Mi Fundeshi pa un Bida Signifikativo

SEGUN E RELATO DI ERNEST PANDACHUK

Mi a nase den e sabananan di Saskatchewan, Canada. Tempu mi tabatin 23 aña mi a bai Afrika, kaminda pa 35 aña mi tabatin un bida fasinante komo misionero. Kon bin mi bida a bai asina? No ta pa kasualidat. Laga mi splika dikon.

MI PROMÉ kas tabata trahá di palu, klei i yerba; e no a duna nos famia sufisiente protekshon kontra e wenternan pisá di sabana. Na 1928, Tata ku Mama a tuma literatura bíbliko serka un persona ku tabata bishitá nos kas den kunuku. Nos ta nuebe ruman, pero e tempu ei mayoria di nos no a nase ainda. Durante e wenter largu ku a sigui, Tata ku Mama a studia Beibel ku yudansa di e publikashonnan ku nan a haña. P’e siguiente lènte, nan tabata konvensí ku nan a haña e bèrdat. Nan a kuminsá papia tokante e bèrdat ku nan famianan, amigunan i bisiñanan pero spesialmente ku nan yunan.

Mi a nase na 1931, i no muchu tempu despues mi sinku rumannan mas chikitu a nase. Lesamentu i studio di Beibel tabata parti di nos rutina di famia. Mi tin masha dushi rekuerdo di e maintanan ku nos tabata pasa huntu. Tata tabata dirigí e konsiderashon di un teksto di Beibel ku nos, i e tabata hasi esei asta si nos tabatin bishita. Mama ku Tata i tambe e yunan mas grandi tabata haña bùrt pa lesa duru for di e publikashonnan basá riba Beibel.

Fuera di siña nos lesa i skirbi, tambe Tata a siña nos pa hasi investigashon via konkordansianan bíbliko. No a dura muchu ku nos a siña kon pa usa Beibel pa splika nos kreensianan na otro hende. E kòmbersashonnan agradabel ei a yuda mi rasoná riba temanan bíbliko. Ku tempu, mi por a usa Beibel pa refutá siñansanan religioso ku ta falsu. Mi por a proba ku e alma ta muri, ku fièrnu di kandela no ta eksistí i ku Dios i Hesus no ta igual òf parti di un asina yamá Trinidat.—Eklesiastés 9:5, 10; Ezekiel 18:4; Juan 14:28.

Tambe Tata ku Mama a siña nos mediante nan ehèmpel i a animá nos pa para firme pa loke ta korekto, asta si esei a nifiká ser impopular. Por ehèmpel, nunka nan no a usa tabako, i nan a spièrta nos kon esei lo por kontaminá nos i di e preshon ku nos lo por a haña na skol pa us’é. Mi ta kòrda Tata su palabranan: “Kisas un mucha lo  por yama bo muhé si bo nenga di huma. Pero djis puntra e mucha: ‘Ken ta hòmber? Esun ku ta dominá e yerba òf esun ku e yerba ta dominá?’”

Tempu ku mi tabatin 11 aña mi a haña un otro prueba ku lo a indiká si lo mi a aktua na armonia ku e entrenamentu bíbliko ku mi a haña den mi infansia. E tempu ei Segundo Guera Mundial a kuminsá, i na skol muchanan mester a rindi lealtat na bandera. Mi a komprondé for di mi studio di Beibel ku esei ta un akto di adorashon, anto p’esei mi no a partisipá. Komo konsekuensia nan a skòrs mi pa seis luna for di skol.

Pero ku tempu mi a kaba skol tòg, i na mart di 1947 mi a simbolisá mi dedikashon na Yehova Dios mediante boutismo bou di awa. Seis luna despues mi a bira pionero, un predikadó di tempu kompletu di e bon nobo. Promé mi a sirbi na e parti zùit di Saskatchewan, kaminda mi tabata prediká na kunukeronan i doñonan di rancho den e teritorio inmenso aki. Durante zomer mi tabata prediká riba kabai, i den wenter friu, mi tabata usa loke nos a yama kabus, esta, un garoshi será halá pa kabai. Tabatin un konfó den dje pa ten’é kayente, pues mi mester a tene kuidou pa e garoshi no kènter.

