Habon—Un “Vakuna Ku Bo Por Duna Bo Mes”

“E KOUSA number dos di morto di mucha chikitu na mundu no ta malaria, ni tuberkulósis ni AIDS. Sino . . . diarea,” e revista The Economist ta informá. Sin embargo, hopi di e víktimanan yòn aki lo ta na bida awe si regularmente nan i nan famianan a laba nan man ku habon.

The Economist ta informá ku investigadónan na e Fakultat di Higiena i Medisina Tropikal di Lònden a deskubrí ku “si hende laba man manera debe ser, esei lo por redusí kasonan di diarea ku 43%. Lo e por tin e mesun impakto grandi riba infekshonnan di e sistema respiratorio, e kousa prinsipal di morto di mucha chikitu. Un estudio ekstenso ku a ser hasí pa e ehérsito merikano a saka afó ku kasonan di fèrkout i tosamentu a baha ku 45% ora ku sòldánan tabata laba nan man sinku bes pa dia.” Mayoria famia ku ta biba na paisnan den desaroyo por kumpra habon. P’esei e por wòrdu deskribí apropiadamente komo “un tipo di vakuna ku bo por duna bo mes.” Anto riba dje e ta unu ku no ta hasi doló tampoko!

Beibel tambe ta promové higiena. Dos Korintionan 7:1 ta bisa: “Laga nos purifiká nos mes di tur impuresa di karni i spiritu.” Ounke Dios ta preokupá primeramente ku nos puresa spiritual, e ta konsiderá higiena físiko tambe importante. (Levítiko, kapítulo 12-15) Klaru ku e no ta spera pa nos bai te den ekstremo. Sin embargo, nos mester desaroyá e kustumber di laba man ora nos kaba di usa baño, ora nos kaba di baña un beibi òf kambia su bruki, promé ku nos kuminsá kushiná òf kome i na kualke otro okashon den kua tin chèns ku nos por kontaminá otro hende ku bakteria òf vírus. Si nos laba nos man regularmente, nos ta mustra amor kristian pa nos famia i tur hende ku nos lo por bin den kontakto kuné.—Marko 12:31.