Hóbennan Sa Puntra . . .

Kon Mi Por Sali for di e Sombra di Mi Ruman?

“Mi kier tabatin mi propio personalidat, pero semper mi a sinti ku mi mester a aktua di akuerdo ku e reputashon di mi ruman muhénan. Mi tabata sinti ku nunka lo mi por a hasi e kosnan ku mi ruman muhénan a logra.”—Clare.

BO TIN un ruman hòmber òf un ruman muhé ku aparentemente tin éksito den tur kos? Bo mayornan konstantemente ta konsehá bo pa ta mas manera e ruman ei? Si ta asina, kisas bo tin miedu ku semper lo bo keda den sombra di bo ruman, es desir, ku hende semper lo midi bo balor na kon bon bo ta alkansá e logronan di bo ruman.

Barry * su dos ruman hòmbernan mas grandi a gradua di e Skol di Entrenamentu Ministerial, * un skol altamente respetá, i nan tin ekselente reputashon komo kristian. Barry a atmití: “Mi no tabatin masha konfiansa den mi mes, ya ku mi tabata sinti ku nunka lo mi por alkansá nan nivel den e trabou di prediká ni ser mes bon ku nan den dunamentu di diskurso. Pa mi tabata difísil pa sera mi propio amistatnan, pasobra mi tabata djis kompañá mi rumannan ora hende invitá nan. Mi tabata sinti ku hende tabata amigabel ku mi djis debí na mi rumannan.”

Ta difísil pa bo no sinti yalurs ora bo tin un ruman ku tur ora bai ta haña elogio. Den tempu bíbliko e hóben Hosé a destaká entre su ruman hòmbernan. Ki efekto esaki tabatin riba nan? “Nan a odi’é i no por a papia kuné ku kariño.” (Génesis 37:1-4) Klaru ku Hosé tabata modesto. Pero bo ruman kisas ta stimulá rivalidat i renkor dor di rekordá bo konstantemente di su logronan.

Tin hóben ta reakshoná riba tur esaki dor di rebeldiá. Podisé nan ta laga nan puntonan di skol bai atras, nan ta baha man na aktividatnan kristian òf ta bai partisipá den komportashon skandaloso. Kisas nan ta pensa ku si nan no por hasi mes bon ku nan ruman, no ta bale la pena pa nan purba mes. Pero a lo largu, rebeldia ta perhudiká bo so. Kon bo por sali for di e sombra di bo ruman, es desir, distinguí bo mes for di dje den un manera ku ta laga bo sinti bo bon ku bo mes?

 No Pone Bo Rumannan Riba un Pedestal

Mirando tur e atenshon ku bo ruman ta risibí, por pone bo kere ku e ta perfekto i ku nunka hamas lo bo por ta manera dje. Pero esei di bèrdat ta asina? Beibel ta bisa flèt: “Tur a peka i ta falta e gloria di Dios.”—Romanonan 3:23.

Sí, sea kual sea e abilidatnan òf talentonan ku bo rumannan tin, tòg nan ta keda ‘hende ku tin e mesun debilidatnan’ ku nos. (Echonan 14:15, NW) No tin motibu pa pone nan riba un pedestal òf pa konsiderá nan komo ídolo. E úniko hende ku a yega di pone un ehèmpel perfekto tabata Hesukristu.—1 Pedro 2:21.

Siña for di Nan!

Awor, purba mira bo situashon komo un oportunidat pa bo siña algu. Por ehèmpel, konsiderá e rumannan hòmber i muhé di Hesukristu. (Mateo 13:55, 56) Pensa kuantu kos nan lo por a siña for di nan ruman perfekto! No opstante, “su rumannan mes no tabata kere den dje.” (Juan 7:5) Podisé orguyo òf yalusí a stroba nan di tin fe. Tabata Hesus su rumannan spiritual—su disipelnan—ku a reakshoná riba su invitashon generoso: “Siña di mi.” (Mateo 11:29) I ta te despues di Hesus su resurekshon numa su rumannan karnal finalmente a realisá kuantu nan lo por a siña di Hesus. (Echonan 1:14) Promé ku esei, nan a pèrdè hopi oportunidat presioso pa siña di nan ruman ekstraordinario.

Kain tambe a hasi e fout ei. Su ruman Abel, tabata un sirbidó di Dios ekstraordinario. Beibel ta bisa ku “SEÑOR a apresiá Abel i su ofrenda.” (Génesis 4:4) Pero pa un motibu òf otro, Dios ‘no a apresiá Kain i su ofrenda.’ Kain lo por a mustra un poko humildat i siña di su ruman. En bes di esei, “Kain a rabia masha pisá” i al final el a mata Abel.—Génesis 4:5-8.

Sin duda abo nunka lo no rabia dje pisá ei ku bo ruman. Pero lo bo por pèrdè oportunidatnan presioso si bo laga orguyo i yalusí para den bo kaminda. Si bo tin un ruman ku ta masha bon mes den wiskunde, e ta destaká den geschiedenis, e ta dominá bo deporte faborito, e tin un konosementu sobresaliente di e Skritura, òf e ta bon den duna diskurso, anto bo tin ku lucha kontra yalusí! Al fin i al kabo, yalusí òf “envidia ta putrimentu di wesu” i ta perhudiká so e por perhudiká bo. (Proverbionan 14:30; 27:4) En bes di karga renkor, purba siña di bo ruman. Aseptá e echo ku e tin algun talento òf abilidat ku abo no tin. Opservá kon  bo ruman ta hasi su kosnan, òf mihó ainda, pidié yuda bo.