E hendenan di kunuku tabata amigabel i hospitalario. Si mi a hasi bishita atardi lat, hopi bes e hendenan tabata invitá mi pa pasa anochi serka nan. Mi tabata gusta e kòmbersashonnan bíbliko ku tabata sigui un mundu! Famia Peterson a reakshoná bon despues di un di e kòmbersashonnan aki ku nos tabatin henter un anochi largu. Earl ku su mama a bira Testigunan di Yehova masha seloso.

Sirbiendo na Quebec

Na 1949, mi a respondé na e yamada ku nan a hasi pa pioneronan bai yuda ku e trabou di prediká na e provinsia di Quebec. Alrededor di 200 pionero di wèst Canada a respondé na e yamada aki. Nan a yega na e stat di Montreal na sèptèmber i tabata kla pa risibí nan asignashon na kualkier parti di Quebec. Esaki tabata durante e periodo ku e Promé Minister katóliko Maurice Duplessis, kende a hura di kaba ku e Testigunan den e provinsia, tabata na mando.

Eseinan tabata tempunan drùk i emoshonante, yen di desafio. E desafionan aki tabata entre otro siña franses i tambe enfrentá aresto i gruponan di bochinchero ku tabata lanta kontra nos anto tambe intrusonan fanátiko ku tabata bin stroba nos asambleanan kristian. Sin embargo, e intoleransia ei no a intimidá mi ni no a pone mi bandoná mi karera komo sirbidó di Dios. Mi mayornan a siña mi stima loke ta korekto i a duna mi e konvikshon ku e obra mundial di prediká ku Hesus a predisí lo wòrdu hasí, apesar di oposishon.—Mateo 24:9, 14.

Durante e tempu ku mi tabata na Quebec, mi a konosé Emily Hawrysh, un pionero fiel di Saskatchewan. Nos a kasa dia 27 di yanüari 1951, i desde e dia ei Emily ta mi partner i kompañera fiel ku ta animá mi. Dor ku nos meta tabata pa partisipá mas plenamente den sirbishi, nos a yena solisitut pa bai Skol Bíbliko di Galaad di Watchtower i nos a wòrdu aseptá. E kurso aki ta  dura vários luna i ta prepará studiantenan pa e trabou di misionero. Na febrüari 1953 nos a gradua, esaki tabata e di 20 klas di Galaad.

Miéntras nos tabata warda riba e dokumentonan pa nos por a drenta Afrika, nos a haña invitashon pa yuda e kongregashonnan di Testigunan di Yehova na Alberta i Ontario, Canada. E tempu ei nos tabata usa transporte públiko pa bai di kongregashon pa kongregashon. Ta p’esei nos a siña biba simpel i karga tur loke nos tabatin den un valis. Un par di luna despues, ora tur nos papelnan pa bai Afrika a bin kla, nos a sali rumbo pa Sur Rodesia, loke awe ta Zimbabwe.

Ahustenan Ku Nos Mester A Hasi na Afrika

Sinku luna despues di nos yegada, nos a haña asignashon pa bishitá gruponan di Testigu di Yehova tantu na Zimbabwe komo na Bòtswana i tambe e parti zùit di Nort Rodesia (loke awe ta Zambia). Na Skol di Galaad nos a siña pa no kompará nos asignashon nobo den eksterior ku esun di nos pais natal i pa kòrda ku sea kual sea e sirkunstansia ku nos haña nos aden, nos por siña algu for di nos eksperensianan. E bon palabranan ei a yuda nos ahustá nos pensamentu. Te awe, ami ku Emily ta di akuerdo ku e lema: “Saka lo mihó di kada situashon ku presentá; kisas lo ta e promé i último biaha ku lo bo pasa aden.”

