Petroli—Un Bendishon i un Maldishon?

TE NA ki grado nashonnan industrialisá ta dependé di petroli i su derivadonan? Petroli—i gas natural—ta esensial pa nan, i esaki a krea un “Sosiedat Hidrokarburo,” manera Daniel Yergin a deklará den su buki The Prize (E Premio). Pensa por ehèmpel riba kombustibel pa sende verwarming, gris, was, asfalt, i e kosnan trahá di kímikonan derivá di petroli: avion, outo, boto, leim, fèrf, paña di polièster, kèts, ko’i hunga, dai, aspirin, deodorante, make-up, disko, kòmpiuter, televishon, telefon. Tur dia hopi hende ta usa un kantidat di e mas ku 4.000 produkto- òf artíkulonan derivá di petroli ku tin un gran influensia riba bida moderno. Pero kiko di e daño na e ekosistema di e tera, algu ku a karakterisá e historia di petroli for di su prinsipio?

Un Rei Ku “No Ta Goberná ku Bondat”

Na fin di 1940, ora ku un guera entre Rumania i Hungria tabata parse inminente, e diktadó nazi Adolf Hitler a aktua lihé komo árbitro. Esei tabata un gesto di buena boluntat? Loke Hitler realmente kier a evitá tabata pa posnan di petroli di Rumania kai bou di kontròl di Union Soviétiko. Petroli tabata tambe un motibu prinsipal ku Irak a invadí Kuweit na 1990 i ku otro nashonnan a tuma parti den e kontra atake. Anto esakinan sigur no ta kasonan isolá. E deseo pa haña kontròl riba petroli tabata masha hopi biaha e kousa di konflikto i sufrimentu.

Petroli no solamente ta esensial pa bida moderno, sino tambe ta e kuestion sentral den asuntunan polítiko i e interes spesial di algun hende poderoso. Manera e Organisashon di Paisnan Eksportadó di Petroli (OPEP) a deklará resientemente, petroli no ta un produkto komun i koriente, sino “un rekurso stratégiko.” E nashonnan a usa petroli komo un palanka pa haña bentaha polítiko, dor di establesé embargo- i sanshonnan. Ademas, posnan di petroli, refinerianan i tènkernan tabata e blanko di atake terorista, kousando hopi bes daño teribel na medio ambiente.

E industria petrolero a ser akusá di ta oumentá e daño na medio ambiente dor ku nan plantanan ta saka kooldioxide, lokual kisas ta kontribuí na kambionan mundial den klima. Segun un informe di PEMEX (Petróleos Mexicanos), un di e empresanan petrolero mas grandi na mundu, kontaminantenan ta drenta medio ambiente durante vários fase di prosesá petroli. Ounke awor gasolin ta saka ménos kontaminashon, tòg hopi hende ta haña ku masha tiki kos a kambia despues di kasi seis aña di e Protokòl di Kyoto. E tempu ei 161 nashon a reuní na Hapon pa tuma medidanan pa redusí e menasa di e klima mundial ku ta birando mas kayente. Di otro banda, OPEP ta bisa ku “ta petroli ta krea e rikesa i prosperidat” ku hopi pais ta disfrutá di dje awe. Pero ta semper esaki ta e kaso?

Tin hende ta señalá e daño ku boramentu di posnan di petroli i di konstrukshon di ret di pipa ta kousa. Otro hende kisas ta hala atenshon na e oumento di desempleo na Saudi Arabia, e pais ku tin mas tantu reserva di petroli na mundu. Alí Rodríguez Araque, presidente di OPEP, a bisa: “E gobièrnunan di e nashonnan industrialisá ta probechando enormemente di e sakrifisionan ku nan ta eksigí di produktor, refinadó i konsumidó.”

CorpWatch, un organisashon ku ta wak pa korporashonnan kumpli ku kuestionnan manera hustisia ambiental i duna kuenta pa nan echonan, a deklará: “Ainda petroli ta rei. Pero e no ta goberná ku bondat.”

Kiko lo ta e futuro pa petroli?