For di Nos Lektornan

Sentidonan Asombroso Mi tin 15 aña di edat i ta for di tempu ku mi a siña lesa mi a kuminsá lesa boso revistanan. Danki pa e seri “Bo Ta Apresiá e Sentidonan Asombroso di Bida?” (8 di mart 2003) E artíkulonan tabata hopi interesante. Masha danki pa e trabou duru i investigashon ku boso ta hasi pa presentá kada edishon di Spièrta! Mi ta ansioso pa lesa esun siguiente!

H. S., Merka

E seri aki realmente a hasi mi konsiente ku nos kurpa ta masha kompliká. Mi a keda asombrá ku hende su punta di dede por detektá un punta ku ta solamente tres mikron haltu! Yehova mester tabata ègt interesá den su kreashon ku el a pensa riba un kos chikitu asina.

E. R., Oustralia

Mártir di Spaña Un danki di kurason pa e artíkulo “Un Hòmber Ku A Skohe pa Obedesé Dios.” (8 di mart 2003) Mi a keda masha konmoví ora mi a lesa di Antonio Gargallo. Ounke e tabata un hóben di apénas 19 aña ku a kaba di batisá komo un kristian, el a mantené su integridat ora ku diripiente el a hañ’é ta tuma un desishon asina serio. E relato aki a laga mi komprondé kuantu fortalesa i pas interno Yehova por duna nos si nos ta desididu pa hasi su boluntat.

M. T., Italia

Masha danki pa e eksperensia kòrtiku pero tòg poderoso aki. Segun ku mi tabata les’é, awa tabata basha for di mi wowo. Loke foral a konmové mi tabata e karta ku Antonio Gargallo a skirbi su mama ku su ruman muhé promé ku nan a ehekut’é. Por fabor, sigui skirbi tokante kristiannan ku a mantené nan integridat na Yehova ora nan a haña nan konfrontá ku morto, pasobra esaki ta fortalesé nos fe.

R. O., Nigeria

Sapatu Danki pa e artíkulo “Bo Sapatunan Ta Realmente Kómodo?” (8 di mart 2003) Mi tabatin añanan ta sufri di problema ku pia i mi a hasi vários operashon chikitu na mi tenchinan. Finalmente mi a deskubrí ku mi tin un pia ku ta un tiki mas grandi ku e otro. Dor ku pa años mi a bisti e sais di sapatu inkorekto, awor mi tin ku bisti sapatu ortopédiko.

R. G., Merka

Esaki tabata un bon artíkulo. Sin embargo, boso no a bisa ku generalmente e mihó ora di dia pa kumpra sapatu ta parti atardi, ora ku probablemente e pianan ta hinchá.

A. W., Canada

“Spièrta!” ta kontestá: Danki pa bo opservashon. Sea asina bon di wak “Opservando Mundu,” e sekshon “Problemanan di Salú Relashoná ku Sapatu,” ku a aparesé den e “Spièrta!” na spañó, di 8 di ougùstùs 1999.

Spik Mi kier ekspresá mi apresio pa e artíkulo “Hóbennan Sa Puntra . . . Ki Tin di Malu den Spik?” (8 di febrüari 2003) Mi ta un studiante na universidat i mi tin e kustumber di spik for di tempu ku mi tabata den vijfde klas. Semper mi tabata puntra mi mes si ta bon pa spik, pero mi no por a haña un kontesta. P’esei, e artíkulo aki ta un berdadero tesoro. Mi ta bai kibra ku e kustumber aki na mi siguiente tèntamen pa kua mi ta studiando awor.

S. Y., Ukrania

Prostitushon di Mucha Danki pa e seri “Prostitushon di Mucha—Un Realidat Trágiko.” (8 di febrüari 2003) Loke prinsipalmente a touch mi kurason ta e echo ku ounke e tópiko aki tabata doloroso, boso a duna e víktimanan un speransa. E vários eksperensianan ku boso a konta ta similar na mi propio eksperensia. E seri a mustra ku asta den e sistema bieu di kosnan aki, e heridanan di un trouma teribel pa un gran parti por ser kurá ku e yudansa di Yehova.

P. R., Alemania