Nos a biaha ku trein, bùs, trùk òf baiskel, loke tabata disponibel. Ounke esaki tabata hopi duru, tabatin otro sirkunstansianan ku a pone nos determinashon pa “saka lo mihó di kada situashon ku presentá” na prueba. Durante e promé dos añanan, pa motibu di restrikshonnan legal Emily no por a bai den e teritorionan di tribu ku mi. Kier men ku ora nos tabatin apénas un poko aña kasá, mi esposa mester a keda den serkania di pueblonan kaminda trein ta pasa. Hopi bes sin kompaño di otro Testigunan. Emily su fe, kurashi i determinashon no solamente a yena mi ku atmirashon i amor p’e sino tambe a duna fruta di Reino den e komunidatnan aki.

Asina ku Emily a haña un lugá di keda serka un di e habitantenan lokal, e tabata kuminsá prediká mesora den serkania te ora ku mi bolbe bèk for di e teritorio di tribu. Tin bes, e tabata traha su so pa un luna largu. El a haña fortalesa i protekshon dor di konfia riba e poderoso man di Yehova, i su sirbishi a duna fruta. Rita Hancock tabata un di e personanan ku a reakshoná faborabel na e bèrdat di Beibel i mas despues su esposo tambe. El a bira un ruman fiel ku a sirbi komo ansiano kristian te na su morto. Awe tin kongregashonnan ku ta floresé masha bon mes den algun di e pueblonan kaminda Emily a planta simia di e bèrdat di Beibel.

Hospitalidat i Kreatividat Afrikano

Entretantu, den e teritorionan di tribu, e apresio profundo ku e Testigunan afrikano tin pa Yehova su organisashon i su representantenan biahero tabata un eksperensia ku a konmové mi mashá. E rumannan kristian amoroso aki a perkurá bon pa mi. Tur djaluna mi tabata biaha bai un otro sitio di asamblea. Mi lugá di keda tabata un kasita di yerba ku nan a kaba di traha. Esaki a pone mi kòrda e kas di mi mayornan den nos kunuku na Saskatchewan. Mi kama tabata un tapeit di yerba di 30 centimeter diki riba flur, ku un klechi riba dje.

Generalmente nan tabata tene e asambleanan di e teritorionan di tribu den un ambiente di naturalesa. Esnan ku tabata asistí tabata limpia e suela, pero tabata laga e palunan ku tabatin hopi blachi keda pa fresku. Nan tabata mara bultonan di yerba bunita asina huntu i pone nan un tras di otro pa hende por a sinta riba nan. Por último nan tabata traha un kurá rònt di e lugá ku nan a hasi limpi. Den e ambiente di naturalesa aki, loke semper tabata touch mi kurason ta e stèmnan bunita di nos rumannan afrikano ku ta kanta alabansa na Yehova den un armonia inolvidabel.

Un Eksperensia Inolvidabel

Den transkurso di mi añanan den sirbishi, mi a konosé Gideon Zenda, alto inspektor di enseñansa di e skolnan ku tabata kai bou di Iglesia Anglikano. Gideon a haña su edukashon, inkluso su estudio universitario, via e iglesia ei. Sin embargo, e no a haña kontestanan satisfaktorio pa e tantísimo preguntanan ku e tabatin tokante Beibel. P’esei el a pidi pa mi topa kuné i un par di otro kolega di dje pa mi kontestá e  preguntanan aki. Na tur tabatin mas o ménos 50 hende presente pa e reunion aki, ku a inkluí entre otro inspektornan di skol, maestronan i kabesnan di skol. Gideon a habri e reunion. Den un manera ordená, nos tabata trata un tópiko tras di otro. Mi a papia pa 15 minüt riba kada tópiko anto kaba mi a konsiderá preguntanan. E reunion a dura basta ora.

