Un Regalo Koló di Oro For di Lehano Nort

DI UN ESKRITOR DI SPIÈRTA! NA SUESIA

‘Kiko ta algu típiko di nos pais ku nos por hiba komo regalo?,’ ami ku mi esposa tabata puntra nos mes promé ku nos a bandoná Suesia pa bai bishitá algun amigu na Inglatera. Nos regalo a bira djèm trahá na kas di e bèshi cloudberry di Nort Europa. Komo ku nos kier a hasié un kos edukativo, nos a traha un etikèt informativo basá prinsipalmente riba nos propio opservashonnan i algun referensia lokal. Lo siguiente ta e resultado di nos investigashon.

Kiko Ta Cloudberry?

Cloudberry (na hulandes, bergbraambes, i na latin Rubus Chamaemorus), ta un bèshi ku ta krese na un mata chikí di ménos ku 30 centimeter haltu. Kada mata ta produsí un solo flor blanku i un solo bèshi. Tanten ku e bèshi no ta hechu e ta koló kòrá i duru, pero segun ku e ta hecha, e ta haña un koló hel manera oro i ta bira moli i yen di djus. Su nòmber cloudberry (bèshi di nubia), posiblemente ta bini dor ku den parti nort di Inglatera cloudberry ta krese riba serunan kaminda semper tin hopi nubia abou. Tambe bo ta haña nan den áreanan muhá, prinsipalmente tundra i moeras den henter e region zùit di Polo Norte. Na Suesia nan ta hecha normalmente den ougùstùs, ora ku e hèrfst di Nort Europa ta aserká.

E Oro di Moeras

Pa siglonan e pueblo nativo di Lapland a piki cloudberry komo kuminda pa wenter. E bèshinan tin hopi vitamina C i otro vitaminanan, i komo ku nan ta kontené un preservativo natural, djèm di cloudberry por keda fresku pa años si manten’é friu. Siendo ku e promé pobladónan di e regionnan den nort aki a biba prinsipalmente di karni i piská, cloudberry a bira un suplemento importante di vitamina. P’esei no ta un sorpresa ku nan a yega di yam’é e oro di moeras!

Awendia, nan ta piki gran kantidat di cloudberry pa entregá na supermarket i industria. Por ehèmpel, na Suesia durante un aña normal, e merkado por bende mas ku mil tonelada di cloudberry, i tur ta bèshi ku nan a piki na man! Pikidónan di cloudberry, kendenan hopi bes ta mucha di skol ku tin fakansi, por gana un bon pida zakgeld di e manera aki. E finlandesnan asta a onra e cloudberry dor di grab’é riba nan moneda nobo di dos euro!

Un Eksperensia Sabroso

Cloudberry tin un sabor refreskante zut-zür. Bo por haña djèm òf mermelada di cloudberry i asta likùr di cloudberry den tiendanan spesialisá den delikatès i tambe den otro tienda den statnan prinsipal di Europa i Merka. Sundae di cloudberry a aparesé hopi bes riba e menú di postre na e sena di gala anual pa ganadónan di Premio Nobel, ku ta ser tené na Stockholm, Suesia. Restorantnan eksklusivo sa sirbi e djèm kayente riba eiskrim di vania. Ademas, e djèm ta smak hopi bon ku cheesecake sueko òf ku keshi Camembert hasá, i tambe e ta un dushi reyeno pa tèrt. Na Finlandia nan ta produsí un likùr di cloudberry ku tin koló di oro, i resientemente nan a introdusí biña di cloudberry riba e merkado di biña na Suesia.

Si un dia bo haña bo kaminda nan ta kultivá cloudberry, no keda sin piki nan i purba nan fresku, preferiblemente ku un tiki suku blanku na puiru, i un bola grandi di whipped cream. Lo bo ripará ku nan ta bal oro, i lo bo sinti bo impulsá pa gradisí bo Kreadó pa e dushi regalo aki.