Petroli Lo Kaba un Dia?

“Sin [energia] e wilnan di industria no por funshoná . . . Lo no por traha outo, trùk, trein, barku òf avion . . . Sin energia, kasnan lo keda friu i skur, kuminda lo ta kurú. . . . Sin rekursonan di energia, nos lo ta literalmente bèk na e Edat di Piedra.”—Saká for di “Enkuesta Geológiko Merikano di Evaluashon di Petroli Mundial 2000.”

EKSPERTONAN di energia ta kere ku e reservanan di petroli ku tempu lo agotá. Algun di nan ta kalkulá ku e reservanan mundial di petroli lo dura un 63 pa 95 aña mas. Miéntras tantu, hende ta hasiendo uso di otro fuentenan di energia, di kua algun ta ser usá ya pa dékadanan. Entre e fuentenan di energia renobabel—es desir ku por bolbe ser abastesé rápidamente—tin e siguiente tipo: solo, bientu, ola di laman, kayente di oséano i hidroeléktriko. Pero aktualmente, ainda tin problemanan grandi relashoná ku nan produkshon i distribushon.

E prospekto ku hende lo kaba ku tur fuente di energia iremplasabel, anto e ora ei numa bai hasi uso di esnan renobabel sigur ta un prospekto tristu. Kompanianan petrolero ta kla pa probechá di e tempu limitá ku supuestamente ta ser kalkulá ku petroli lo dura. Desafortunadamente, tin tur motibu pa ferwagt ku e problemanan sosial i di medio ambiente ligá ku petroli lo dura mes largu ku e petroli. No tin nodi bisa ku e rais di e problemanan aki no ta e petroli mes. Ta hende su golosidat i set pa poder ta loke a duna petroli su mal reputashon.

Felismente, e futuro di petroli—i de echo di tur fuente di energia—no ta den man di e nashonnan. Na final di kuenta, e ta den man di Esun ku a krea tera i ta perkurá p’e, Yehova Dios, kende a primintí ku pronto tur problema sosial i di medio ambiente relashoná ku uso i mal uso di e rekursonan di tera lo disparsé. (Revelashon 4:11) Manera Beibel ta deklará, e tempu ta serka pa Dios “destruí esnan ku ta destruí e tera.” Dios su gobernashon hustu lo resultá den “un shelu nobo i un tera nobo,” un mundu sin maneho egoista i sin inhustisia. Un mundu den kua lo usa e rekursonan di e tera pa e benefisio di henter humanidat obediente.—Revelashon 11:18; 21:1-4.

[Plachinan na página 12]

Fuentenan alternativo di energia ta entre otro, pènel di solo i mulina di bientu