E resultado di e reunion ekstraordinario aki tabata ku Gideon, su famia i un kantidat grandi di su koleganan tur a bira sirbidónan dediká i batisá di Yehova. E obispu lokal a duna nan tur ku tabata traha den e sistema di edukashon anglikano nan retiro. Sin embargo, niun no a laga esei intimidá nan i nan a keda firme den Yehova su sirbishi; algun asta a kuminsá traha pionero.

Reakshon Riba un Pelíkula Ku A Kousa un Impakto

Na 1954, Testigunan di Yehova a estrená un pelíkula nobo: E Sosiedat di Mundu Nobo den Akshon. E siguiente aña gobièrnu a kita e restrikshonnan legal ku tabata stroba un esposa di kompañá su esposo pa bai den e teritorionan di tribu. Esaki a pone ku djei padilanti Emily por a bai ku mi den e teritorionan di tribu. E tempu ei nos a haña un vehíkulo, un generator eléktriko i un proyektor pa pasa e pelíkula den e komunidatnan di tribu. Hopi di nan nunka no a mira un pelíkula, p’e motibu ei nos presentashonnan a hala hopi atenshon. E pelíkula a mustra kon paso a paso nos imprenta grandi na Brooklyn, New York, ta produsí Beibel i literatura basá riba Beibel.

Tambe e pelíkula tin esenanan di e hermandat internashonal di Testigunan di Yehova partisipando huntu den adorashon na Yankee Stadium, New York, na 1953. Nunka promé e afrikanonan aki no a mira tal muestra di unidat i amor entre diferente rasanan. E pelíkula aki a motivá hopi famia di Zimbabwe pa studia Beibel i asosiá ku e Testigunan. Masha hopi petishon tabata bini di parti di kabesnan di skol rònt Zimbabwe pa pasa e pelíkula ya ku nan tabata rekonosé e balor edukashonal ku tal medio visual tin pa nan alumnonan.

Un anochi lat un par di ruman a lanta mi for di soño pa mi pasa e pelíkula. Pa mi sorpresa alrededor di 500 hende a kana vários ora pa nan por a mir’é. Nan a tende ku mi tabata den bisindario i a pasa e pelíkula. Pa ora ku e multitut a bai, un otro grupo di 300 hende a yega. Pues, mi a bolbe pasa e pelíkula. Figura bo, e último hendenan a bai tres or di mardugá! Durante un periodo di 17 aña, mas ku un mion hende a mira e pelíkula impaktante aki, anto esei ta na Zambia so!

Asignashon Nobo na Afrika

Despues ku nos a sirbi sinku aña i mei na Zimbabwe, nan a transferí nos pa Suráfrika. Esaki a nifiká ku nos mester a siña e idioma afrikaans. Mas despues nos mester a siña papia sesoto i zulu tambe. E echo ku nos por a yuda otro hende siña e Palabra di Dios den otro idiomanan a hasi nos mas efikas den sirbishi i a duna nos un gran satisfakshon.

Na prinsipio di 1960 nos a haña asignashon pa traha den e trabou biahero den e parti zùit di Afrika. Pa e siguiente 27 añanan nos a biaha masha hopi mes rònt Lesoto, Namibia, Suráfrika i Swazilandia, i tambe e islanan Ascension i St. Helena den e parti zùit di Oséano Atlántiko. Na tur nos a biaha míles i míles di kilometer pa sirbi nos rumannan kristian. Nan fe i lealtat bou di sirkunstansianan desfaborabel a animá nos pa nunka no entregá.

Por ehèmpel, mi a sera konosí personalmente ku Testigunan na Swazilandia ku no a komprometé nan fe ora Rei Sobhuza II a muri. Dor ku nan a nenga di partisipá den e ritonan antibíbliko na entiero di e dignatario ei, nan tabata kita e Testigunan for di trabou i priva nan di nan derechonan komo siudadano. Apesar ku pa añanan largu nan tabata pasa trabou, nunka nan no a renunsia nan fe. E echo ku mi a siña konosé e rumannan kristian maravioso aki i ku mi por a papia kara-kara ku nan ta un privilegio masha  grandi, i semper lo mi keda gradisidu na Yehova pa esaki.

