For di Nos Lektornan

Diabétis Mi ke gradisí boso di henter mi kurason pa e seri “Kon pa Biba ku Diabétis.” (8 di mei 2003) For di tempu ku mi tin kuater aña mi ta lucha ku diabétis. Semper mi a pensa ku algun kos lo tabata imposibel pa mi, manera kasa i drenta den e trabou di prediká tempu kompletu, pero e artíkulonan aki a duna mi speransa. Awor, na edat di 17 aña, mi a pone komo mi meta e trabou di prediká tempu kompletu, i lo mi hasi mi bèst pa logr’é.

T. A., Hapon

Un sugerensia ku mi a haña masha bon mes tabata esun pa famia i amigunan no animá hende ku diabétis pa kome kosnan ku no ta bon pa nan. Ta un lucha pa kushiná pa mi famia, anto kaba mi mes no por kome e kosnan ku mi a prepará. Pa ken ku no tin diabétis, esaki por parse un ko’i kèns, pero mi por sigurá boso ku no ta asina!

V. N., Italia

Mi ta verplegster i dosente. Na prinsipio di e siguiente trimèster, lo mi siña mi alumnonan tokante diabétis. E plachi na página 8 i 9 ta fásil pa komprondé, i lo mi us’é den mi lès. Danki pa publiká artíkulonan simplifiká riba tópikonan médiko.

C. B., Fransia

Danki pa e artíkulonan tokante diabétis. Mi no tin e malesa aki, pero mi ruman muhé di 14 aña sí tiné. Awor mi ta komprondé loke mi ruman ta pasa aden. Ta bèrdat ku ami mester sakrifiká kos p’e, pero esei no ta dje difísil ei manera biba ku diabétis!

E.D.M., Italia

Mi mama tin sinku aña ku diabétis. Hopi bes mi ta preokupá pa su salú, ya ku mi ta biba leu for di dje. Mi tin pensá di manda un kopia di e revista aki p’e. Kisas e por yud’é ora ami no t’ei.

R. W., Indonesia

Leshon Mi a disfrutá di e artíkulo “Un Leshon Ku A Kambia Mi Bida.” (8 di mei 2003) E artíkulo aki a yuda mi trata ku e leshon na mi lomba ku mi ta sufri di dje pa mas ku 30 aña kaba. Mi a eksperensiá hopi di e mesun kosnan ku Ruman Stanley Ombeva a eksperensiá. Tabata un konsuelo pa mi pa sa ku e Palabra di Dios ta yuda bo dependé riba Yehova.

G. G., Merka

Mi a keda masha konmoví pa Ruman Ombeva su deskripshon franko di e manera ku el a reakshoná riba su desabilidatnan físiko. E relato a pone mi realisá ku mi problemanan ta masha insignifikante kompará ku loke e tin ku enfrentá. E artíkulo aki a yuda mi konsentrá riba e kosnan positivo den mi bida.

S. C., Canada

Fenomenal! Esei ta e palabra ku mi tin ku usa pa deskribí e artíkulo aki. Mi no por a pon’é abou. E manera ku e Skritura a bira hopi mas signifikante pa Ruman Ombeva ora ku e tabatin mas mester di dje a duna mi kos pa pensa ariba. Esaki lo yuda mi mustra mas komprenshon ora di ofresé yudansa na otro hende.

R. G., Merka

Tabata un animashon pa mi pa sa ku asta un kristian ku ta sirbi komo un ansiano di kongregashon a sinti e tipo di frustrashon aki i ta rekonosé ku ta tuma tempu pa trata ku un situashon manera esei. Ruman Ombeva a konta ku asta durante e periodo di mas difísil di su aflikshon, nunka el a bira iregular den sirbishi. Mi tambe ta determiná pa hasi meskos.

M. K., Hapon

Mi a kai asina hopi biaha tempu mi tabata mas yòn, ku awor mi ta sufri. Konstantemente mi tin doló, ta difísil pa mi kana i mi tin masha tiki energia. Esei ta limitá mi den e predikashon kristian i ta laga mi sinti masha malu. Pero lesando kon Ruman Ombeva a manehá su problema, a yuda mi. Masha danki!

E. E., Merka