoso di mas konmovedor ta bin di Hapon. Un kolonia chikitu di chinese kraanvogel na Hokkaido no tabata migra, dor ku e paranan tabata por a kome durante e lunanan di wenter kantu di koriente di awa ku ta keda banda di fuente di awa kayente. Sin embargo, den e wenter friu di aña 1952, asta e awanan aki a fris, i a parse ku e grupo chikitu di 30 para lo a disparsé. Pero muchanan di skol lokal a tira maishi riba e awa di fris i e paranan a sobrebibí. For di e dia ei, hende ta alimentá kraanvogel regularmente, i e grupo chikitu a oumentá yega te kasi 900 para—mas o ménos un tersera parti di e poblashon mundial di kraanvogel.

Enfrentando un Futuro Insigur

Meskos ku hopi otro espesie, kraanvogel a sufri pa motibu ku hende ta kaba ku moeras i sabana di yerba. Pa kraanvogel por a sobrebibí, nan mester a siña biba den bisindario di hende. Generalmente kraanvogel ta preferá biba na un distansia safe di un par di kilometer, pero si hende no molestiá nan, nan por kustumbrá biba mas serka di hende. Na India, e saruskraanvogel, e para di mas haltu ku ta bula, a adaptá su mes na brui den damnan situá den pueblo. Otro espesie di kraanvogel ku a logra sobrebibí a siña piki kuminda riba terenonan plantá durante nan biahe di migrashon òf ora nan ta den e área kaminda nan ta pasa wenter.

Ta di spera ku e esfuersonan intenso di konserbashonistanan den hopi pais lo logra sigurá e sobrebibensia di e kriaturanan elegante aki. Lo ta lamentabel si generashonnan di futuro no haña e chèns di disfrutá di e baile magnífiko di kraanvogel òf skucha nan gritu duru i úniko segun ku nan ta bula bai zùit den temporada di hèrfst!

[Nota]

 [Plachi na página 15]

Chinese kraanvogel, Asia

[Plachi na página 16]

Detaye di un porselana koreano

[Plachi na página 16]

Kraanvogel pretu ku blanku ku orea tur na pluma fini

[Plachi na página 17]

Kraanvogel europeo komun den pleno vuelo

[Plachi na página 17]

Kroonkraanvogel