Mi Mester Pone Tatú?
Hóbennan Sa Puntra . . .
Mi Mester Pone Tatú?
“Algun tatú ta bunita. Nan ta masha kreativo.”—Jalene. *
“Mi a soña ku mi promé tatú pa dos aña largu.”—Michelle.
UNDA ku bo bira bo ta mira tatú, òf a lo ménos, esei ta e impreshon ku bo ta haña. Kantantenan di rock, ídolonan di deporte, modelonan i streanan di sine tur ta kana broma ku nan tatú. Hopi teenager a imitá nan ehèmpel i ku orguyo ta broma ku nan tatú riba nan skouder, man, sintura i ènkel. Andrew ta argumentá: “Tatú ta master. Ta abo mester sa si bo kier un òf nò.”
World Book Encyclopedia ta bisa: “Tatuahe ta e práktika di pone dibuho permanente riba kurpa. Ku un palitu òf wesu fini i skèrpi, òf ku un angua nan ta prek buraku chikí i introdusí un supstansia di koló natural den e kueru.”
Maske ta difísil pa duna un sifra eksakto, un fuente ta kalkulá ku 25 porshento di tur hóben di 15 pa 25 aña na Merka tin un tatuahe. Sandy ta bisa: “Esei ta loke mayoria hende ta hasi.” Dikon tin hóben ta gusta tatú asina tantu?
Dikon E Ta Asina Popular?
Pa algun hende, un tatú ta un símbolo ku ta mara nan emoshonalmente na un otro persona. Michelle ta konta: “Na su ènkel mi ruman hòmber tin e nòmber di un mucha muhé ku e tabata sali kuné.” Pero kiko ta e problema? “Nan no ta ku otro mas.” Segun e revista Teen, “dòkternan ta kalkulá ku mas ku 30 porshento di tur tatuahe ku ta wòrdu kita for di mucha muhénan tiner ta pa motibu ku e hóbennan aki kier kita e nòmber di un èks-frei.”
Tin hóben ta konsiderá tatú komo algu bunita. Otronan ta konsiderá nan komo un símbolo di independensia. “T’ami tin kontròl riba mi bida awor,” Josie a deklará, i el a sigui bisa ku e tatú ku el a pone tabata “e úniko desishon importante ku mi a tuma den mi bida.” Ponementu di tatú ta duna algun hóben e oportunidat pa eksperimentá; e ta pone nan sinti ku ta nan tin kontròl riba nan aparensia. Ademas, ponementu di tatú
por sirbi komo un símbolo di rebelion òf estilo di bida alternativo. P’esei algun tatú ta kontené palabra malu i figuranan indesente òf lemanan provokativo.Sin embargo, mayoria hóben kisas simplemente ta bai tras di moda. Pero djis pasobra ta parse ku tur hende ta pone tatú, abo tambe tin ku hasi esei?
Un Arte di Antigwedat
Definitivamente ponementu di tatú no ta algu nobo. Nan a deskubrí momianan egipsio i libio ku tabatin tatuahe. Aparentemente e hendenan aki a biba sientos di aña promé ku tempu di Kristu. Na Suramérika tambe nan a haña momianan ku tatuahe. Hopi di e dibuhonan tatuá aki tabata direktamente relashoná ku adorashon di diosnan pagano. Segun e investigadó Steve Gilbert: “E promé tatuahe ku hende ta na haltura di dje i ku ta representá algu konkreto, i no djis un dibuho apstrakto, ta di e dios Bes. Den mitologia egipsio, Bes ta e dios inmoral di libertinahe.”
Ta notabel ku e Lei di Moisés a prohibí e pueblo di Dios di pone tatú. Levítiko 19:28 ta bisa: “No hasi ningun kòrtá na boso kurpa pa un morto, ni tatuá ningun marka na boso kurpa. Ami ta SEÑOR.” Adoradónan pagano, manera e egipsionan, tabata pone tatuahe di e nòmbernan òf símbolonan di nan diosnan riba nan pechu òf brasa. Dor di tene nan mes na Yehova su lei enkuanto tatú, otro hende lo por a nota ku e israelitanan tabata diferente for di e otro nashonnan.—Deuteronomio 14:1, 2.
Maske kristiannan djawe no ta kai bou di Lei di Moisés, e prohibishon aki ta pone bo pensa sí. (Efesionan 2:15; Kolosensenan 2:14, 15) Si bo ta un kristian, sin duda lo bo no kier marka bo kurpa, ni sikiera temporalmente, ku algu ku tin di haber ku paganismo òf adorashon falsu.—2 Korintionan 6:15-18.
