Loke Beibi Mester i Ke Haña

FOR di momentu ku e nase, un beibi mester di kuido tierno, inkluso karisia suave i kontakto di kueru ku kueru. Tin dòkter ta di opinion ku e promé 12 oranan despues di nasementu ta krusial. Nan ta bisa ku loke e mama i e yu tin mester i ke haña mesora despues di parto “no ta soño ni kuminda, sino pa karisiá i keda den brasa di otro i wak otro i skucha otro.” *

Mayornan outomátikamente ta mishi ku nan beibi, ta bras’é tiernamente, karisi’é i ten’é pegá ku nan kurpa. E beibi na su turno, ta sinti su mes sigur i pegá ku su mayornan i ta reakshoná riba nan atenshon. E poder di e laso aki ta asina fuerte ku mayornan inkansablemente lo hasi sakrifisio pa por kuida e yu chikí aki.

Di otro banda, sin e laso amoroso di su mayornan, un yu chikí por literalmente seka i muri. P’esei tin dòkter ta pensa ku ta importante pa laga un mama tene su beibi asina ku e kaba di nase. Nan ta sugerí ku inmediatamente despues di parto, mester laga e mama i e yu keda ku otro pa por lo ménos 30 pa 60 minüt.

Ounke algun hende ta boga pa krea e laso emoshonal i di kariño aki inmediatamente despues di parto, lo por ta masha difísil, i asta imposibel, pa hasi esei den algun hospital. Hopi bes nan ta separá yu resien nasí for di nan mama pa evitá ku e beibi  ta haña infekshon. Sin embargo, tin evidensia ku ta indiká ku e porsentahe di infekshonnan fatal en realidat lo por baha ora yunan resien nasí keda ku nan mama. P’esei mas i mas hospital ta dispuesto pa laga e mama keda mas tantu tempu ku su yu resien nasí despues di parto.

Preokupashon pa ku e Laso Emoshonal

Tin mama no ta sinti kariño mesora pa nan beibi ora ku nan mir’é pa promé biaha. P’esei nan ta puntra nan mes: ‘Lo mi tin problema pa krea un laso emoshonal i di kariño ku mi yu?’ Ta bèrdat ku no ta tur mama ta namorá di nan beibi na primera bista. Sin embargo, no tin nodi preokupá.

Asta ora ku na promé instante e mama no sinti kariño maternal pa e beibi, despues esei por desaroyá plenamente. Un mama ku eksperensia a remarká: “No tin un sirkunstansia spesífiko na ora di nasementu ku ta determiná e éksito òf frakaso di bo relashon ku bo yu.” Pero tòg, si bo ta na estado i ta preokupá ku esei, lo ta sabí pa papia ku bo dòkter di parto di antemano. Lag’é komprondé bon kla loke bo ta deseá relashoná ku ki ora i pa kuantu tempu bo ke ta den kontakto ku bo yu resien nasí.

“Papia ku Mi!”

Ta parse ku tin sierto periodo di tempu spesial durante kua yunan chikí ta hopi sensitivo pa stimulashonnan spesífiko. Despues di algun tempu e oportunidat spesial ei ta terminá. Por ehèmpel, e selebro hóben ta dominá un idioma fásilmente, i asta mas ku un idioma. Pero parse ku rònt di edat di sinku aña e periodo mas reseptivo pa siña idioma ta kuminsá yega na su fin.

Despues ku un mucha yega 12 pa 14 aña di edat, siña un idioma nobo por ta un tarea masha difísil. Segun Peter Huttenlocher, neurólogo di mucha, esei ta e momentu ku “e densidat i kantidat di sinápsis den e área di idioma den e selebro ta mengua.” Pues ta bisto ku e promé sinku añanan di bida ta un tempu krusial pa atkerí e abilidat di idioma!

Kon yu chikí ta logra e hazaña di siña papia, ku ta asina importante pa nan sigui desaroyá nan fakultat di rasoná i atkerí konosementu? Prinsipalmente dor ku nan mayornan ta papia ku nan. Yu chikí ta reakshoná spesialmente riba stimulashon ku ta bini di otro hende. Barry Arons di e Instituto Teknológiko di Massachusetts a remarká: “Un beibi . . . ta imitá e stèm di su mama.” Pero ta interesante pa nota ku beibi no ta imitá tur zonidu. Segun Arons, un beibi “no ta inkluí den su abla e keñamentu di e wig ku ta tuma lugá pareu ku e stèm di su mama.”