Un otro eksperensia ta esun di Philemon Mafereka, un pionero di Mokhotlong, Lesoto, ku ta keda den serunan na un haltura di mas ku 3.000 meter. Debi ku no tin transpòrt disponibel, e ku su kerida esposa, i nan dos yunan, i kuater kandidato pa boutismo a kana mas ku 100 kilometer pa bai na un asamblea ku tabata keda na un haltura di 1.200 meter. Gran parti di e kaminda tabata konsistí di serunan steil ku nan mester a subi baha na man ku pia i di vários riu ku nan mester a krusa.

Despues di e asamblea, ora nan tabata riba kaminda pa kas, nan tabatin shen buki di E berdad cu ta hiba na bida eterna huntu ku nan. E bukinan aki tabata pa e hendenan di Mokhotlong. Pero pa motibu ku e hendenan ku nan tabata topa riba kaminda pa kas tabata interesá den literatura bíbliko, nan stòk di buki a kaba promé ku nan a yega kas. Tabata un privilegio pa ami ku Emily di por a mira personalmente e entusiasmo i deboshon di rumannan kristian manera Philemon i su kasá. I nan ta ehèmpelnan ku te awe nos ta kòrda ku hopi kariño.

Tin bes nos tabata haña nos ku kolebranan venenoso, manera kobra, i tambe inundashonnan i otro peligernan. Pero maske e eksperensianan aki tabata spanta nos n’e momentu ei, nan no ta nada na komparashon ku e rekompensanan i gosonan di un karera den Yehova su sirbishi. Nos a siña ku Yehova nunka no ta bandoná su sirbidónan leal.

Ora Emily a haña problema serio ku su salú, Yehova a duna nos e sabiduria pa trata ku e situashon den un manera balansá. Un kambio den su dieta i mihó kondishonnan sanitario a hasi su rekuperashon mas fásil. Nos a kombertí un trùk den un trailer, i esei a pone ku Emily tabatin un ambiente kontrolá pa biba aden i ku tempu el a bira bon atrobe.

Bèk pa Canada

Na 1988, despues di 35 aña den e trabou di misionero den e fasinante kontinente di Afrika, nan a asigná nos pa bai traha na Canada atrobe. Anto na 1991, un biaha mas mi a kuminsá traha komo superintendente biahero. Despues di ocho aña mi a haña un atake selebral. Ounke mi aktividat a baha drástikamente desde e tempu ei, ainda mi ta sinti un goso pa sirbi komo ansiano den un di e kongregashonnan na London, Ontario.

Awe mi ta sinti un satisfakshon ora mi wak bèk na e tempu ku mi a kuminsá traha pionero riba kabai den e parti zùit di Saskatchewan, mas o ménos 56 aña pasá. Esta gradisidu mi ta ku Tata a persistí den siña nos kon pa pensa manera un persona spiritual, i pa nunka sinti miedu di defendé bèrdat i hustisia! El a siña mi e Palabra di Dios, loke a hasi mi bida signifikativo. E herensia ei a benefisiá mi durante henter mi bida. Lo mi no kambia mi bida den e sirbishi di Yehova pa nada di mundu.

[Plachi na página 19]

Nos famia di nuebe yu na 1949, huntu ku Mama ku tin e yu mas chikí den su brasa. Ami ta pará nèt patras di dje

[Plachi na página 20]

Mi a traha e “kabus” aki pa mi usa den sirbishi

[Plachi na página 20]

Hende muhénan ku a wòrdu arestá na Quebec pa motibu di e predikashon

[Plachi na página 22, 23]

Mi tabata un di e instruktornan di e superintendentenan biahero aki na Zimbabwe

[Plachi na página 23]

Nos a traha e trailer aki pa Emily rekuperá

[Plachi na página 23]

Un potrèt resien di mi ku Emily