For di Nos Lektornan

Prostitushon di Mucha No tin palabra pa ekspresá mi gradisimentu pa e seri di artíkulonan “Prostitushon di Mucha—Un Realidat Trágiko.” (8 di febrüari 2003) E seri aki a saka na kla kon repugnante e problema ta. Mi ta pensa ku e mester wòrdu publiká den korantnan pa mas hende por haña sa ku e tipo di sklabitut aki ta eksistí.

M. K., Repúblika Cheko

Siria Danki pa e artíkulo “Siria—Rastronan Visibel di un Historia Interesante.” (8 di febrüari 2003) Sinseramente, nunka mi tabata interesá den historia. Pero e artíkulo aki a yuda mi visualisá e diferente kaminda- i statnan ku apòstel Pablo a bishitá. E tipo di informashon aki ta yuda nos amplia nos konosementu i komprondementu relashoná ku kosnan ku e sirbidónan di Dios den pasado mester a enfrentá.

T. S., Merka

Sonrisa Pa mi famia i amigunan, mi nòmber di kariño tabata Sonrisa. Asta nan a duna mi un potrèt di mi mes ku tabatin skirbí bou di dje: “Si bo yega di mira un hende sin smail, dun’é esun di bo.” Pero resientemente algun tragedia ku a sosodé ku mi famia a pone mi bira basta deprimí. E artíkulo “E Poder di un Sonrisa” (8 di febrüari 2003) a kambia mi punto di bista. Awor mi por hasi hende kontentu atrobe ku mi sonrisa. Mi ta gradisí Yehova ku el a yuda mi mediante e artíkulo aki pa mi para bèk riba mi pia.

O. F., Nigeria

Flamingo Ora ami ku mi esposo a habri e Spièrta! aki, e artíkulo “Bailarinnan ku Pluma Briante” a hala nos atenshon. (8 di febrüari 2003) Mi esposo di: “Esaki ta nèt pa bo.” E sa kuantu mi ta atmirá Yehova su kreashon i spesialmente e elegante flamingo ros. Mi ta deseá di mira e paranan bunita aki un dia ku mi propio wowo. Danki pa e artíkulo. El a enrikesé mi den diferente manera.

M. N., Repúblika Cheko

Spikmentu Mi tin 11 aña. Mi a gusta e artíkulo “Hóbennan Sa Puntra . . . Ki Tin di Malu den Spik?” (8 di febrüari 2003) Maske no ta semper mi ta haña bon punto, mi sa ku loke mi haña ta loke onestamente mi a traha p’e. En realidat algun di mi kompañeronan di klas ku ta spik ta haña punto mas abou ku mi! Ademas mi konsenshi ta limpi, i esei ta e kos di mas importante.

Z. T., Oustria

Mi a kai den e trampa di spik, probablemente dor ku mi tabata pensa ku e no ta un kos dje serio ei. E artíkulo aki lo yuda mi kòrda tekstonan manera Hebreonan 13:18, ku na su turno lo yuda mi si den futuro mi sinti mi tentá pa spik.

N. I., Italia

Mi ta bai skol sekundario. Mi a yega di purba spik durante prufwèrk, sin pensa ku esaki ta mes malu ku hòrtamentu! Pero grásias na e artíkulo aki, lo mi hasi mi bèst pa mantené mi konsenshi limpi.

K. G., Estonia