Mayornan di vários antesedente kultural ta papia ku nan beibi usando e mesun estilo di papia rítmiko, ku hende sa yama lenga chikí. Segun ku e mayor ta papia den un manera amoroso, e beibi su kurason ta kuminsá bati mas duru. Ekspertonan ta kere ku e manera di papia ei ta yuda ku e beibi ta mira mas lihé e konekshon entre palabra i e opheto ku nan ta indiká. Sin bisa un palabra, e yu chikí ta grita: “Papia ku mi!”

“Wak Mi!”

A keda probá ku durante mas o ménos e promé aña, yu chikí ta forma un laso emoshonal ku un persona adulto ku ta kuid’é, por lo  general su mama. Ora ku e beibi ta sinti su mes sigur den e laso emoshonal aki, e ta mas lif ku otro hende ku beibinan ku no ta sinti e siguridat di e laso maternal. Ekspertonan ta kere ku ora un yu tin tres aña di edat, ya e mester a desaroyá e laso emoshonal ei kaba ku su mama.

Kiko por sosodé si neglishá un yu chikí durante e periodo krusial aki ora ku su mente ta sumamente vulnerabel pa influensia djafó? Martha Farrell Erickson, kende a sigui e desaroyo di 267 mama i nan yunan pa mas ku 20 aña, a ekspresá e opinion aki: “Negligensia, lentamente i persistentemente, ta kaba ku e mucha su entusiasmo i energia, te ora ku [e mucha] tin masha tiki gana di forma relashon ku otro hende òf di siña konosé e mundu.”

Den un intento pa ilustrá su punto di bista relashoná ku e konsekuensianan serio di negligensia emoshonal, Dr. Bruce Perry di Hospital di Mucha di Texas a bisa: “Si bo pidi mi tuma un beibi di seis luna i skohe entre kibra tur wesu den su kurpa òf ignor’é emoshonalmente pa dos luna, mi ta kere ku lo ta mas mihó pa e beibi si bo kibra tur wesu den su kurpa.” Dikon? Desde Dr. Perry su punto di bista, “wesu por kura, pero si un yu chikí pèrdè dos luna di stimulashon krusial di su selebro, lo bo tin un selebro permanentemente desorganisá.” No ta tur eksperto ta di akuerdo ku e daño ei ta ireparabel. No opstante, estudionan sientífiko ta indiká ku un ambiente ku emoshonalmente ta enrikesé mente hóben, ta vital pa mucha.

E buki Infants (Yu Chikí) ta bisa: “Pa bisa ku poko palabra, [beibinan] ta prepará pa stima i ser stimá.” Ora un yu chikí ta yora, hopi bes ta roga e ta roga su mayornan: “Wak mi!” Ta importante pa e mayornan reakshoná den un manera kariñoso. Ta dor di e tipo di kontaktonan ei, e beibi ta bira konsiente ku e por laga otro hende sa ki nesesidat e tin. E ta siña forma relashonnan sosial ku otro hende.

‘Mi No Ta Malkriá e Beibi Asina?’

Podisé bo ta puntra: ‘Si mi reakshoná kada bes ku e beibi yora, no ta malkriá mi ta malkri’é asina?’ Kisas. Opinionnan ta varia mashá riba e pregunta aki. Komo ku kada yu ta úniko, mayornan por lo general tin ku determiná ki método ta mas efektivo. Sin embargo, algun investigashon resien ta indiká ku ora un yu resien nasí tin hamber, ta inkómodo òf molestiá, e sistema di su kurpa di reakshoná riba strès ta produsí hormonnan di strès. E ta ekspresá su angustia dor di yora. Dòkternan ta bisa ku ora e mayor reakshoná i satisfasé e nesesidat di e beibi, e adulto ta kuminsá krea den selebro di e beibi un ret di sèl ku ta yud’é siña kalma su mes. Tambe, Dr. Megan Gunnar a bisa ku un beibi ku ta haña kuido apropiá òf lihé ta produsí ménos kortisol, un hormon di strès. I asta ora un kos molesti’é, e beibi ta stòp e reakshon riba strès mas lihé.

Erickson a bisa: “De echo, beibinan ku a ser atendé lihé i konsistentemente, spesialmente  durante e promé 6-8 lunanan di bida, ta yora ménos ku beibinan ku nan a laga yora.” Tambe ta importante pa varia bo manera di reakshoná. Si tur biaha bo ta reakshoná e mesun manera, por ehèmpel dor di dun’é kuminda òf karg’é, en bèrdat e por bira malkriá. Tin biaha ta sufisiente pa djis bisa algu pa e sa ku bo ta tend’é yora. Òf hala serka di e beibi i papia suavemente den su orea por yuda. Loke tambe por yuda ta djis pasa man riba su lomba òf su barika.

