For di Nos Lektornan

Uso di Droga E portada di e edishon di 8 di aprel 2003, (“Kiko Bo Por Hasi si Bo Famia Ta Usa Droga?”) a kapta mi atenshon. Mi ta studiando Beibel ku un señora ku yama Linda. Dos yu hòmber di dje ta adikto na droga. E siguiente mainta mi a studia e revista ei kuné, paragraf pa paragraf. E artíkulonan a dun’é hopi animashon i fortalesa. E informashon a yega na ora.

C. M., Merka

Mi ta dirigí un konsultorio ku ta yuda famianan trata ku adikshon na droga i alkoholismo. Ounke mi ta katóliko, mi ta un lesadó ferviente di Spièrta! Mi ke gradisí boso pa e seri tokante miembro di famia ku ta uso droga. Mi a les’é ku sumo atenshon, ya ku lo e yuda mi den mi trabou ku hóbennan.

H. C., Ekuador

Koko Mi a ègt gusta e artíkulo “Un di e Frutanan Mas Útil na Mundu,” den e edishon di 8 di aprel 2003. Ami ku un amiga ta traha habon komo hòbi. Nos ta usa zeta di koko den nos habon, ya ku e ta bon pa kueru i ta laga e habon skuma hopi. Despues di e artíkulo aki, mi a haña mas apresio ainda pa koko.

C. B., Canada

Mi ke ekspresá mi apresio pa e artíkulo “Un di e Frutanan Mas Útil na Mundu.” (8 di aprel 2003) Resientemente mi a bishitá Mexico, i personalmente mi por a mira bèrdè pa kuantu kos nan ta usa koko! Mi a mira kasi tur e usonan menshoná den e artíkulo. Un manera mas ku mi a mira nan usa palu di koko ta di kòrta ramanan for di e palu, kita e blachinan i mara 10 pa 15 di e stèngelnan seku i fleksibel huntu. Esaki ta un bon kos pa mata muskita kuné!

D. S. Merka

E artíkulo aki a pone mi kòrda mashá riba mi wela, kon e tabata traha kùp di bebe for di kaska di koko durante dékada di 1930. Hopi di su bisiñanan a traha nan kasnan usando e tronkon di palu di koko, i nan daknan tabata trahá di rama di koko seku. Mi ke gradisí boso pa artíkulonan asina bunita.

M. B., Merka

Libertat di Ekspreshon Mi a kaba di lesa e seri riba “Korte Supremo Merikano i Libertat di Ekspreshon.” (8 di yanüari 2003) E artíkulonan a lanta ola di emoshon den mi: asombro pa motibu ku debate riba e tópiko aki ainda ta tumando lugá na Merka; atmirashon pa e manera ábil ku nos rumannan kristian a presentá nos punto di bista; i profundo apresio pa e echo ku ainda nan por dikta sentensia hustu den e mundu inhustu aki. Mi ta sinti hopi goso ora mi ta partisipá den e predikashon di e bon nobo. E tipo di artíkulonan ei ta amplia nos horizonte.

O. S., Belarus