E Punto di Bista Bíbliko

Bo Personalidat Ta Ser Determiná pa Bo Grupo di Sanger?

DEN algun pais ta masha komun pa determiná personalidat di un persona a base di su grupo di sanger. Na Hapon por ehèmpel, no ta nada straño pa un persona kuminsá un kòmbersashon dor di puntra: “Ki tipo di sanger bo tin?” Esnan ku ta kere den e konsepto aki ta bisa ku hende ku tin e tipo di sanger A ta hende trankil, responsabel i deskonfiá; esnan ku tin sanger B ta hende sinsero i generoso, ku beis, fásil pa gaña; i asina nos por sigui. Tambe nan ta bisa ku si un persona tin un sierto tipo di sanger kisas ta difísil—òf fásil—pa e bai bon ku un persona ku tin un otro tipo di sanger.

A base di e konsepto aki, algun hende ta konsiderá grupo di sanger komo un faktor importante ora di forma grupo di studiante na skol, selektá ehekutivonan den kompania òf asta ora di skohe hende pa kasa kuné. Tin kualke prueba ku nos tipo òf grupo di sanger ta determiná nos personalidat? Tin kualke siñansa bíbliko relashoná ku e asuntu aki?

Kiko Ta Grupo di Sanger?

The World Book Multimedia Encyclopedia ta splika: “E membranonan di sèl kòrá di sanger ta kontené proteina ku yama antigene. Hende a identifiká mas ku 300 antigene di sèl kòrá.” Tin sierto antigene ku algun hende tin, pero ku otronan sí no tin, i tin algun antigene ku no por eksistí huntu. P’esei e ensiklopedia ta sigui bisa: “Basá riba presensia òf ousensia di sierto antigene en partikular, sientífikonan a klasifiká hende su sanger den vários grupo.”

E sistema di grupo di sanger ku generalmente hende ta aseptá ta e sistema ABO, ku ta klasifiká hende su sanger den kuater tipo: A, B, AB i O. Ademas, tin tambe e sistema Rh [rhesus faktor] ku generalmente hende sa usa. En realidat, tin rònt di 20 sistema konosí di agrupá sanger. Ta  opvio anto ku sanger ta masha kompliká. E Encyclopaedia Britannica ta deklará: “E gran variedat di antigene di sèl kòrá ku ta eksistí, ta hasi e chèns pa hende—fuera di dos persona ohochi idéntiko—tin e mesun kolekshon di supstansia ku tin den un grupo di sanger, masha chikitu.”

Bon bisá, esaki ta indiká ku kada persona tin un ‘grupo òf tipo di sanger’ úniko. Pues e argumentu di ku hende ku tin e mesun tipo di sanger tin e mesun karakterístikanan di personalidat, no tin base. Evidentemente, tin vários faktor ku ta determiná nos personalidat.

Kiko Ta Determiná Nos Personalidat?

E Encyclopaedia Britannica ta splika ku un persona su “personalidat ta e karakterístikanan di kondukta di kada persona—ku el a nase kuné òf a kultivá—ku ta distinguié for di otro persona.” Sí, ademas di e kosnan ku nos a heredá, tin otro faktornan—manera ambiente familiar, edukashon, bon i mal eksperensia—ku tin influensia riba desaroyo di nos personalidat. P’esei anto, nos komposishon genétiko no ta e úniko faktor ku ta determiná nos personalidat. Hopi bes bo por haña ku asta ohochinan idéntiko, ku tin e mesun komposishon genétiko, por tin personalidat distinto.

Un otro faktor importante ta ku un persona su personalidat por kambia òf ser kambiá. Apòstel Pablo a enfatisá e poder ku siñansanan kristian tin pa kambia hende. El a skirbi: “Pone un banda e hende [“personalidat,” NW] bieu ku su práktikanan malbado, i bisti e hende [“personalidat,” NW] nobo ku ta wòrdu renobá den un konosementu berdadero segun e imágen di Esun ku a kre’é.” (Kolosensenan 3:9, 10) Kristiannan ta rekonosé ku nan ta pekadó i ku nan a heredá tendensianan pekaminoso. Pa Dios aseptá nan, nan tin ku kambia nan personalidat.

Kiko ta hasi e kambionan ei posibel? Esei ta e poder di e palabra òf mensahe di Dios. Relashoná ku e influensia poderoso di e palabra di Dios, ku awor ta den Beibel, Pablo a skirbi: “E palabra di Dios ta bibu i aktivo i mas skèrpi ku kualke spada di dos filo, i ta penetrá te na e divishon di alma i spiritu, i di skarnir i tuti, i ta kapas pa husga e pensamentunan i intenshonnan di kurason.” (Hebreonan 4:12) Ora un persona someté su mes na e influensia di e spiritu di Dios i ta purba di biba na armonia ku e normanan moral ku Beibel ta deskribí, gradualmente su personalidat por kambia. E personalidat kristian ku ta na armonia ku normanan di Beibel ta enserá entre otro, un “kurason di kompashon, kariño, humildat, mansedumbre i pasenshi.”—Kolosensenan 3:12.

Kristiannan Mester Ta Rasonabel

Nos tin ku atmití sí ku no tin ningun prinsipio di Beibel ku ta prohibí hende di analisá grupo di sanger. Pero ku esaki por tin kualke relashon ku e manera ku hende ta komportá nan mes ta un otro asuntu. Manera ta e kaso ku tur kos den bida, nos tin ku laga e Palabra di Dios guia nos pasonan. (Salmo 119:105) Ta masha importante pa nos ta rasonabel.—Filipensenan 4:5.

Siguramente, lo ta masha irasonabel pa un persona usa su grupo òf tipo di sanger komo un èksküs p’e no hasi esfuerso pa korigí fayonan den su personalidat. Sin importá nan komposishon genétiko, kristiannan tin ku sigui progresá den moldia nan personalidat pa nan reflehá e kualidatnan di Yehova i Hesus mas tantu posibel.—Efesionan 5:1.

Ademas, kristiannan ta hasi esfuerso pa mira otro hende manera Yehova ta mira nan. “Dios no ta hasi distinshon di persona.” (Echonan 10:34, 35) Ku goso Yehova ta aseptá tur klase di hende. Pues lo ta un proseder irasonabel i no-kristian pa hui òf evitá kompania di sierto personanan djis pa motibu di nan tipo òf grupo di sanger. Esei lo ta e kaso tambe si un persona ta asosiá eksklusivamente ku hende ku tin un tipo di sanger ku ta “kompatibel” ku esun di dje. Beibel ta spièrta: “Si boso hasi distinshon di persona, boso ta kometé piká.”—Santiago 2:9.

Segun ku siensia i teknologia ta avansá, nan ta deskubrí hopi teoria i kos nobo tokante e kurpa di hende. Ta natural ku e konseptonan aki ta fasiná hende. Sin embargo, kristiannan ta hasi bon di laga Beibel—i no teoria di hende—guia nan manera di pensa. Den tur aspekto i situashon di bida, kristiannan mester “saminá tur kos” i “tene duru na loke ta bon.”—1 Tesalonisensenan 5:21.