E Punto di Bista Bíbliko

Kon Bo Por Resistí Deseonan Robes?

“Ora mi ta deseá di hasi loke ta bon, maldat ta presente den mi.”—ROMANONAN 7:21.

KISAS Pablo a traha mas duru ku kualke otro apòstel pa promové e prinsipionan elevá di kristianismo. (1 Korintionan 15:9, 10) Tòg, el a atmití na un manera franko loke tin skirbí aki riba. Kontinuamente e tabata tin un konflikto entre su mente i su deseonan robes. Bo a yega di sinti loke apòstel Pablo a eksperensiá? En realidat, komo hende imperfekto, kua di nos no a yega di eksperensiá e konflikto interno ei?

Pa hopi hende e bataya pa resistí deseonan robes ta masha fuerte mes. Tin hende ta lucha kontra e deseo pa satisfasé impulsonan seksual inmoral. Otronan ta bisiá na wega di plaka, tabako, droga òf alkohòl. Ora deseonan perhudisial i impuru persistí, kon nos por logra resistí nan? Ki yudansa tin disponibel? E bataya kontra deseonan robes lo kaba un dia?

Amor—E Medio pa Resistí Deseonan Robes

Hesus a indiká kua ta e dos mandamentunan mas grandi di e Lei di Moisés. E promé tabata: “Stima SEÑOR bo Dios ku henter bo kurason, i ku henter bo alma, i ku henter bo mente.” (Mateo 22:37) Si nos ta stima Dios na e manera ku Hesus a indiká, nos deseo di mas grandi no mester ta pa agradá E? Si esei ta e kaso, e deseo rekto ei lo por yuda nos den nos lucha asta kontra e deseonan robes di mas difísil pa  resistí! Esaki no ta simplemente un teoria irealístiko. Tur dia miónes di kristian ta logra resistí deseonan robes. Kon bo por logra kultivá un relashon íntimo asina ku Dios? Dor di meditá ku apresio riba su bondat ku nos ta mira den su kreashon, den Beibel i na e manera ku e ta trata nos personalmente.—Salmo 116:12, 14; 119:7, 9; Romanonan 1:20.

E di dos mandamentu mas grandi ku Hesus a menshoná tabata: “Stima bo próhimo manera bo mes.” (Mateo 22:39) Apòstel Pablo a bisa ku amor “no ta komportá su mes indesente” i “e no ta buska su propio interes.” Kier men ku e klase di amor sin egoismo aki ta yuda nos evitá di hasi tur loke por ofendé otro hende. (1 Korintionan 13:4-8) Kon nos por kultiv’é? Dor di pone nos mes den sapatu di otro hende i tene kuenta sinseramente ku nan sintimentunan i mustra interes den nan bienestar eterno.—Filipensenan 2:4.

Ki Yudansa Tin Disponibel?

Dor ku Dios ta komprondé kon difísil ta pa nos hasi loke ta bon, el pone vários yudansa na nos disposishon. Mediante Beibel, su Palabra skirbí, Dios ta siña nos pa odia loke ta malu i desaroyá un rèspèt saludabel p’e. (Salmo 86:11; 97:10) Den Beibel tin historianan di bida ku ta mustra kon desastroso ta ora un hende ta entregá na deseonan robes. Ademas, Hesus a bisa ku si nos pidi Dios pa Su spiritu santu, e forsa mas potente den universo, lo e duna nos esei. (Lukas 11:13) E forsa aki lo por fortalesé nos determinashon pa hasi loke ta korekto. Un otro yudansa ta e sosten i animashon mutuo ku nos por haña for di otro kristiannan ku tambe ta lucha pa resistí deseonan robes. (Hebreonan 10:24, 25) Ora ku e influensianan positivo aki ta remplasá esnan negativo, nos ta haña e sosten nesesario den nos lucha pa hasi loke ta korekto. (Filipensenan 4:8) Pero di bèrdat esei lo yuda?

Ban wak e kaso di Fidel, kende tabata konosí den su komunidat komo un buraché. Na momentu ku e tabata bou di influensia di alkohòl, e tabata huma, hunga wega di plaka i bringa ku otro hende. Loke a yud’é vense e práktikanan aki ta su studio di Beibel i asosiashon ku Testigunan di Yehova. Awor e ta gosa di un bida hopi mas mihó ku su kasá i su dos yunan.

Algun hende lo por puntra: ‘Pero kiko si mi haña un rekaida?’ Apòstel Juan a mustra kon pa trata ku e situashon ei. El a skirbi: “Mi yu chikitunan, mi ta skirbi boso e kosnan aki pa boso no hasi piká. I si un hende hasi piká, nos tin un Abogado serka e Tata, Hesukristu, e hustu; i e mes ta e propisiashon pa nos pikánan, i no pa di nos so, ma tambe pa esnan di henter mundu.” (1 Juan 2:1, 2) Sí, Hesus su sakrifisio ta kubri e erornan di un hende ku arepentí i ku ta hasi esfuerso sinsero pa hasi kambio pa agradá Dios. En bista di e areglo ei, ki motibu válido un hende lo por tin pa entregá den e lucha pa hasi loke ta bon?

Deseonan Robes Lo Wòrdu Vensí

Si nos kultivá amor pa Dios i pa nos próhimo i hasi bon uso di e yudansa ku Dios ta duna nos, for di awor nos lo por tin éksito den nos lucha kontra deseonan robes. Ademas, e Palabra di Dios ta sigurá nos ku e lucha aki lo no dura pa semper. Esnan ku hasi bon uso di Dios su provishonnan spiritual lo wòrdu kurá kompletamente, tantu den sentido físiko komo spiritual, den futuro serkano. (Revelashon 21:3-5; 22:1, 2) Nan lo haña liberashon for di e karga di piká i di loke ku e ta kousa, esta, morto. (Romanonan 6:23) Di otro banda, esnan ku ke sigui kumpli ku deseonan impuru i perhudisial lo no risibí e bendishonnan ei.—Revelashon 22:15.

Esta un konsuelo pa sa ku nos lo no tin ku lucha kontra deseonan robes pa semper. Nan lo ser eliminá kompletamente i permanentemente. Ki un alivio esei lo ta!