Piñata—Un Tradishon Bieu

DI UN ESKRITOR DI SPIÈRTA! NA MEXICO

E MUCHANAN den bario tin un fiesta. Nos por tende nan stèmnan eksitá grita: “Dale! Dale! Dale!” Nos ta lur den e patio i nos ta mira un buriku kolorido dekorá ku crêpe papier mará na dos palu. Un mucha ku wowo tapá ta dal e buriku ku un palu i ta purba kibr’é. E invitadonan ta grita pa anim’é. Porfin e buriku ta kibra, i mangel, fruta i ko’i hunga ta basha for di dje. E muchanan ta na harimentu i tur hende lihé-lihé ta purba piki e regalonan. E ta parse algu leuk. E hendenan a bisa nos ku e buriku ta un piñata i ku kibramentu di piñata na fiesta ta un tradishon aki na Mexico i na algun otro pais latinoamerikano.

Nos ta puntra nos mes ta pakiko piñata ta asina popular. Kiko ta su orígen? Kibramentu di piñata tin un nifikashon spesial? Nos a disidí di investigá esei.

Orígen di Piñata

Segun opinion general, ta e chinesnan lo tabata e proménan pa usa algu manera piñata komo parti di nan selebrashon di Aña Nobo, lokual a marka tambe prinsipio di lènte. Nan tabata traha figura di baka, bue, i búfalo, i nan tabata fura nan ku papel di koló i yena nan ku sinku tipo di simia. Nan tabata usa palu di koló pa kibra e figuranan. Nan tabata kima e papelnan di dekorashon ku nan a usa pa kubri e figuranan, anto kaba nan tabata warda e shinishi pa haña suerte durante e aña binidero.

Aparentemente den siglo 13, e biahero di Venesia, Marko Polo, a hiba e kustumber aki di China pa Italia. Ei, el a haña su nòmber aktual for di e palabra italiano pignatta òf pòchi frágil, anto nan a yen’é ku chochoria, hoya òf mangel en bes di simia. Despues e tradishon a plama bai Spaña. Kibramentu di piñata a bira un kustumber riba e promé djadumingu di Kuaresma. * Ta parse ku na prinsipio di siglo 16, misioneronan spañó a trese piñata Mexico.

Sin embargo, e misioneronan spañó lo a keda sorprendí (meskos ku nos) ora nan a haña sa ku e nativonan di Mexico ya kaba tabatin un tradishon similar. E astekanan a selebrá hasimentu di aña di Huitzilopochtli, nan dios di solo i guera, dor di pone un pòch’i klei riba un biga den su tèmpel na fin di aña. E pòchi tabata dekorá ku pluma kolorido i yená ku tesoro hopi chikitu. Despues nan tabata kibr’é ku un palu, i e tesoronan ku tabata basha for di dje a bira un ofrenda pa e imágen di e dios. E mayanan tambe a hunga un wega den kua partisipantenan ku wowo  tapá tabata dal un pòch’i klei kologá na un kabuya.

Komo parti di nan strategia pa kombertí e indjannan, e misioneronan spañó ingeniosamente a hasi uso di piñata pa simbolisá, entre otro, e lucha kristian pa vense Diabel i piká. E piñata tradishonal tabata un pòch’i klei kubrí ku papel di koló i trahá den forma di strea ku shete punta dòrná ku slenger. Nan tabata bisa ku e shete puntanan aki ta representá e shete pikánan mortal: kudishi, golosidat, flohedat spiritual, orguyo, envidia, rabia i pashon. Kibramentu di piñata ku wowo tapá a representá fe inkuestionabel i determinashon fuerte pa vense tentashon òf maldat. E regalonan den e piñata tabata e rekompensa.

E Piñata Djawe

Mas despues, piñata a bira parti di e festividatnan di posada * durante e temporada di Pasku i te awe e ta asina. (Nan ta usa un piñata den forma di strea pa representá e strea ku a guia e astrólogonan pa Bètlehèm.) Tambe nan ta haña ku ta masha importante pa kibra piñata na fiesta di hasimentu di aña. Sí, piñata a bira asina un tradishon mèksikano ku Mexico ta asta eksportá nan pa otro pais.

Nos a bin haña sa ku pa hopi hende na Mexico, piñata a pèrdè su nifikashon  religioso i nan ta konsider’é komo algu leuk i inofensivo. De echo, na Mexico nan ta usa piñata na vários okashon festivo, no solamente ora di posada òf hasimentu di aña. I bo por kumpra nan den hopi figura ademas di e strea tradishonal. Tin biaha nan ta trahá den forma di bestia, flor i payaso.

Kristiannan mester tene kuenta ku konsenshi di otro hende ora nan ta evaluá pa usa piñata na un fiesta. (1 Korintionan 10:31-33) E punto prinsipal no ta pa wak kiko e práktika a nifiká míles di aña pasá, sino kon e área kaminda abo ta biba ta mir’é. Ta klaru ku opinion por varia di un lugá pa otro. Ta p’esei ta sabí pa evitá di laga e asuntu bira un problema. Beibel ta bisa: “No laga ningun hende buska su mes interes, sino esun di su próhimo.”—1 Korintionan 10:24.

[Nota]

[Plachi na página 23]

Tene kuenta ku konsenshi di otro hende ora di evaluá si ta usa piñata na un fiesta

[Plachi na página 23]

Tin piñata di tur tipo di figura i tamaño