Kresiente Renkor Kontra Belasting?

“Maske mi traha mata kurpa, gran parti di mi entrada ta ser kitá for di mi.”

—Proverbio di Babilonia, rònt di aña 2300 promé ku nos era.

“Den e mundu aki, e úniko dos kosnan sigur ta morto i belasting.”

—Estadista merikano Benjamin Franklin, 1789.

REUBEN ta traha komo bendedó. Tur aña kasi un tersera parti di su salario ku el a traha duru p’e, ta disparsé den forma di belasting. E ta keha: “Mi no ta mira kiko nan ta hasi ku tur e plaka aki. Ku e tantísimo medidanan di gobièrnu pa ekonomisá, nos ta risibiendo ménos servisio ku nunka.”

Sin embargo, sea ku nos gusta òf laga, belasting ta un parti di bida. E eskritor Charles Adams a bisa: “For di prinsipio di sivilisashon, gobièrnunan ta kobrando belasting riba entrada den hopi manera.” Hopi bes belasting a lanta renkor den pueblo i tabatin biaha ku el a inisiá revolushon. E británikonan di antiguo a lucha kontra e romanonan, bisando: “Ta mihó nan a mata nos, ku laga nos sigui biba ku belasting riba nos kabes!” Na Fransia, odio kontra gabelle, un impuesto riba salu, a kontribuí na e inisio di e Revolushon Franses, durante kua nan a dekapitá kobradónan di belasting. Revolushon kontra medidanan di belasting a hunga un ròl tambe den e guera pa independensia ku Merka a bringa kontra Inglatera.

No ta un sorpresa anto ku renkor kontra belasting ta sigui kushi te ku awe. Ekspertonan ta bisa ku den paisnan den desaroyo sistemanan di belasting hopi bes ta “inefisiente” i “inhustu.” Segun un investigadó, tin un pais afrikano pober ku tabatin “mas ku 300 lei lokal di belasting, i tabata imposibel pa atministrá nan asta ku e personal di mas kapasitá. Sea no tin òf no ta apliká bon métodonan di kobra i supervisá e belasting, . . . kreando oportunidatnan pa hasi mal uso di dje.” BBC News a informá ku den un pais asiátiko, “funshonarionan lokal a imponé desénas di . . . belasting ilegal—for di belasting pa kultivá bakoba te na belasting pa mata porko—sea pa oumentá e entrada lokal di gobièrnu òf pa yena nan mes saku.”

E diferensia grandi ku tin entre riku i pober ta intensifiká e renkor kontra belasting. Segun e publikashon di Nashonnan Uní Africa Recovery: “Un di e hopi diferensianan ekonómiko ku tin entre paisnan desaroyá i esnan den desaroyo ta ku paisnan desaroyá ta duna supsidio na kunukero miéntras ku paisnan den desaroyo ta imponé belasting riba kunukero. . . . Investigashonnan di Banko Mundial ta indiká ku posiblemente supsidionan na kunukeronan merikano so kaba ta pone ku e entrada anual ku Wèst Afrika ta haña di su eksportashon di katuna ta ser redusí ku $250 [mion] pa aña.” P’esei kunukeronan den paisnan den desaroyo kisas no ta gusta ora ku nan gobièrnu kobra belasting riba nan entrada ku ya kaba ta tiki. Un kunukero den un pais asiátiko a bisa: “Ki ora ku [funshonarionan di gobièrnu] a bini akinan nos tabata sa ku sin duda nan ta bin pa pidi plaka.”

Na Suráfrika nos a mira e mesun renkor ei resientemente ora ku gobièrnu a imponé un grondbelasting pa kunukero. E kunukeronan a menasá di bai korte. Segun un bosero di e kunukeronan, e  belasting ei “lo pone kunukeronan bati bankrut i lo kousa mas desempleo bou di trahadó di kunuku.” Tin biaha, renkor kontra sierto belasting ainda ta resultá den violensia. BBC News a informá: “Dos kunukero [asiátiko] a ser matá aña pasá ora ku polis a invadí un pueblito kaminda kampesinonan tabata protestá kontra belasting muchu haltu.”

Pero no ta hende pober so ta karga un renkor kontra belasting. Un enkuesta na Suráfrika a revelá ku hopi pagadó di belasting bon pará, “no ta dispuesto pa paga mas belasting—asta si esaki a nifiká ku gobièrnu lo no por mehorá e servisionan ku ta importante pa nan.” Personanan mundialmente famoso riba tereno di músika, pelíkula, deporte i polítika tabata den notisia di promé plano debí ku nan a hasi kosnan ilegal pa nan no paga belasting. E buki The Decline (and Fall?) of the Income Tax (E Dekadensia [i Kolapso?] di Belasting Riba Entrada) a komentá: “Lamentablemente, nos funshonarionan gubernamental di mas haltu, nos presidentenan, tampoko no tabata ehèmpelnan perfekto pa inspirá siudadanonan komun i koriente pa obedesé lei di belasting.”

Podisé bo tambe ta sinti ku tin muchu hopi belasting i ku nan ta inhustu i aplastante. Kon anto bo tin ku mira pagamentu di belasting? E ta sirbi pa algu realmente útil? Dikon reglanan di belasting hopi bes ta asina kompliká i aparentemente inhustu? E siguiente artíkulonan ta analisá e preguntanan aki.

[Plachi na página 4]

Den paisnan den desaroyo hende pober kisas ta karga un parti inhustu di e peso di belasting

[Rekonosementu]

Godo-Foto