Tempu Ku e Riu A Kore Kontrali

RIU Mississippi ta keda manera un liña skeins-duars riba mapa di Merka, ku ta parti e pais den dos. E riu su fuente ta na Minnesota, i einan e ta solamente tres meter hanchu. Pero rápidamente e ta bira mas hanchu segun ku desénas di otro riu ta bin kaba den dje a lo largu di su rekorido di 3.700 kilometer bayendo den direkshon zùit. Serka di New Orleans, Louisiana, e riu ta bira 60 meter hundu i un kilometer hanchu. Na e boka di e riu, ku ta forma un delta, 15 mion liter di awa ta basha den Golfo di Mexico kada sekònde. Ora ku e riu ta desbordá, esei por oumentá te na mas ku 80 mion liter pa sekònde.

Hende ku ta biba a lo largu di e riu sa kiko tur e awa ei por hasi. Nan a mira kon el a inundá kunuku, kibra dam, lastra kasnan bai kuné i mata hende. Pero poko hende awe por imaginá loke a sosodé riba e riu ei ménos ku 200 aña pasá.

Na desèmber 1811, un forsa invisibel a sera su gara riba e vaye sentral di Mississippi i keda kuné tené pa vários siman. Un seri di temblor grandi a pone e fondo di riu subi i baha manera un laman agitá. E agitashon tabata asina fuerte, ku dia 7 di febrüari 1812, un poko mas ariba di New Madrid, Missouri, e poderoso Riu Mississippi a kore bai den direkshon nort en bes di zùit.

Dianan di Miedu i Temblamentu

E suseso ei tabata kulminashon di un periodo di teror konosí komo e temblornan di New Madrid. E promé temblor a tuma lugá dos or di mardugá, dia 16 di desèmber 1811, kaminda awe ta e huki zùitost di e estado di Missouri. Kunukeronan i hende den stat a bula lanta ora nan muebelnan a kuminsá skùif i nan sèrvis di porselana a spat for di otro riba flur. Kasnan tabata skùif kita for di nan fundeshi. Hende a kore sali pafó i a keda pafó, temblando di friu i di e sagudimentu di tera. Nan propio kasnan, ku anteriormente tabata un refugio di sosiegu i trankilidat, a bira un menasa pa nan.

Suela a sigui sagudí, pero ménos fuerte, te ku mainta a kuminsá habri. Rònt di 7 or di mainta, un otro temblor severo a tuma lugá. Anto serka di 11 or, tabatin un temblor asta mas fuerte ainda. Tera a habri i keda yen di klof. Lodo, awa i piedra di karbon a spùit sali for di e klofnan manera fòntein spantoso. Gas di sulfur ku a hole stinki tabata sali for di bou di tera i daña e aire. Testigunan okular a mira  míles di para tur konfundí ta bula bai for di e área. Ora ku e temblamentu violento a stòp, e stat di Little Prairie, Missouri, a keda un ruina.

Un Biahe Turbulento Riba e Riu

Miéntras ku e temblornan tabata tumando lugá, e bapor nobo-nobo New Orleans tabata nabegando riba Riu Ohio rumbo pa Riu Mississippi, ku destinashon New Orleans, Louisiana. E eksitashon i alegria di e pasaheronan a kambia den gran preokupashon, segun ku e boto a drenta e parti di riu afektá dor di temblor. Oriyanan di riu tabata sagudí i basha abou den e riu. Tronkonnan di palu ku tabatin hopi tempu den fondo, a kuminsá drif riba superfisie i a menasá di kibra e bòdi di e boto. Olanan grandi tabata sagudí e boto manera un kòrki. Mapanan di nabegashon ku nan a prepará pa e biahe no tabata sirbi mas, pasobra e temblornan a kambia e kurso di e riu. Un biahe agradabel a para bira un biahe di teror.

Dia 19 di desèmber 1811, New Orleans tabata yega serka di New Madrid, i a spera di haña provishon. Sin embargo, e stat kantu di riu ku anteriormente tabata un stat yen di bida, no tabata den kondishon pa duna niun yudansa. E poko hendenan ku ainda tabata einan, desesperadamente a hasi seña pa e boto bini i bai ku nan for di e ruinanan ku tabata saka huma, ruina di kas i negoshi.

Sin embargo, e bapor a sigui nabegá bai zùit riba Mississippi, i awor su pasaheronan tabata tembla manera bara bèrdè. E bapor a pasa e pueblo di Point Pleasant, ku tabata un pueblo bandoná. Little Prairie tabata e siguiente stat riba mapa. Pero e boto no a stòp ei tampoko, ya ku gran parti di Little Prairie a disparsé kaba i e edifisionan ku a keda tabata tur destrosá.

Mas pa zùit, e bapor a haña su kaminda será pa tronkonnan di palu ku e temblor a ranka i benta den e riu. Despues ku e tripulashon di New Orleans a habri e kaminda ku hacha i forsa brutu, nan a mara e boto pa pasa anochi na Isla #32, serka di kaminda awe ta konosí komo Osceola, Arkansas. Pero rònt di mitar di sinku di mainta, dia 21 di desèmber, un pasahero a sinti ku e boto tabata trèk straño na e kabuyanan ku tabatiné mará. Ora di dia a habri nan a mira loke a pasa. E kabuya tabata steif-steif i a bai kasi stret abou den awa. Bo no por a mira tera seku. Durante anochi, e fondo di riu a sak i Isla #32 a disparsé bou di superfisie, un víktima mas di e temblornan di New Madrid.

