E Punto di Bista Bíbliko

Dios Ta Aprobá Estilonan di Bida Alternativo?

“KI ORA lo mi haña sa ta kua ta mi inklinashon seksual?” Esei ta loke un hobensita di 13 aña a manda puntra e sekshon di konseho den un revista pa tiner. Su pregunta ta reflehá e aktitut di hopi otro hende ku ta sinti ku un persona ta liber pa hiba e estilo di bida seksual ku e mes skohe.

Kisas algun hende en bèrdat ta hopi konfundí enkuanto nan impulsonan seksual. Otronan abiertamente ta aseptá estilonan di bida alternativo manera homoseksualidat. I otronan tin kurashi di aktua i bisti manera un persona di e sekso opuesto. Tin hende ta disidí di operá pa nan kambia nan sekso. Asta tin individuonan ku ta boga pa laga adultonan tene relashon seksual ku mucha.

Práktikanan seksual i e sekso di un hende en bèrdat ta un kos ku kada hende mes mester skohe? Kiko e Palabra di Dios ta bisa tokante e asuntunan aki?

“Hòmber i Muhé El A Krea Nan”

Segun e buki bíbliko di Génesis, Dios mes a pone ku tin diferensia entre hende hòmber i hende muhé. E relato ta deklará: “Dios a krea hende segun su mes imágen . . . Hòmber i muhé el a krea nan. Anto Dios a bendishoná nan, i Dios a bisa nan: ‘Sea fruktífero i multipliká, i yena e tera i hasi esaki someté na bo.’”—Génesis 1:27, 28.

Dios a krea hende ku boluntat liber i a duna nan oportunidat pa disfrutá di nan libertat. (Salmo 115:16) El a konfia nan ku e responsabilidat di kuida tur otro kos bibiente riba tera, anto el a bai asina leu ku el a permití hende duna e kosnan bibiente aki nòmber ku ta pas ku nan. (Génesis 2:19) Pero den asuntu di seksualidat, Dios a duna guia spesífiko.—Génesis 2:24.

Pa motibu di Adam su desobedensia, nos tur a heredá imperfekshon. P’esei nos mester lucha kontra debilidat di karni i kontra deseonan fuerte ku no ta na armonia ku Dios su propósito original. Den e lei di Moisés, Dios a bisa spesífikamente ta kua ta e práktikanan ku e ta odia, esta, adulterio, insesto, homoseksualidat i bestialidat. (Levítiko 18:6-23) Tambe Dios a prohibí spesifikamente pa un hende hasi komo si fuera e ta di e sekso opuesto pa propósitonan inmoral. (Deuteronomio 22:5) Konsistentemente Beibel ta siña ku e úniko tipo di relashon seksual ku Dios ta aprobá ta entre hòmber i muhé ku ta kasá ku otro. (Génesis 20:1-5, 14; 39:7-9; Proverbionan 5:15-19; Hebreonan 13:4) E normanan ei ta rasonabel?

 Ken Tin Ku Skohe?

Beibel ta kompará hende su posishon dilanti e Kreadó ku klei den man di un alfarero (hende ku ta traha ku klei). E ta bisa: “Ta ken abo ta, o hende, pa kontradisí Dios? Akaso loke ta formá lo puntra esun ku a form’é: ‘Pakiko bo a traha mi asina?’” (Romanonan 9:20) For di e manera ku Dios a traha hende hòmber i hende muhé ta bisto ku ta normal pa nan sinti nan seksualmente atraí na otro. P’esei atrakshon seksual pa un hende di e mesun sekso, pa un bestia òf un mucha ta innatural.—Romanonan 1:26, 27, 32.

P’e motibu ei, hende ku kier satisfasé tal inklinashonnan seksual innatural eigenlijk ta kuestionando Dios. Beibel tin e siguiente spièrtamentu: “Ai di esun ku ta pleita ku Esun ku a trah’é—un tinashi di klei entre e tinashinan di klei! Akaso e klei ta puntra e alfarero: ‘Kiko bo ta hasi?’” (Isaias 45:9) Siguramente ta rasonabel pa e Kreadó di hende duna guia tokante asuntunan seksual. No ta lógiko ku hende mester sigui tal guia?

Kada Ken Mester Sa Kon pa Dominá Su Mes Kurpa

E eskritor di Beibel, Pablo, a duna guia na kristiannan relashoná ku kondukta seksual. El a bisa: “Kada un di boso mester sa kon dominá su mes kurpa na un manera santu i onorabel. Boso no mester laga pashon i mal deseo dominá boso.” (1 Tesalonisensenan 4:4, 5, Beibel na papiamentu koriente) ‘Dominá bo mes kurpa’ ta nifiká pone bo pensamentunan i deseonan na armonia ku Dios su leinan moral.

Ta bèrdat ku esei kisas no ta fásil. Ta di komprondé ku un hende lo tin difikultat si otro hende a abusá di dje seksualmente durante su infansia, òf si su mayornan òf esnan ku mester a kuid’é a pone un mal ehèmpel p’e enkuanto kiko ta maskulino òf femenino, òf si el a mira pornografia tempu ku e tabata hopi yòn. Faktornan genétiko, hormonal i sikológiko tambe por hunga un papel den trose un hende su impulsonan seksual. Sin embargo, ta un konsuelo pa sa ku nos Kreadó por duna yudansa i sosten na esnan ku mester di esei.—Salmo 33:20; Hebreonan 4:16.