Peligernan pa Salú
Tambe bo mester tuma na kuenta ku bo por haña bo ku problemanan di salú. Dr. Robert Tomsick, un dosente di dermatologia ta komentá: “Loke bo ta hasi ta kibra e kueru i hinka pigmento den bo kurpa. Maske e angua ta drenta un tiki so, kada bes ku bo kibra e kueru, bo ta kore riesgo di haña un infekshon di bakteria òf vírus. Mi ta kere ku [ponementu di tatú] por lo general ta trese su peligernan kuné.” Dr. Tomsick ta sigui bisa: “Unabes ku pigmento ta aden, asta si bo no haña un infekshon, semper bo ta kore riesgo di haña alergia, di haña un inflamashon di kueru i reakshonnan alérgiko ku por pone bo kueru bira kòrá, hincha, kaska i grawatá.”
Maske e intenshon tabata pa e tatú keda permanentemente, tin vários método pa purba kit’é. Un di nan ta mediante laser ku ta kima e tatú, un otro manera ta mediante un operashon den kua ta kòrta e tatú kit’é afó, tambe tin e método di frega e kueru ku un skeiru di waya pa kita e dos kapanan mas ariba afó, ademas por usa un líkido di salu tambe ku ta penetrá den e kueru i disolvé e tatú, anto finalmente tin e método di kita tatú ku un ásido ku ta krea un sikatris na su lugá. E métodonan aki ta karu i por ta hopi doloroso. E revista Teen ta bisa: “Ta mas doloroso pa kita un tatú mediante laser ku pone un tatú.”
Kiko Otro Hende Lo Pensa?
Un otro kos ku bo tin ku pensa seriamente riba dje ta kiko otronan lo bisa di bo tatuahe, ya ku hopi hende no ta gusta esei. (1 Korintionan 10:29-33) Li, un señora di Taiwan, sin pensa promé a pone un tatú tempu ku e tabatin 16 aña. Awor e tin 21 i ta traha na un ofisina. Li ta atmití: “Mi ta sinti mi malu ora mi koleganan ta keda wak mi tatú.” Theodore Dalrymple, un britániko ku ta un profeshonal di salú mental, a bisa ku pa hopi hende, tatú “hopi bes ta un indikashon visibel ku un hende . . . ta pertenesé na un supkultura violento, brutal, antisosial i kriminal.”
Un artíkulo den e revista American Demographics a bisa algu similar: “No kabe duda ku mayoria merikano ta sinti ku dòrnamentu di e parti visibel di kurpa ku tatú òf body piercing ta un rísiko. Ochentisinku porshento [di hóben] ta di akuerdo ku e deklarashon di ku ‘hende ku tin tatú visibel . . . mester komprondé ku e manera di ekspresá nan mes aki por krea un opstákulo den nan karera òf den nan relashonnan personal.’”
Konsiderá tambe si ponementu di tatú lo duna realse na e echo ku bo ta un kristian òf si lo e rebahá esei. Esei lo por duna otro hende “motibu pa tropieso”? (2 Korintionan 6:3, NW) Ta bèrdat ku algun hóben tin nan tatú na lugá ku hende no por mira. Kisas ni nan mayornan no ta na haltura di e tatúnan sekreto aki. Pero tene kuidou! Un bishita di emergensia serka dòkter òf djis un baño ku bo dal na skol lo por revelá bo sekreto! Ta mihó pa nos “komportá nos mes den tur kos na un manera onorabel.”—Hebreonan 13:18.
Meskos ku tur loke ta na moda, tatú ku tempu por bai for di moda. Pensa un ratu, tin algu ku bo sa bisti—sea ta un jeans, kamisa, shimis òf un par di sapatu—ku bo ta gusta asina tantu ku lo bo kier bistié pa e restu di bo bida? Klaru ku no! Estilo, diseño i koló ta kambia. Sin embargo, kompará ku un mancha riba un pida paña, tatú ta difísil pa kita. Ademas, loke ta “master” pa bo ora bo tin 16 aña kisas no ta dje atraktivo ei ora bo tin 30.
Hopi hende a lamentá ku nan a hasi kambionan permanente na nan aparensia. Amy ta konta: “Mi a pone un tatú promé ku mi a siña tokante Yehova. Mi ta purba ten’é tapá. Ora rumannan den e kongregashon mir’é, mi ta sinti bèrgwensa.” Ki lès nos ta siña for di esei? Pensa promé ku bo pone tatú. No tuma un desishon ku lo duel bo despues.
[Nota]
^ par. 3 A kambia algun nòmber.
[Plachi na página 26]
Hopi bes hende ta asosiá tatú ku un estilo di bida rebelde
[Plachi na página 26]
Ku tempu, hopi hende ta lamentá ku nan a pone un tatú
[Plachi na página 27]
Pensa promé ku bo pone tatú