Hóbennan Sa Puntra . . .

Kon Mi Por Tin Éksito Komo Oradó Públiko?

“Segun mi, e hendenan tabata ripará delaster un di e foutnan ku mi a hasi i e falta di konfiansa ku mi tabatin. Mi no por a konsentrá riba mi spich. Mi a sinti ku nan tabata hari mi chikí-chikí.”—Sandy. *

E OULA di skol ta chòkchòk. Bo ta tende nan anunsiá bo nòmber via loutspiker, i diripiente tur hende su bista ta riba bo. E par di stapnan ku bo tin ku kana pa yega e stènt di oradó ta parse un kilometer. Bo mannan ta kuminsá soda, bo ta sinti bo pianan manera suak, i pa un òf otro motibu bo boka ta seku-seku. Anto promé ku bo por hasi algu, un gota inmenso di sodó ta kore na bo kara. Esta bèrgwensa! Bo sa ku no ta un peloton di fusilamentu bo ta bai enfrentá, pero ta asina bo ta sinti sí!

Laga nos ta franko: E pensamentu so ku nos tin ku papia dilanti di otro hende ta duna mayoria di nos miedu. (Jeremias 1:5, 6) Tin hende ku asta a konsiderá nan miedu di papia dilanti públiko mas pió ku nan miedu di morto! Sin importá kiko abo mes kisas ta pensa di esei, tin bon motibu pakiko bo mester ta interesá den papia dilanti públiko. Laga nos konsiderá algun di e motibunan ei i tambe kon bo por bira un oradó eksitoso.

Ora Ku Pidi Bo Papia Dilanti Públiko

“Papia dilanti públiko ta un abilidat ku tur hende tin mester.” Asina propaganda pa un lès pa siña papia dilanti públiko a bisa. Sí, tardi òf trempan, bo por haña bo dilanti un ouditorio. Pa kuminsá, hopi skol ta promové papiamentu dilanti públiko. Un mucha muhé ku yama Tatiana ta kòrda: “Hopi biaha mi mester a papia dilanti mi kompañeronan na skol.” Studiantenan hopi bes mester ta kla pa papia, for di spreekbeurt i análisis di buki ku nan a lesa, te na presentashonnan oudiovisual i debatenan.

Ora ku despues di tempu bo kaba skol i kuminsá traha, nan por pidi bo duna lès na un grupo di kolega, òf presentá un proposishon na un kliente, òf splika un rapòrt finansiero na un hunta di direktiva. Bon mirá, e abilidat di papia dilanti públiko ta útil den un variedat amplio di trabou, inkluso den periodismo, management, relashonnan públiko i benta.

Pero kiko si bo skohe pa traha komo obrero òf ofisinista? Wèl, si bo por papia bon durante un entrevista pa trabou, esei kisas ta determiná si bo ta haña e trabou òf nò. Na trabou mes, bo abilidat di ekspresá bo mes bon por ta un bentaha. Corrine a traha tres aña komo weter despues ku el a kaba skol. El a bisa: “Si bo por papia bon,  hende ta konsiderá ku bo ta mas madurá i ku bo por hèndel mas responsabilidat. Esei por asta nifiká un mihó trabou, mas salario, òf por lo ménos mas rèspèt.”

Por último, hóbennan kristian hopi bes ta papia dilanti otro hende komo parti di nan adorashon. (Hebreonan 10:23) Taneisha a komentá: “Ta importante pa mi por ekspresá mi mes ku klaridat. Nos tin e privilegio di prediká e bon nobo di e Reino di Dios.” (Mateo 24:14; 28:19, 20) Den kongregashon i den nan sirbishi públiko, hóbennan kristian “no por laga di papia loke [nan] a mira i tende.”—Echonan 4:20; Hebreonan 13:15.

Pues anto, bo por benefisiá den vários manera si bo haña bon abilidat di papia. Pero asina mes, tòg bo por sinti bo nervioso ora bo pensa ku bo tin ku lanta para dilanti un ouditorio. Tin algu ku bo por hasi pa vense bo nèrvio? Sí, tin.

Kon pa Vense Bo Miedu

“Bo no tin nodi ta supersabí òf perfekto pa bo tin éksito,” segun Dr. Morton C. Orman, un eksperto di strès i un oradó públiko profeshonal. “E propósito di papia dilanti un públiko ta esaki: duna bo ouditorio un kos di balor.” Ku otro palabra, konsentrá riba e mensahe, no riba bo mes òf riba bo nervionan. Algun hende den promé siglo tabata haña ku apòstel Pablo no tabata e oradó di mas elokuente, pero komo ku semper e tabatin algu balioso di bisa, tòg e tabata efektivo. (2 Korintionan 11:6) Asina tambe, si bo presentá un kos importante ku realmente bo ta kere aden, bo nervionan lo mengua mas lihé.

Ron Sathoff, ku tambe ta un oradó renombrá ku ta entrená otro oradó, ta duna e sugerensia aki: No pensa riba bo spich komo un presentashon públiko. Trat’é manera un kòmbersashon. Sí, purba komuniká ku bo ouditorio komo si fuera ta ku personanan individual bo ta papia—i no ku un grupo grandi di persona—manera lo bo a hasi den un kòmbersashon komun i koriente. Mustra berdadero “interes personal” den bo ouditorio, i papia ku nan manera bo ta papia normalmente. (Filipensenan 2:3, 4) Mas bo manera di papia ta stail di un kòmbersashon, mas relahá lo bo ta.

