E Punto di Bista Bíbliko

Ora Bo Sernan Kerí No Tin e Mesun Religion ku Bo

SEGUN un kálkulo, tin mas ku 10.000 religion i sekta na mundu. Na un pais, aproksimadamente 16 porshento di e poblashon adulto a kambia di religion na dado momentu. Kier men, no ta nada straño ku tin desakuerdo enkuanto kreensianan religioso entre famianan i amigunan. Tin bes esaki ta trese tenshon den famia. P’esei e pregunta ku ta lanta ta: Kon kristiannan mester trata nan sernan kerí ku no tin e mesun religion ku nan?

Un Relashon Spesial

Por ehèmpel wak kiko Beibel ta bisa tokante e relashon spesial ku tin entre mayor i yu. E mandamentu na Eksodo 20:12 pa “onra bo tata i bo mama,” no ta bisa ku esaki ta konta pa un tempu so. Echo ta ku ora Hesus a papia tokante e mandamentu aki na Mateo 15:4-6, el a referí na e onor ku yunan adulto tin ku duna na nan mayornan.

E buki bíbliko di Proverbionan ta spièrta  hende ku nan no mester mustra falta di rèspèt pa nan mayornan. Proverbionan 23:22 ta konsehá bo pa “no despresiá bo mama ora ku e bira bieu.” Proverbionan 19:26 ta spièrta bon kla ku esun ku “maltratá su tata i kore ku su mama ta un yu ku ta kousa bèrgwensa i ta trese reproche.”

Pues, e Skritura ta indiká klaramente ku nos no mester neglishá nos mayornan. E echo ku nos mayornan no ta aseptá nos religion no ta kibra nos lasonan familiar. E mesun prinsipionan bíbliko aki ta apliká tantu na otro famianan yegá komo na nos kasá tambe. Klaramente, kristiannan tin e obligashon moral i bíbliko pa stima nan famianan.

Ta Importante pa Ser Rasonabel

Klaru ku Beibel ta duna spièrtamentu kontra mal kompania, i e influensia aki por bin di famianan yegá. (1 Korintionan 15:33) Hopi sirbidó fiel di Dios di ántes a para firme pa loke ta korekto maske nan mayornan no tabata di akuerdo ku nan. Esaki tabata bisto den e kaso di e yunan di Koré. (Numbernan 16:32, 33; 26:10, 11) Kristiannan berdadero no mester komprometé nan fe pa agradá otro hende, ni sikiera nan famianan.—Echonan 5:29.

Den algun kaso mayornan òf otro sernan kerí por oponé kreensianan di un kristian fuertemente. Tin di nan ku asta por bira enemigu di kristianismo berdadero. Den kasonan asina kristiannan ta dal pasonan rasonabel pa protehá nan spiritualidat. Hesus tabatin rason ora el a bisa: “Un hende su enemigunan lo ta e miembronan di su mes kas. Esun ku stima tata òf mama mas ku mi, no ta digno di mi; i esun ku stima yu hòmber òf yu muhé mas ku mi, no ta digno di mi.”—Mateo 10:36, 37.

Sin embargo, den mayoria kaso kristiannan no ta haña oposishon severo di nan sernan kerí. E úniko diferensia ta ku nan famianan no tin e mesun komprondementu di siñansanan bíbliko. E Skritura Santu ta animá siguidónan di Kristu pa trata esnan ku no ta kreyente “ku suavedat” i rèspèt profundo. (2 Timoteo 2:25; 1 Pedro 3:15) E konseho oportuno di Beibel ta: “E sirbidó di Señor no mester ta pleitadó, ma kariñoso ku tur hende.” (2 Timoteo 2:24) Apòstel Pablo tambe a konsehá kristiannan “pa no kalumniá ningun hende, pa no ta pleitadó, ma suave, mustrando tur konsiderashon pa tur hende.”—Tito 3:2.

Keda den Kontakto i Ekspresá Amor

Promé Pedro 2:12 ta duna kristiannan e siguiente animashon: “Laga boso kondukta ta ekselente meimei di e paganonan [hendenan ku no ta kreyente], asina ku . . . nan por, pa medio di boso bon obranan ku nan ta opservá, glorifiká Dios.” Hopi bes, nos sernan kerí ku no tin e mesun kreensianan ku nos ta mira e kambionan ku nos a hasi den nos bida dor di apliká prinsipionan bíbliko. No lubidá ku hopi hende ku tabata indiferente òf asta kontra e bèrdatnan bíbliko a kambia di opinion. Algun hende kisas a tuma basta aña pa opservá djaserka e bon kondukta di un kasá òf yu promé ku nan a bin investigá e motibu tras di tal kondukta. Ora hende no aseptá bèrdatnan di Beibel, esei no mester ta pa motibu ku un ser kerí ku ta kristian a neglishá nan.

Sin duda sirkunstansianan ta varia, i algun Testigu kristian ta biba leu for di nan mayornan. Kisas nan no por bishitá nan mes tantu ku nan ta deseá. Pero dor di skirbi nan karta, yama nan na telefon òf dor di keda den kontakto regular ku nan den un òf otro manera, esei lo sigurá nos sernan kerí ku nos ta stima nan. Hopi hende ku no ta kristian berdadero ta stima nan mayornan i otro famianan i tin kontakto regular ku nan sin importá nan kreensianan religioso. Kiko ta para pa Testigunan kristian?

[Plachi na página 28]

Si bo keda den kontakto ku bo sernan kerí esei lo sigurá nan ku bo stima nan