Bo Kueru Ta Manera Muraya di un Stat

Habitantenan di statnan di antigwedat a konstruí murayanan defensivo pa stroba invasornan di drenta den e stat. E muraya di un stat a sirbi komo un barera pa para enemigu i a la bes defensornan por a protehá e stat for di riba rant di e muraya. Bo kurpa tambe tin un “muraya” protektivo: bo kueru. Kon bo kueru ta protehá bo kontra intruso?

E superfisie di bo kueru ta patapata di bakteria i otro mikro-organismo, i algun di nan por kousa infekshon i malesa. Pero bo kueru ta hasi mas ku djis fungi komo un barera pasivo. Tambe e ta stroba invasornan di drenta dor di produsí proteinanan antimikrobio (yamá peptide), ku ta aktua komo defensor. Algun di e peptidenan aki ta na warda konstantemente. Otronan ta subi warda ora ku e kueru sufri daño.

E promé dos gruponan di peptide antimikrobio ku nan a deskubrí—yamá defensin i katelisidin—a resultá di ta defensornan ku ta disponibel ora mester di nan. Ámbos grupo ta ser produsí komo reakshon riba leshon òf inflamashon dor di sèlnan den e kapa mas ariba di bo kueru. Nan ta mata invasor dor di bora buraku den flishi di sèl di invasor.

Na aña 2001 un tim di investigadó na Universidat di Tübingen, Alemania, a deskubrí un otro tipo di proteina ku ta bringa kontra mikrobio (yamá dermisidin), i ku ta aktivo na tur momentu. Distinto di e dos otro gruponan, dermisidin ta ser produsí dor di kueru sano, den e klirnan ku ta produsí sodó. Ainda nan no sa kon e proteina aki ta funshoná. Pero e echo ku sodamentu ta yuda prevení malesa por splika dikon hende ku ta baña di mas, tin mas chèns di haña infekshon di kueru i eksema.

Meskos ku e muraya di un stat di antigwedat, asina nos kueru ta un barera kontra invasornan enemigu. Lo bo ta di akuerdo sigur ku e salmista ku a bisa: “O SEÑOR, ki numeroso bo obranan ta! Ku sabiduria bo a traha tur.”—Salmo 104:24.