Un otro motibu komun di nèrvio ta miedu di ser brongosá òf di ser kritiká dor di bo ouditorio. Lenny Laskowski, un oradó profeshonal ku ta entrená otro oradó, ta rekordá nos ku ouditorionan ta inkliná na skucha kada presentashon ku un punto di bista positivo. Laskowski a bisa: “Nan ke pa bo tin éksito, no pa bo frakasá.” P’esei tene un aktitut positivo. Si ta posibel, purba kumindá algun persona di bo ouditorio ora nan yega. Purba mira nan komo bo amigu, no bo enemigu.

Kòrda tambe ku no ta kompletamente malu pa sinti bo nervioso. Un eksperto a bisa: “Kontrario na loke mayoria hende ta kere, ta bon  pa bo i pa bo presentashon si bo ta sinti nervioso.” Dikon ta asina? Pasobra un grado di nèrvio ta indiká ku bo ta humilde, i esei lo evitá ku bo ta haña demasiado konfiansa. (Proverbionan 11:2) Hopi atleta, músiko i aktor ta haña ku un poko energia nervioso de echo ta laga nan aktua mihó, i esei tambe por ta e kaso serka oradó públiko.

Sugerensianan pa Logra Éksito

Dor di apliká e siguiente puntonan i otro ideanan, algun hóben kristian ya kaba a haña un midí di eksperensia i éksito komo oradó na skol, na trabou i den nan kongregashon. Wak si un par di nan sugerensianan lo por yuda bo.

Jade: “Ekspresá e informashon ku bo mes palabranan. Konvensé bo mes di e benefisionan di loke bo tin di bisa. Si bo ta sinti ku bo diskurso ta importante, bo ouditorio tambe lo sinti asina.”

Rochelle: “Mi a nota ku ta útil pa graba mi mes riba vidio. E ta laga bo realisá kiko ta bo debilidatnan pero tòg e ta probechoso. Tambe, purba skohe un tópiko ku bo gusta. Esei lo ta bisto den bo spich.”

Margrett: “Mi ta haña ku mi ta papia mas natural i mas den stail di kòmbersashon ora mi usa un boskeho òf skema en bes di skirbi tur kos palabra pa palabra. Ademas, ora mi hala un rosea profundo promé ku mi kuminsá papia, esei ta trankilisá mi.”

Corrine: “No tene miedu di hari bo mes. Tur hende ta hasi fout. Simplemente bo tin ku purba hasi bo bèst.”

Klaru ku meskos ku den tur otro aktividat, manera deporte, arte òf músika, no tin nada ku por remplasá eksperensia i hopi práktika. Tatiana ta rekomendá pa bo prepará bo spich hopi tempu di antemano ya asina bo tin sufisiente tempu pa praktiká. I no entregá. El a bisa: “Mas tantu biaha mi papia dilanti otro hende, ménos nervioso mi ta bira.” Pero tin un fuente mas di yudansa ku bo no mester lubidá riba dje, spesialmente ora bo tin ku papia pa defendé adorashon berdadero.

Yudansa for di e Gran Komunikadó

Komo hóben, David, e futuro rei di Israel, ya kaba tabatin e reputashon ku “e sa kon papia.” (1 Samuel 16:18, Beibel na papiamentu koriente) Kon bini? Evidentemente, David den su hubentut, durante e tantísimo oranan ku el a pasa pafó den kunuku ta kuida karné, a desaroyá mediante orashon un relashon íntimo ku e Gran Komunikadó, Yehova Dios. (Salmo 65:2) Anto e relashon aki, na su turno, a prepar’é pa papia na un manera kla, vigoroso i konvinsente, asta bou di sirkunstansianan difísil.—1 Samuel 17:34-37, 45-47.

Bo por tin sigur ku den transkurso di bo adorashon, Dios lo yuda abo tambe papia na un manera konvinsente, meskos ku el a yuda David, dunando bo “un lenga ku a wòrdu siña.” (Isaias 50:4; Mateo 10:18-20) Sí, dor di probechá awor di oportunidatnan pa mehorá bo abilidat di papia, bo por bira un oradó públiko efektivo!

[Nota]

[Kuadro na página 18]

Entrená Komo Oradó

Den kongregashon di Testigunan di Yehova rònt mundu, tin un programa di instrukshon semanal basá riba Beibel ku yama Skol di Ministerio Teokrátiko. Studiantenan ta partisipá den seshonnan di klas, ta duna presentashon dilanti di e kongregashon i ta risibí yudansa personal pa yuda nan progresá. E programa ta efektivo? Laga Chris di 19 aña konta bo su eksperensia.

El a bisa: “Promé ku mi a djòin e skol, mi tabata sinti mi hopi inkómodo den hende. Nunka mi a pensa ku lo mi por ta riba podio dilanti un ouditorio. Pero algun persona den e kongregashon a animá mi, bisando ku maske mi gaga so durante henter e parti, nan lo disfrutá di dje, sabiendo kuantu esfuerso m’a hasi pa ta ei dilanti. Anto, despues di kada presentashon ku mi duna, nan tabata elogiá mi. Esei tabata un gran yudansa.”

Awe, despues di sinku aña den e skol, Chris ta preparando pa duna su promé diskurso di 45 minüt. Abo ta probechando di e skol aki?

[Plachinan na página 16, 17]

Ser un oradó ábil por yuda bo den tur aspekto di bida