Laga e Gran Alfarero Moldia Bo

Promé ku e alfarero kuminsá duna forma na e klei, e tin ku pon’é nèt meimei riba un wil drumí. Segun ku e wil ta drei, e alfarero di un manera ábil mester pone su dedenan suavemente riba e klei p’e kuminsá dun’é e forma deseá. Promé ku nos por wòrdu moldia pa bira un persona deseá den bista di Dios, nos mester laga prinsipionan i leinan di Dios ku nunka ta kambia, bira e kos sentral den nos bida. Unabes ku nos kuminsá hasi esfuerso, den su gran amor, Dios lo moldia nos suavemente mediante Beibel, su spiritu santu i e hermandat kristian. E ora ei un hende lo kuminsá sinti i eksperensiá Dios su kuido personal den su bida.

Ta klaru ku nos mester haña konfiansa den e sabiduria di e Kreadó, ku e siguransa ku e sa kiko ta mihó pa nos. Nos por haña e konfiansa aki dor di hasi orashon i studia Beibel diligentemente. Un hende ku ta trata ku e problema di impulso seksual innatural, ku e klase di konfiansa aki den Yehova ta bira moldiabel den e mannan di e Kreadó. Promé Pedro 5:6 i 7 ta bisa: “Humiá boso mes anto bou di e man poderoso di Dios, pa e por halsa boso na e tempu apropiá, tirando tur boso preokupashon riba dje, pasobra e ta perkurá pa boso.”

Ora nos lesa Beibel regularmente, nos ta konosé masha hopi fiel sirbidó di Dios ku tabata lucha ku deseo di karni pero ku nunka a entregá. Esta un bon animashon e ehèmpelnan aki  ta! Nos por haña un idea di kon frustrá apòstel Pablo a yega di sinti su mes, ora el a sklama: “Hende miserabel ku mi ta! Ken lo libra mi di e kurpa di morto aki?” Pero tambe el a mustra nos kiko ta e fuente prinsipal di yudansa ora el a kontestá su mes pregunta, bisando: “Mi ta duna gradisimentu na Dios dor di Hesukristu, nos Señor!”—Romanonan 7:24, 25.

Un Forsa Ku Por Yuda Hende Kambia

Tambe nos por dependé riba Dios su spiritu santu. Esaki ta un forsa poderoso ku por yuda hende kambia. Spiritu santu ta yuda nos “pone un banda e hende bieu” i “bisti e hende nobo, ku a wòrdu kreá segun Dios den hustisia i santidat berdadero.” (Efesionan 4:22-24) Nos amoroso Tata selestial nunka ta keda sin kontestá nos ora nos ta pidié sinseramente pa su spiritu santu yuda nos hasi e kambionan aki. Hesus ta sigurá nos ku e Tata lo “duna e spiritu santu na esnan ku pidié.” (Lukas 11:13) Pero ta nesesario pa persistí den orashon manera su palabranan ta indiká: “[Sigui] pidi, i lo wòrdu duná na boso.” (Mateo 7:7; NW) Esaki lo ta spesialmente e kaso ora nos ta purba dominá deseonan seksual ku ta fuerte.

Ademas Dios ta yuda nos mediante e hermandat di kristiannan berdadero, ku ta konsistí di hende di tur tipo di background. Algun kristian den e kongregashon di promé siglo na Korinto tabata kai den e kategoria di “sodomita” i “homoseksual.” Pero nan a kambia. E sanger di Kristu a laba nan, i nan a bira aseptabel den bista di Dios. (1 Korintionan 6:9-11) Awendia algun hende tin ku hasi e mesun tipo di kambionan aki. I e personanan ei por haña e yudansa nesesario den nan lucha kontra deseonan innatural for di e kongregashon kristian.

Esaki kier men ku outomátikamente ora un hende bira un kristian e ta kura di tur deseo apnormal òf konfushon enkuanto su sekso? No nesesariamente. Loke a yuda algun di nan hiba un bida normal ta ora nan a apliká prinsipionan di Beibel ku persistensia. Anto asina mes, e kristiannan aki hopi bes tabatin ku bringa dia tras dia kontra deseonan robes. E personanan aki ta sirbi Dios apesar ku, na moda di papia, nan tin un “sumpiña den karni.” (2 Korintionan 12:7) Tanten ku nan sigui lucha kontra mal inklinashon i mantené bon kondukta, Dios ta mira nan komo sirbidó fiel i limpi den su bista. Nan por spera ansiosamente riba e tempu den futuro ora henter humanidat “lo wòrdu librá for di su sklabitut na korupshon pa drenta den e libertat glorioso di e yunan di Dios.”—Romanonan 8:21.

Miéntras tantu, tur hende ku ta deseá di agradá Dios mester kumpli ku su normanan hustu. Kristiannan berdadero a skohe pa sirbi Dios; i no pa sigui nan mes inklinashonnan egoista. Esnan ku ta someté nan mes humildemente na Dios su boluntat den tur aspekto di bida lo wòrdu rekompensá ku goso i felisidat eterno.—Salmo 128:1; Juan 17:3.

[Komentario na página 11]

Den asuntu di seksualidat, Dios a duna guia spesífiko

[Komentario na página 12]

Algun kristian den e kongregashon di promé siglo na Korinto tabata kai den e kategoria di “sodomita” i “homoseksual.” Pero nan a kambia

[Plachi na página 13]

Studio di Beibel ta yuda hende kultivá normanan moral haltu