Barry, menshoná anteriormente, a bin benefisiá di e bon ehèmpel ku su rumannan a pone. El a bisa: “Mi a mira kon felis mi rumannan tabata debí ku nan tabata dispuesto pa yuda hende den kongregashon i den e trabou di prediká. Pues mi a disidí di sigui e ehèmpel di mi rumannan, i mi a kuminsá partisipá den trabou di konstrukshon di Salòn di Reino i di Bètel. E eksperensia ku mi a gana a duna mi konfiansa i a yuda mi krese den mi relashon ku Yehova.”

Deskubrí Bo Propio Puntonan Fuerte

Podisé bo tin miedu ku si bo imitá bo ruman su bon kualidatnan, abo lo pèrdè bo propio personalidat. Pero esei no tin nodi sosodé. Apòstel Pablo a animá kristiannan di promé siglo: “Sea imitadónan di mi.” (1 Korintionan 4:16) Esaki ta nifiká ku Pablo no tabata ke pa nan tin nan propio personalidat? Niun ora so. Tin masha hopi oportunidat pa variedat. Si bo no ta mesun bon den wiskunde ku bo ruman, esei no ke men ku bo no ta sirbi. Simplemente esei ke men ku bo ta diferente.

Pablo a duna e konseho práktiko aki: “Laga kada un saminá su mes obra, i e ora ei e lo tin motibu pa gaba solamente enkuanto su mes, i no enkuanto un otro.” (Galationan 6:4) Dikon bo no ta traha pa desaroyá bo propio abilidat- i talentonan úniko? Hasi algu ku kisas lo yuda bo sinti mas bon tokante bo mes, i ku tambe lo duna bo abilidatnan balioso, manera por ehèmpel, siña papia un idioma stranhero, siña toka un instrumento musikal òf siña usa kòmpiuter. No preokupá ku bo mester hasi tur kos perfekto! Mas bien, siña hasi bo kosnan na un manera kabal, kompetente i segun bo konsenshi. (Proverbionan 22:29) Kisas bo no tin hopi abilidat natural pa hasi algu, pero “hende trahadó ta dominá,” segun Proverbionan 12:24 (Beibel na papiamentu koriente).

Sin embargo, ta spesialmente bo desaroyo spiritual ta loke lo ta bon pa bo traha ariba. Abilidatnan relashoná ku aktividatnan spiritual ta di balor hopi mas duradero ku kualke talento ku fásilmente ta hala atenshon di otro hende. Konsiderá e rumannan ohochi Esau ku Jakòb. Esau a haña hopi elogio di su tata pasobra e tabata “un bon yagdó, un hòmber di kunuku.” Na prinsipio, kisas tabata fásil pa pasa por haltu di su ruman hòmber Jakòb, pasobra e tabata “un hòmber trankil ku tabata biba den tènt.” (Génesis 25:27) Pero Esau no a desaroyá su spiritualidat, i el a pèrdè e chèns di haña bendishon. Jakòb a kultivá un amor pa kosnan spiritual i Yehova a bendishon’é rikamente. (Génesis 27:28, 29; Hebreonan 12:16, 17) Kiko ta e lès? Desaroyá bo spiritualidat, ‘laga bo lus bria,’ i “bo progreso [lo] ta bisto pa tur hende.”—Mateo 5:16; 1 Timoteo 4:15.

Clare, menshoná anteriormente, a bisa: “Ami tabata satisfecho pa biba den sombra di mi ruman muhénan mas grandi. Pero despues mi a disidí di sigui e konseho bíbliko pa ‘habri mi kurason’ pa ku otro hende. Mi a traha den sirbishi di vèlt ku diferente persona den kongregashon, i mi a buska maneranan práktiko pa yuda esnan den kongregashon ku tabata den nesesidat. Tambe mi a invitá rumannan di diferente edat na nos kas i a kushiná pa nan. Awor mi tin un sírkulo mas grandi di amistat i mi tin mas konfiansa.”—2 Korintionan 6:13.

De bes en kuando, bo mayornan kisas ta faya i ta konsehá bo pa ta mas manera bo ruman. Pero realisando ku bo mayornan tin bo bienestar na pechu por fria e doló ei un tiki. (Proverbionan 19:11) Sin embargo, lo ta bon pa respetuosamente bo laga bo mayornan sa kon bo ta sinti ora ku nan hasi e komparashon ei. Podisé nan lo purba haña otro manera pa ekspresá nan preokupashon.

No lubidá nunka ku Yehova Dios mes ta tuma nota di bo si bo sirbié. (1 Korintionan 8:3) Barry a resumí esei bisando: “Mi a nota ku mas mi ta sirbi Yehova, mas felis mi ta. Awor hende ta mira mi pa e persona ku mi ta i ta apresiá mi, meskos ku nan ta apresiá mi rumannan.”

[Nota]

[Plachi na página 25]

Bo ruman tur ora bai ta e sentro di atenshon?

[Plachi na página 26]

Eksplorá bo propio talento- i interesnan

[Plachi na página 26]

‘Laga bo lus bria’ dor di desaroyá abilidatnan ku ta relashoná ku aktividatnan spiritual