“Beibi su trabou ta di yora.” Esaki ta un dicho den Oriente. Pa un beibi, yoramentu ta e manera prinsipal pa komuniká loke e ke. Kon abo lo a sinti si kada bes ku bo pidi algu, bo ta ser ignorá? P’esei, kon bo beibi, ku ta indefenso si no tin un hende pa kuid’é, lo sintié si ignor’é kada bes ku e ta anhelá pa haña atenshon? Pero ta ken mester reakshoná ora e ta yora?

Ken Ta Kuida e Beibi?

Un senso ku nan a tene resientemente na Merka a revelá ku 54 porshento di mucha for di nasementu te ku ora nan tin 8 pa 9 aña, ku regularidat ta risibí un òf otro forma di kuido serka personanan ku no ta nan mayornan. Den hopi famia, ámbos mayor tin ku traha pa por kubri gastu. I hopi mama ta tuma verlòf pa embaraso, si ta posibel, pa kuida nan beibi pa un par di siman òf luna. Pero ta ken lo kuid’é despues di esei?

Klaru ku no tin reglanan estrikto pa dirigí desishonnan asina. Sin embargo, ta bon pa kòrda ku e mucha ainda ta vulnerabel durante e periodo krusial aki di su bida. Ámbos mayor huntu tin ku pensa seriamente riba e asuntu. Ora di disidí kiko pa hasi, nan mester konsiderá nan opshonnan kuidadosamente.

Dr. Joseph Zanga, di Akademia Merikano di Pediatria, a bisa: “Ta birando mas i mas kla ku asta ora nos laga e mihó programanan di kuido pa muchu kria nos yu, esei no ta remplasá e tempu ku mucha tin mester for di nan mama i nan tata.” Tin eksperto a ekspresá e preokupashon ku beibinan ku ta bai krèsh no ta haña e kantidat di kontakto personal ku nan mester serka e dunadó di kuido.

Algun mama ku tabata traha, siendo konsiente di e nesesidatnan vital di nan yu, a disidí ku nan lo keda kas en bes di laga otro hende atendé e nesesidatnan emoshonal di nan yunan. Un señora a bisa: “Mi a ser rekompensá ku un kontentamentu ku onestamente mi ta kere niun otro trabou lo por a duna mi.” Klaru ku preshon ekonómiko no ta permití tur mama tuma tal desishon. Hopi mayor no tin otro opshon sino di hasi uso di krèsh, i p’esei nan ta hasi èkstra esfuerso pa duna nan yu atenshon i kariño ora ku nan ta huntu. Asina tambe, hopi mayor soltero ku ta traha tin masha tiki opshon den esaki, i nan ta hasi esfuerso ekstraordinario pa kria nan yunan, i ku ekselente resultado.

E trabou di mayor por ta un trabou gososo, yen di kos eksitante. Sin embargo, tambe e ta un trabou difísil i eksigente. Kon bo por logra hasié?

[Nota]

[Kuadro/Plachi na página 6]

Beibinan Silensioso

Algun dòkter na Hapon ta bisa ku tin un oumento den e kantidat di beibi ku no ta yora ni smail. Satoshi Yanagisawa, un dòkter di mucha, ta yama nan beibi silensioso. Dikon e beibinan ta stòp di ekspresá nan emoshon? Algun dòkter ta kere ku e kondishon ta surgi pasobra e beibinan no ta haña kontakto ku nan mayornan. Nan ta yama e kondishon impotensia fòrsá. Un teoria ta menshoná komo posibilidat ku ora konstantemente mayornan ta ignorá òf malinterpretá e beibi su nesesidat di komuniká, ku tempu e beibi ta stòp di purba komuniká.

Si no duna un beibi e stimulashon apropiá na e ora oportuno, e parti di su selebro ku ta hasié un persona ku ta sinti pa otronan, kisas no ta desaroyá, segun Dr. Bruce Perry, hefe di departamentu di sikiatria na Hospital di Mucha di Texas. Den kasonan di negligensia emoshonal ekstremo, e beibi por pèrdè su kapasidat di sinti pa otro hende kompletamente. Dr. Perry ta kere ku sierto kasonan di adikshon na droga òf alkohòl i violensia di adolesente por ta ligá ku e negligensia ei ku a tuma lugá tempu ku e personanan ei tabata beibi.

[Plachi na página 7]

E laso emoshonal entre mayor i beibi ta bira mas fuerte segun ku nan ta komuniká