New Orleans a kompletá su promé biahe sano i salvo, i tabata e promé boto ku a nabegá e largura kompletu di Riu Mississippi riba energia di bapor (stoomenergie). Loke kisas ta e logro asta mas grandi ta e echo ku el a yega su destinashon.

Mas Sagudimentu

Temblornan ménos fuerte a sigui te den yanüari 1812. Anto dia 23 di yanüari, rònt di 9 or di mainta, e hendenan a sinti e gòlpinan spantoso di un otro temblor fuerte. E stat di Point Pleasant, Missouri, ku ya kaba a ser sagudí, tabata serka di e episentro di e temblor, i su habitantenan ya a hui bai. Ora ku algun di nan a regresá na febrüari 1812, nan a deskubrí ku no solamente e stat a ser destruí sino tambe ku tur rastro di e stat a disparsé. E temblor di 23 di yanüari a benta Point Pleasant kompletamente den Riu Mississippi.

Hopi hende den e region ei a teme ku esaki tabata fin di mundu, i p’esei nan a kuminsá akudí na religion. Algun pastor a bira kontentu ya ku esnan resien arepentí awor a yena e bankinan di  misa ku tabata bashí pa hopi tempu. Otro pastornan no a konfia e motivashon di nan tou ku tabata krese rápidamente, i a yama nan kristiannan di temblor. Pastor James B. Finley a duna un predikashi kayente sitando Revelashon 6:17 for di e vershon di Beibel King James ku ta bisa: “Pasobra e dia grandi di su furia a yega, i ken lo por keda para?” Den un sentido físiko mas bien ku spiritual, tabata difísil pa keda para debí na e sagudimentu di tera.

E Furia Final

Ounke pastornan a manda hopi plegaria shelu, desaster a sigui asotá e region. Promé ku mainta a habri dia 7 di febrüari 1812, e habitantenan di e region ei a bolbe ser sagudí for di nan soño intrankil dor di ondanan enorme di temblor di e episentro ku tabata bou di nan. E temblor aki, esun mas violento di tur, tabata asina fuerte ku el a basha skorsten abou na Cincinnati, Ohio, 650 kilometer leu. El a pone klòknan di misa bati na Boston, Massachusetts, 1.600 kilometer leu. I te den nort na Montreal, Canada, tayó ku skòter a sagudí riba mesa. Un hòmber di Kentucky, ku tabata biba 130 kilometer for di e episentro, a skirbi den su diario di nabegashon: “Si nos no bai for di aki, e tera lo guli nos bibu.” Sin embargo, un parti spesial di e furia di e temblor tabata reservá pa e stat kantu di riu, New Madrid.

E temblornan anterior a kousa daño pisá na New Madrid, a mata vários habitante i a kore ku mayoria sobrebibiente. Pero e temblor di 7 di febrüari a kaba kompletamente ku e lugá. Segun ku e temblor a asotá e lugá, e restu di e habitantenan a hui bai, i nèt na ora. E oriya haltu kaminda e stat tabata situá a garna i basha abou den Riu Mississippi, kaminda e awanan di e riu agitá a bati i laba e planki-, blòki- i piedranan di New Madrid bai kuné. Den poko tempu, no a keda niun rastro di e stat.

Efektonan Riba e Riu

E temblornan di New Madrid a produsí watervalnan temporal den Riu Mississippi serka di New Madrid. Desénas di boto a bòltu ora ku nan a pasa riba nan. E temblor di 7 di febrüari a pone e tera subi i baha, fòrsando e koriente di riu pa kambia di direkshon. Klofnan grandi a habri den fondo di e riu, kreando remolinonan violento ku a destruí mas boto. E temblornan a skùif e kanal di e riu i a inundá stat i boerderij. Tambe nan a desviá e awa di e riu, kreando Reelfoot Lake, un lago grandi na Tennessee ku no tabata eksistí promé ku 1812. Palunan ku un tempu tabata pará riba tera seku awor ta meimei di Reelfoot Lake, garando tenasmente na e tera bou di awa.

Hende no tin e midi eksakto di e magnitut di e temblornan aki, ya ku na 1812 no tabata eksistí e aparatonan moderno di midi temblor. Sientífikonan ta kalkulá ku por lo ménos tres di e temblornan di New Madrid lo a surpasá 8,0 riba e eskala di Richter. Esakinan ta e temblornan di mas grandi ku hamas nan a opservá riba kontinente di Estádos Unídos i ta entre esnan mas fuerte ku hamas a keda registrá riba tera. Ounke e área afektá tabatin masha tiki habitante, desénas di hende—kisas sentenáres—a muri den e desaster.

Awe Riu Mississippi ta kore banda di e huki zùitost di Missouri komo si fuera nada no a pasa. Pero si e riu por a papia, lo el a konta ke se yama un historia di e tempu ku el a kore kontrali.

[Mapanan na página 18]

(Pa e teksto den su formato kompleto, wak e publikashon)

MISSOURI

Riu Mississippi

New Madrid

[Plachi na página 19]

E bapor “New Orleans”

[Rekonosementu]

Usá ku pèrmit, State Historical Society of Missouri, Columbia

[Plachi na página 20]

E temblornan a krea Reelfoot Lake

[Rekonosementu pa Potrèt na página 18]

U.S. Fish & Wildlife Service, Washington, D.C./Dave Menke