Komunikashon Ku Ta Hiba na Bida
Komunikashon Ku Ta Hiba na Bida
DI TUR kriatura ku ta biba riba tera, hende ta e úniko ku no ta kontentá su mes simplemente ku komuniká ku otro hende. Sea kual sea nan nashonalidat, nivel sosial, sekso òf edukashon, hende a demostrá ku nan ta nase ku e deseo pa komuniká ku e ser di mas haltu, esta, Dios.
Esei ta djis un superstishon ridíkulo? Niun ora so! Manera e artíkulo anterior a splika, Dios a krea hende den su imágen. El a krea nos ku e kapasidat pa komprondé kosnan spiritual. Esaki ta inkluí e deseo di komuniká kuné komo nos Tata selestial. (Génesis 1:27; Mateo 5:3, NW) De echo, Dios ta mira komunikashon kuné komo algu asina importante ku Beibel ta referí na dje komo ‘Esun ku ta skucha orashon.’—Salmo 65:2.
Ta un onor grandi di por hasi orashon n’e Haltísimo! Pa mayoria hende lo ta un privilegio pa papia den privá ku un dignatario importante, manera un presidente òf un promé minister. Pero Yehova Dios ta e personahe mas haltu den universo! I nos no tin nodi traha afsprak pa papia kuné. Nos por hasi orashon ki ora ku ta, i unda ku ta. Nos por resa na Dios asta den silensio, esta, den nos kurason. (1 Samuel 1:12-15) Sin embargo, Yehova ta eksigí sí pa nos ta sinsero i pa nos skuch’é i obedes’é. (Mikeas 6:8; Mateo 6:5-13) Al fin i al kabo, bon komunikashon ta bini di dos banda, no ta bèrdat?
Abo Ta Skucha Dios?
Kon bo por skucha Dios? E manera prinsipal ta dor di lesa i apliká e siñansanan ku bo ta haña den Beibel Santu, su Palabra skirbí. (2 Timoteo 3:16; 2 Pedro 1:20, 21) Hesus a bisa: ‘Hende lo biba di tur palabra ku ta sali for di boka di Dios.’ (Mateo 4:4) Abo ta skucha Dios dor di lesa i apliká su Palabra skirbí?
Hende ku ta komuniká regularmente ku Yehova ta gana su aprobashon i ta disfrutá di “e pas di Dios, ku ta surpasá tur komprondementu.” (Filipensenan 4:6, 7; Proverbionan 1:33) Tambe nan tin e chèns di haña bida eterno den un paradeis riba tera, liber di tur ansiedat i sufrimentu ku nos ta mira awe. (Salmo 37:29; Juan 17:3) Ki un rekompensa maravioso pa esnan ku ta hasi e mihó uso posibel di e milager di komunikashon inteligente!
[Plachi na página 10]
Hende ta komuniká ku Dios dor di lesa Beibel i hasi orashon na dje