LO BO ke mira fin di tur guera? Lo mester tin un òf otro solushon diplomátiko pa konfliktonan nashonal i internashonal. Hopi hende ta kere ku si lidernan mundial simplemente koperá ku otro, lo por kaba ku guera. Sin embargo, probablemente bo ta desepshoná ku e resultadonan di diplomasia. Pa siglonan diplomátikonan a ratifiká tratado, formulá resolushon i tene reunionnan kumbre, pero masha tiki problema a ser solushoná permanentemente.

Beibel tin hopi di bisa tokante diplomasia i pas. E ta kontestá e siguiente preguntanan: Ki faktornan aktualmente ta stroba diplomasia di produsí pas? Kristiannan mester enbolbé nan mes den diplomasia? Kon mundu finalmente lo logra berdadero pas?

Vários relato di Beibel ta ilustrá kon kontakto personal, persona pa persona, por hiba na pas. Por ehèmpel, Abigail ábilmente a konvensé  David i su ehérsito pa no tuma vengansa kontra su famia. (1 Samuel 25:18-35) Hesus a duna e komparashon di un rei ku no tabatin niun otro rekurso rasonabel sino di manda un delegashon pa pidi pas. (Lukas 14:31, 32) Sí, Beibel ta rekonosé ku algun forma di diplomasia por solushoná konflikto. Pero dikon konferensianan di pas hopi bes tin masha tiki éksito?

Beibel a predisí ku eksaktitut ku nos tempu lo ta trabahoso. Debí na e influensia malbado di Satanas e Diabel, hende lo ta “irekonsiliabel,” es desir, nan lo no ta dispuesto na ningun akuerdo, mas bien nan lo ta “grosero, odiadó di loke ta bon, traidó, imprudente, sobèrbè.” (2 Timoteo 3:3, 4; Revelashon 12:12) Ademas, Hesus a profetisá ku fin di e sistema aktual aki lo ta marká pa “gueranan i rumornan di gueranan.” (Marko 13:7, 8) Ken por nenga ku mas i mas ta e kosnan aki ta reina? Siendo ku ta asina, ta straño anto ku intentonan pa logra pas entre e nashonnan hopi bes ta resultá enbano?

Konsiderá tambe e echo aki: Miéntras ku diplomátikonan ta traha duru pa evitá konflikto, kada un di nan su meta prinsipal ta pa promové e interesnan di su propio nashon. Esei ta e faktor mas importante di diplomasia polítiko. Kristiannan mester enbolbé nan mes den asuntunan asina?

Beibel ta konsehá: “No konfia den prensnan, den yu di hende, den kende no tin salbashon.” (Salmo 146:3) Esaki ta nifiká ku sea kual sea nan motivashon, diplomátikonan di mundu no tin ni e abilidat ni e poder pa bini ku solushonnan permanente.

Ora ku Hesus tabata ser husgá dilanti di Ponsio Pilato, el a deklará: “Mi reino no ta di e mundu aki. Si mi reino tabata di e mundu aki, mi sirbidónan lo a bringa, pa mi no wòrdu entregá na e hudiunan; ma t’asina ku mi reino no ta di e mundu aki.” (Juan 18:36) Inisiativanan di pas hopi bes ta ser influensiá pa odio nashonalista i egoismo polítiko. P’e motibu ei, kristiannan berdadero ta evitá di enbolbé nan mes den e konfliktonan di e mundu aki i su intentonan pa diplomasia.

Esaki ke men ku kristiannan no tin kunes ni ta interesá den asuntunan di mundu? Nan no ta sinti pa sufrimentu humano? Nò, no ta asina. Al kontrario, Beibel ta deskribí e berdadero adoradónan di Dios komo personanan ku ta “suspirá i keha” pa motibu di e kosnan malu ku ta tuma lugá rònt di nan. (Ezekiel 9:4) Kristiannan simplemente ta stèns riba Dios pa trese pas, manera el a primintí. Pa bo, pas ta nifiká solamente fin di guera? E Reino di Dios sigur lo logra esei. (Salmo 46:8, 9) Pero fuera di esaki, lo e garantisá e pleno siguridat i bienestar di tur habitante di tera. (Mikeas 4:3, 4; Revelashon 21:3, 4) Diplomasia òf e esfuersonan di hende su organisashonnan “pa mantené pas,” nunka lo por alkansá un pas superior asina.

Profesia di Beibel i eksperensia di pasado ta indiká bon kla ku si nos konfia den diplomasia humano pa trese pas, esei solamente lo hiba na desepshon. Esnan ku ta pone nan speransa pa pas den Hesukristu i ta apoyá e Reino di Dios, lo mira nan deseo pa berdadero pas ser realisá. Es mas, nan lo disfrutá di pas pa semper!—Salmo 37:11, 29.