E Simia Mas Grandi na Mundu

Hopi aña pasá, ora ku un simia ekstraordinariamente grandi a laba bini kantu na islanan Maldiva i na Indonesia, el a pone hende su imaginashon traha. Mitonan a kuminsá sirkulá tokante su orígen. Tabatin hende ku a pensa ku e simia a bini for di un palu bou di laman. P’esei nan a dun’é e nòmber Coco-de-Mer, esta, koko di laman. Hende a asta kere ku e tabata e fruta prohibí ku Adam a kome den hòfi di Edén. Sin embargo, porfin meimei di siglo 18 nan a deskubrí e bèrdat. E simia misterioso aki a bini di un tipo di palu di koko ku bo ta haña solamente na Seychelles, un grupo chikí di isla den Oséano Indio.

Na Vallée de Mai, riba e isla di Praslin, bo ta haña e konsentrashon mas grandi di Coco-de-Mer. E palunan di koko aki por alkansá un haltura di 30 meter i segun kálkulo nan ta biba pa sientos di aña. Un kos fasinante di Coco-de-Mer ta ku tin palu machu i palu hembra. Pa e palu hembra por produsí fruta, e mester ser polinisá dor di un palu machu di Coco-de-Mer. Pues anto, pa e tipo di koko aki sobrebibí den mondi mester tin palu madurá di ámbos sekso.

E fruta di e palu hembra di Coco-de-Mer ta realmente úniko. Ora e koko ta na palu e ta parse un kurason bèrdè grandi. Pero den e koko tin un simia grandi ku un splet meimei ku por pisa te ku 20 kilo. Algun koko tin mas ku un simia. No ta un sorpresa anto ku The Guinness Book of Records a registrá Coco-de-Mer komo e palu ku ta pari e simia mas grandi na mundu.

Ora bo para bou di un di e palunan ei i hisa kara wak e tròshi di barank’i koko aki, bo ta keda impreshoná ku e maravia ei di kreashon. Pero esei tambe ta pone bo den un situashon prekario. E tròshinan ei por pisa un 180 kilo. Sin embargo, sorprendentemente no tin niun informe di hende ku a muri dor ku koko a kai riba nan. Pero tòg ta un bon idea pa no bishitá Vallée de Mai durante mal tempu. E mihó tempu pa atmirá e fruta pekuliar aki ta ora wer ta kalmu.